ମେଲବୋର୍ନ,୪ା୪- ଦିନିକିଆ କ୍ରିକେଟରେ ଦୀର୍ଘ ଦିନ ହେଲା ତିଷ୍ଠି ରହିଥିବା ରେକର୍ଡ ଭଙ୍ଗ ହୋଇଛି। ମହାନ ଅଧିନାୟକ ରିକି ପଣ୍ଟିଂଙ୍କ ନେତୃତ୍ୱାଧୀନ ଅଷ୍ଟ୍ରେଲିଆ ଦଳ ୨୦୦୩ରେ ଦିନିକିଆ କ୍ରିକେଟରେ ଲଗାତାର ୨୧ଟି ମ୍ୟାଚ୍ ଜିତି ପ୍ରତିଷ୍ଠା କରିଥିବା ରେକର୍ଡକୁ ଶନିବାର ଭାଙ୍ଗି ଦେଇଛି ଅଷ୍ଟ୍ରେଲିଆନ ମହିଳା ଦଳ।
ମାଉଣ୍ଟ ମାଉଁଗାନୁଇଠାରେ ଶନିବାର ଖେଳାଯାଇଥିବା ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍କୁ ୬ ଉଇକେଟରେ ଜିତି କ୍ରମାଗତ ୨୨ତମ ବିଜୟ ହାସଲ କରିଛି ମହିଳା ଅଷ୍ଟ୍ରେଲିଆ ଦଳ। ଏହି ଦଳ ଅନ୍ତିମ ଥର ୨୦୧୭ ଅକ୍ଟୋବରରେ ଦିନିକିଆ ଫର୍ମାଟରେ ପରାଜୟ ବରଣ କରିଥିଲା।୨୦୧୮ ମାର୍ଚ୍ଚରେ ଭାରତ ଗସ୍ତରୁ ଆରମ୍ଭ ହୋଇଥିଲା ଏହି ଅଷ୍ଟ୍ରେଲିଆ ଦଳର ରେକର୍ଡ ଭଙ୍ଗକାରୀ ଅଭିଯାନ। ଭାରତରେ ୩-୦ରେ ଦିନିକିଆ ସିରିଜ୍ ଜିତିବା ପରେ ପାକିସ୍ତାନ, ନ୍ୟୁଜିଲାଣ୍ଡ (ଦୁଇ ଥର), ଇଂଲଣ୍ଡ, ଓ୍ବେଷ୍ଟଇଣ୍ଡିଜ, ଶ୍ରୀଲଙ୍କାକୁ ୩-୦ ବ୍ୟବଧାନରେ ହରାଇଥିଲା ଅଷ୍ଟ୍ରେଲିଆ। ଆଉ ଏବେ ନ୍ୟୁଜିଲାଣ୍ଡ ବିପକ୍ଷରେ ହାସଲ କରିଛି ୧-୦ର ଅଗ୍ରଣୀ।
