ଭୁବନେଶ୍ୱର, ୧।୧୦ (ବ୍ୟୁରୋ): ପାର୍ବଣରେ ଦେବୀ ଦୁର୍ଗାଙ୍କୁ ଆବାହନ କରିବାକୁ ସମସ୍ତେ ଉତ୍କଣ୍ଠାର ସହ ଚାହିଁ ବସିଛନ୍ତି। ଶନିବାର ଷଷ୍ଠୀଠାରୁ ରୀତିନୀତି ଆରମ୍ଭ ହେଉଥିବାରୁ ଚଳଚଞ୍ଚଳ ହୋଇ ପଡିଛି ଗାଁରୁ ସହର। ରାଜଧାନୀ ଭୁବନେଶ୍ୱରରେ ବିଭିନ୍ନ ପୂଜା କମିଟି ପକ୍ଷରୁ ପ୍ରସ୍ତୁତି ସରିଥିବାବେଳେ ଅପେକ୍ଷା କେବଳ ମା’ଙ୍କ ଆଗମନକୁ। ହିନ୍ଦୁ-ମୁସଲିମ୍ ଭାଇଚାରର ପ୍ରତୀକ ପାଇଁ ଚର୍ଚ୍ଚାରେ ରହି ଆସିଥିବା ୟୁନିଟ-୮ ହରପାର୍ବତୀ ପୂଜା କମିଟି ଏଥର ମଧ୍ୟ ପ୍ରତିଯୋଗିତାମୂଳକ ପ୍ରସ୍ତୁତିରୁ ବାଦ୍ ପଡିନି। ଚଳିତ ବର୍ଷ ୩୫ବର୍ଷରେ ପଦାର୍ପଣ କରିଥିବା ଏହି କମିଟି ପୂଜା ପାଇଁ ୭ଲକ୍ଷ ଟଙ୍କା ବଜେଟ ରଖାଯାଇଛି। କମ୍ ଖର୍ଚ୍ଚରେ ସ୍ବତନ୍ତ୍ର ପ୍ରସ୍ତୁତି କରାଯାଇଛି। ଦେଶର ସାମରିକ ଶକ୍ତିର ପ୍ରଦର୍ଶନ ସ୍ବରୂପ ‘ମିସାଇଲ୍’ ଆକୃତିର ତୋରଣ ଆକର୍ଷଣ ସାଜିଛି। ଏଥିରେ ସାମରିକ ଶକ୍ତିର ବିଭିନ୍ନ ଚିତ୍ର ସ୍ଥାନ ପାଇବା ସହିତ ତ୍ରିରଙ୍ଗା ପତାକାରେ ମଣ୍ଡପକୁ ସଜାଯାଇଛି। ତୋରଣର ଉଚ୍ଚତା ୪୦ ଫୁଟ ଥିବାବେଳେ ଓସାର ୪୬ ଫୁଟ ରହିଛି। ସେହିପରି କମିଟି ପକ୍ଷରୁ ପ୍ରତିବର୍ଷ ଏଠାରେ ଦେବୀ ଦୁର୍ଗାଙ୍କ ବଦଳରେ ହରପାର୍ବତୀଙ୍କ ମୂର୍ତ୍ତି ପୂଜା କରାଯାଏ। ମୂର୍ତ୍ତିର ଉଚ୍ଚତା ୧୨ଫୁଟ ହୋଇଥିବାବେଳେ ମା’ ଏବଂ ପାର୍ଶ୍ୱ ଦେବାଦେବୀଙ୍କୁ ରୂପାର ଅଳଙ୍କାରରେ ଭୂଷିତ କରାଯିବ। ରୀତିନୀତି ଅନୁଯାୟୀ ଷଷ୍ଠୀ ରାତିରୁ ପୂଜାପାଠ ଆରମ୍ଭ ହୋଇ ସପ୍ତମୀରେ ହାଲୁଆ ଭୋଗ ଓ ଦଶମୀରେ ଖେଚୁଡି ଭୋଗ ଲାଗିବ। ସେହିପରି ସପ୍ତମୀରୁ ଦଶମୀ ପର୍ଯ୍ୟନ୍ତ ଭଜନ, ମେଲୋଡି ଭଳି ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ। ସାଂସ୍କୃତିକ କାର୍ଯ୍ୟକ୍ରମ ସହିତ ସୁରକ୍ଷା ବ୍ୟବସ୍ଥାକୁ ମଧ୍ୟ କମିଟି ପକ୍ଷରୁ ଗୁରୁତ୍ୱ ଦିଆଯାଇଛି। ସୁରକ୍ଷା ଦୃଷ୍ଟିରୁ ୫ଟି ସିସିଟିଭି କ୍ୟାମେରା ଓ ସୁରକ୍ଷା କର୍ମୀ ନିୟୋଜିତ କରାଯାଇଛି। ପ୍ରତିବର୍ଷ ରାଜ୍ୟପାଳ ଏହି ମଣ୍ଡପକୁ ଦର୍ଶନ ପାଇଁ ଆସିଥାନ୍ତି। ଏଥର ମଧ୍ୟ କମିଟି ପକ୍ଷରୁ ରାଜ୍ୟପାଳଙ୍କୁ ନିମନ୍ତ୍ରଣ କରାଯାଇଛି। ଭସାଣିରେ ପାରମ୍ପରିକ ବାଦ୍ୟଯନ୍ତ୍ରର ତାଳେ ତାଳେ ଠାକୁରଙ୍କୁ ମେଲାଣି ଦିଆଯିବ।
