ପାରଳାଖେମୁଣ୍ଡି/ମୋହନା,୨୧ା୮(ଗିରିଧାରୀ ପରିଚ୍ଛା/ମନ୍ମଥ ମିଶ୍ର): ଆନ୍ଧ୍ରପ୍ରଦେଶକୁ କାମ କରିବାକୁ ଯାଇ ଜଣେ ମାଲିକଙ୍କ ନିକଟରେ ବନ୍ଧକ ଥିବା ୫ ଜଣ ଶ୍ରମିକଙ୍କୁ ଗଜପତି ଜିଲା ପୋଲିସ ଉଦ୍ଧାର କରି ଶୁକ୍ରବାର ପାରଳାଖେମୁଣ୍ଡି ଆଣିଛି। ସେମାନେ ହେଲେ ଅଭିଳାଷ ଦଳବେହେରା (୨୧), ନିଥନିଏଲ ରଇତ (୨୪), ଜାରବିଏମ ଗମାଙ୍ଗ (୨୩), ବିକାଶ ମାଝୀ (୨୨) ଓ ଅକ୍ଷ ପାଟମାଝୀ (୨୩)। ଏହି ଯୁବକମାନଙ୍କ ପରିବାର ଲୋକେ ଆନ୍ଧ୍ରପ୍ରଦେଶରେ ସେମାନଙ୍କ ଲୋକ ବନ୍ଧକ ଥିବା ଆର୍.ଉଦୟଗିରି ଏସ୍ଡିପିଓ ରାକେଶ କୁମାର ସାହୁଙ୍କଠାରେ ଲିଖିତ ଅଭିଯୋଗ କରିଥିଲେ। ଆନ୍ଧ୍ରପ୍ରଦେଶକୁ ୩ ମାସ ତଳେ ଜଣେ ବ୍ୟକ୍ତି ଏମାନଙ୍କୁ କାମ କରିବାକୁ ନେଇ ଏକ ଯୋଗାଯୋଗ ବିଚ୍ଛିନ୍ନ ଉପକୂଳବର୍ତ୍ତୀ ସ୍ଥାନରେ ରଖି ମାଛ ପ୍ରକ୍ରିୟାକରଣ କାର୍ଯ୍ୟରେ ନିୟୋଜିତ କରିଥିଲେ। ଯୁବକମାନଙ୍କୁ ଖରାପ ପରିବେଶରେ କାର୍ଯ୍ୟ କରାଇବା, ସେମାନଙ୍କୁ ପର୍ଯ୍ୟାପ୍ତ ଖାଦ୍ୟ, ପାଣି ଓ ମଜୁରି ନ ଦେବା, ସେମାନଙ୍କ ଉପରେ କଡା ନଜର ରଖାଯାଇ ଧମକଚମକ ମିଳୁଥିବା ସେମାନଙ୍କ ପରିବାର ଲୋକେ ଅଭିଯୋଗ କରିଥିଲେ। ସେମାନଙ୍କୁ ନେଇଥିବା ବ୍ୟକ୍ତିଜଣକ ଯୁବକମାନଙ୍କ ମୋବାଇଲ ଫୋନ ମଧ୍ୟ ଛଡ଼ାଇ ନେଇଥିବାରୁ ସେମାନେ ସେମାନଙ୍କ ପରିବାର ଲୋକଙ୍କ ସହିତ ଯୋଗାଯୋଗ କରିପାରି ନ ଥିଲେ। ଏହା ଜାଣିବା ପରେ ଏସ୍ଡିପିଓ ସାହୁ ଆନ୍ଧ୍ରପ୍ରଦେଶ ପୋଲିସ ସହିତ ଯୋଗାଯୋଗ କରି ସ୍ଥାନୀୟ ପୋଲିସର ସହାୟତା ଲୋଡିଥିଲେ। ଫଳରେ ବାପତଲା ପୋଲିସ ଏକ ଟିମ୍ ଗଠନ କରି ଗଜପତି ପୋଲିସକୁ ସମସ୍ତ ସହାୟତା ଯୋଗାଇ ଦେଇଥିଲା। ଯାହାଦ୍ୱାରା ଏହି ୫ ଜଣ ଯୁବକଙ୍କୁ ଉଦ୍ଧାର କରାଯାଇ ସେମାନଙ୍କ ଘରକୁ ଅଣାଯାଇଥିଲା। ଗଜପତି ପୋଲିସ ୫ ଯୁବକଙ୍କୁ ନେଇ ଏପରି ପରିବେଶରେ କାର୍ଯ୍ୟରେ ଲଗାଇଥିବା ସମ୍ପୃକ୍ତ ବ୍ୟକ୍ତିଙ୍କୁ ଧରିବାକୁ ଉଦ୍ୟମ ଜାରି ରଖିଛି। ଶ୍ରମ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଜିଲା ଶ୍ରମ କାର୍ଯ୍ୟାଳୟକୁ ଅବଗତ କରାଯାଇଥିବା ଏସ୍ଡିପିଓ ସାହୁ କହିଛନ୍ତି ।
