ଅଲ ଓ୍ବାକରା(କାତାର),୨୭।୧୧,(ପି.ଟି.): ଚଳିତ ଫିଫା ବିଶ୍ୱକପ୍ରେ ନିଜର ପ୍ରଥମ ବିଜୟ ହାସଲ କରିଛି ଅଷ୍ଟ୍ରେଲିଆ। ଟ୍ୟୁନିସିଆକୁ ୧-୦ରେ ହରାଇବା ସହିତ ଶନିବାର ପ୍ରଥମ ବିଜୟ ହାସଲ କରିଛି ଦଳ। ଏହା ସହିତ ଗ୍ରୁପ୍ ଡି’ର ପଏଣ୍ଟ ଟେବଲର ଦ୍ୱିତୀୟ ସ୍ଥାନରେ ରହି ନକ୍ଆଉଟ ଆଶା ଉଜ୍ଜୀବିତ ରଖିଛି। ଅଲ ଜନୌବ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ମିଚେଲ୍ ଡ୍ୟୁକଙ୍କ ଏକମାତ୍ର ଗୋଲ ବଳରେ ଅଷ୍ଟ୍ରେଲିଆ ବିଜୟୀ ହୋଇଛି। ମ୍ୟାଚର ପ୍ରଥମାର୍ଦ୍ଧରେ ହିଁ ଡ୍ୟୁକ ଏହି ଗୋଲ ସ୍କୋର କରିଥିଲେ। ସେହିପରି ୧୨ ବର୍ଷ ପରେ ଅଷ୍ଟ୍ରେଲିଆ ବିଶ୍ୱକପ୍ରେ ବିଜୟ ହାସଲ କରିଛି। ଶେଷ ଥର ପାଇଁ ୨୦୧୦ ବିଶ୍ୱକପରେ ଦଳ ସର୍ବିୟା ବିପକ୍ଷରେ ବିଜୟୀ ହୋଇଥିଲା। ପ୍ରଥମ ମ୍ୟାଚରେ ଡିଫେଣ୍ଡିଂ ଚାମ୍ପିୟନ ଫ୍ରାନ୍ସ ନିକଟରୁ ଅଷ୍ଟ୍ରେଲିଆ ୪-୧ରେ ପରାଜିତ ହୋଇଥିଲା। ସେହିପରି ୟୁରୋ ସେମିଫାଇନାଲିଷ୍ଟ ଡେନ୍ମାର୍କ ବିପକ୍ଷରେ ମ୍ୟାଚ୍ ଡ୍ର ରଖିଥିବା ଟ୍ୟୁନିସିଆ ସହିତ ପଏଣ୍ଟ ଭାଗ କରିଥିବା ଏହି ଦଳକୁ ପରାସ୍ତ କରି ଅଷ୍ଟ୍ରେଲିଆ ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
ଶନିବାର ଟ୍ୟୁନିସିଆ ୩-୪-୨-୧ ଓ ଅଷ୍ଟ୍ରେଲିଆ ୪-୪-୨ କମ୍ବିନେଶନ ସହିତ ପଡିଆକୁ ଓହ୍ଲାଇଥିଲେ। ଟ୍ୟୁନିସିଆ ଦଳ ମ୍ୟାଚର ୫୮% ସମୟ ବଲକୁ ନିୟନ୍ତ୍ରଣରେ ମଧ୍ୟ ରଖିଥିଲା। ଏପରିକି ଟ୍ୟୁନିସିଆ ଦଳର ୧୪ ଶଟ୍ ଟାର୍ଗେଟରେ ରହିଥିବା ବେଳେ ଅଷ୍ଟ୍ରେଲିଆର ୯ଟି ଶଟ୍ ଟାର୍ଗେଟରେ ରହିଥିଲା। ଅଷ୍ଟ୍ରେଲିଆ ଓ ଟ୍ୟୁନିସିଆ ପକ୍ଷରୁ ଯଥାକ୍ରମେ ୧୫ ଓ ୧୬ଟି ଲେଖାଏ ଫାଉଲ୍ କରାଯାଇଥିବା ବେଳେ ଟ୍ୟୁନିସିଆକୁ ୩ ୟେଲୋ କାର୍ଡ ମିଳିଥିଲା। ପ୍ରଥମାର୍ଦ୍ଧର ୨୩ ତମ ମିନିଟରେ ହିଁ ମ୍ୟାଚର ଏକମାତ୍ର ଗୋଲ ଦେଖିବାକୁ ମିଳିଥିଲା। ବାମ ପାର୍ଶ୍ୱରୁ କ୍ରେଗ ଗୁଡଓ୍ବିନ୍ଙ୍କ ଏକ ଶକ୍ତିଶାଳୀ ଶଟ୍କୁ ଅଟକାଇବାକୁ ପ୍ରୟାସ କରିଥିଲେ ଟ୍ୟୁନିସିଆ ଡିଫେଣ୍ଡର। ତେବେ ଶଟ୍ଟି ତାଙ୍କ ବୁଟ୍ରେ ବାଜି ଉଠି ଯାଇଥିବା ବେଳେ ଏହାକୁ ହେଡର ଜରିଆରେ ଗୋଲରେ ପରିଣତ କରିଥିଲେ ମିଚେଲ୍ ଡ୍ୟୁକ୍। ଗୋଲ ସ୍କୋର କରିବା ପରେ ଆଙ୍ଗୁଠିରେ ଜେ ଆକୃତିର ମୁଦ୍ରା ସହିତ ସେ ସେଲିବ୍ରେଶନ୍ କରିଥିଲେ। ଦର୍ଶକ ଷ୍ଟାଣ୍ଡରେ ଉପସ୍ଥିତ ଥିବା ପୁଅ ଜାକ୍ସନ୍ ପାଇଁ ସେ ଏହି ସେଲିବ୍ରେଶନ କରିଥିଲେ। ଷ୍ଟାଡିୟମରେ ଶନିବାର ୪୧,୮୨୩ ଦର୍ଶକ ଉପସ୍ଥିତ ରହିଥିବା ବେଳେ ଏହା ମଧ୍ୟରେ ଅଧିକାଂଶ ଟ୍ୟୁନିସିଆର ଦର୍ଶକ ରହିଥିଲେ। ସେହିପରି ମ୍ୟାଚ ଶେଷ ବେଳକୁ ଟ୍ୟୁନିସିଆର ଫ୍ୟାନ୍ମାନେ ଏକ ବଡ ଫ୍ରି ପାଲେଷ୍ଟାଇନ୍ ପତାକା ଧରି ଷ୍ଟାଡିୟମରେ ପ୍ରଦର୍ଶନ କରିଥିଲେ।
