ଦୁବାଇ,୧୨।୧୧: ଏଥର ବିଶ୍ୱକୁ ମିଳିବ ନୂଆ ଚାମ୍ପିୟନ। ଚଳିତ ଟି୨୦ ବିଶ୍ୱକପ୍ ଫାଇନାଲରେ ପରସ୍ପରକୁ ଭେଟିବାକୁ ଯାଉଛନ୍ତି ଦୁଇ ପଡ଼ୋଶୀ ଦେଶ ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ। ଗୁରୁବାର ଖେଳାଯାଇଥିବା ସେମିଫାଇନାଲରେ ଅଷ୍ଟ୍ରେଲିଆ ୫ ଉଇକେଟରେ ପାକିସ୍ତାନକୁ ହରାଇ ଦେଇଛି। ଏକଦା ପରାଜୟ ଦ୍ୱାରରେ ପହଞ୍ଚି ସାରିଥିବା ଅଷ୍ଟ୍ରେଲିଆ ପାଇଁ ହିରୋ ସାଜିଥିଲେ ମାଥ୍ୟୁ ଓ୍ବେଡ। ଟୁର୍ନାମେଣ୍ଟରେ ଏପର୍ଯ୍ୟନ୍ତ ଭୁଲ କରି ନ ଥିବା ପାକିସ୍ତାନ ପ୍ରତ୍ୟେକ ବିଭାଗରେ ଭୁଲ କରିଥିଲା। ମ୍ୟାଚ୍ରେ ସବୁଠୁ ଉଲ୍ଲେଖନୀୟ ଥିଲା, ଟୁର୍ନାମେଣ୍ଟରେ ସର୍ବାଧିକ ଉଇକେଟ ନେଇଥିବା ପେସର ଶାହିନ ଆଫ୍ରିଦୀଙ୍କୁ ଲଗାତାର ୩ ଛକା ଲଗାଇ ମ୍ୟାଚ୍ ଶେଷ କରିଥିଲେ ଓ୍ବେଡ୍।
୧୭୭ ରନ୍ର ପିଛା କରୁଥିବା ଅଷ୍ଟ୍ରେଲିଆ ଆରମ୍ଭରୁ ହରାଇଥିଲା ଅଧିନାୟକ ଆରୋନ ଫିଞ୍ଚ (୦)ଙ୍କ ଉଇକେଟ। କିନ୍ତୁ ଡେଭିଡ୍ ଓ୍ବାର୍ନରଙ୍କ ସହ ମିଚେଲ (୨୮ ରନ୍, ୩ ଚୌକା ଓ ୧ ଛକା) ମାର୍ଶ ଦ୍ୱିତୀୟ ଉଇକେଟ ପାଇଁ ୫୧ ରନ୍ ଯୋଡ଼ିଥିଲେ। ତା’ ପରେ କ୍ରମାଗତ ବ୍ୟବଧାନରେ ଷ୍ଟିଭେନ ସ୍ମିଥ (୫), ଗ୍ଲେନ ମ୍ୟାକ୍ସଓ୍ବେଲ (୭) ଓ ଓ୍ବାର୍ନର (୪୯ ରନ୍,୩ ଲେଖାଏ ଛକା ଓ ଚୌକା)ଙ୍କ ଉଇକେଟ ପଡ଼ିଯିବାରୁ ଫଶି ଯାଇଥିଲା ଅଷ୍ଟ୍ରେଲିଆ। କିନ୍ତୁ ମ୍ୟାଚ୍କୁ ଖସିବାକୁ ଦେଇ ନ ଥିଲେ ମାର୍କସ ଷ୍ଟୋଇନିସ ଓ ମାଥ୍ୟୁ ଓ୍ବେଡ୍। ଦୁହେଁ ୪୦ ବଲରେ ୮୧ ରନ୍ ଯୋଡ଼ିଥିଲେ। ସବୁଠୁ ଦର୍ଶନୀୟ ଥିଲା ୧୯ ତମ ଓଭରରେ ଆଫ୍ରିଦୀଙ୍କୁ ହ୍ୟାଟ୍ରିକ ଛକା ଲଗାଇଥିଲେ ଓ୍ବେଡ୍। ସେ ୧୭ ବଲରେ ୪୧ ରନ୍ର ବିସ୍ଫୋରକ ପାଳି ଖେଳିଥିଲେ। ତାଙ୍କ ଇନିଂସରେ ଥିଲା ୨ ଚୌକା ଓ ୪ ଛକା। ତାଙ୍କୁ ଉପଯୁକ୍ତ ସହାୟତା ଦେଇଥିଲେ ଷ୍ଟୋଇନିସ (୪୦ ରନ୍, ୨ ଲେଖାଏ ଚୌକା ଓ ଛକା )।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ୨୦ ଓଭରରେ ୪ ଉଇକେଟ ହରାଇ ୧୭୬ ରନ୍ କରିଥିଲା। ପାକିସ୍ତାନ ପାଇଁ ପୁଣି ଥରେ ଚମକିଥିଲେ ଉଇକେଟକିପର ବ୍ୟାଟ୍ସମ୍ୟାନ ମହମ୍ମଦ ରିଜଓ୍ବାନ। ସେ ୬୭ ରନ୍ର ଇନିଂସ ଖେଳିଥିଲେ। ତାଙ୍କ ଇନିଂସରେ ଥିଲା ୩ ଚୌକା ଓ ୪ ଛକା। ଅଧିନାୟକ ବାବର ଆଜାମ ୩୯ (୫ ଚୌକା) ରନ୍ କରିଥିବା ବେଳେ ଏପର୍ଯ୍ୟନ୍ତ ଫର୍ମରେ ନ ଥିବା ଫଖର ଜାମନ ଖେଳିଥିଲେ ୫୫ (୩ ଚୌକା ଓ ୪ ଛକା) ରନ୍ ଅପରାଜିତ ଇନିଂସ। ଅଷ୍ଟ୍ରେଲିଆ ପାଇଁ ମିଚେଲ ଷ୍ଟାର୍କ ୨ ଉଇକେଟ ନେଇଥିବା ବେଳେ ପାଟ କୁମିନ୍ସ ଓ ଆଡମ ଝାମ୍ପା ଗୋଟିଏ ଲେଖାଏ ଉଇକେଟ ନେଇଥିଲେ।
