ଭୋଗରାଇ, ୧୯।୧୨(ଡି.ଏନ.ଏ.): ବାଲେଶ୍ୱର ଜିଲା ଭୋଗରାଇ ଥାନା ଅଧୀନ ମନ୍ଦାରସାହିପାଟଣା ଗ୍ରାମର ଜଣେ ବ୍ୟକ୍ତିଙ୍କ ପାନବରଜ ପୋଡ଼ିବା ଘଟଣାକୁ ନେଇ ଗ୍ରାମରେ ଉତ୍ତେଜନା ଲାଗି ରହିଛି। ପୋଲିସ ଏହି ଘଟଣାର ପ୍ରାଥମିକ ତଦନ୍ତ କରି ସ୍ଥିତି ଉପରେ ତୀକ୍ଷ୍ଣ ନଜର ରଖିଛି। ପାଟଣା ଗ୍ରାମର ବୃନ୍ଦାବନ ଦାସଙ୍କ ସ୍ଥିତିବାନ ଜାଗାରେ ଏକ ପାନବରଜ ରହିଛି। ପାନବରଜକୁ ଲାଗି ମନ୍ଦାରସାହି ଗ୍ରାମ ଏମ୍ଇ ସ୍କୁଲକୁ ରାସ୍ତା ନିର୍ମାଣ ନିମନ୍ତେ ପଞ୍ଚାୟତ ପକ୍ଷରୁ ଏକ ପ୍ରସ୍ତାବ ରହିଛି। ପାନବରଜ ଉଚ୍ଛେଦ ଲାଗି ଗୋଟିଏ ପକ୍ଷ ରାଜସ୍ବ ବିଭାଗରେ ଆବେଦନ କରିଥିବା ବେଳେ ଅନ୍ୟ ପକ୍ଷ ତାଙ୍କ ନିଜସ୍ବ ରେକର୍ଡ଼ଭୁକ୍ତ ଜାଗା ବୋଲି ଦାବି କରିବାରୁ ଉଭୟ ପକ୍ଷ ମଧ୍ୟରେ ବାଦାନୁବାଦ ଦୀର୍ଘଦିନ ଧରି ଲାଗି ରହିଛି। ଉଭୟ ପକ୍ଷଙ୍କ ଭୋଗରାଇ ତହସିଲରେ ମାମଲା ଚାଲିଥିବା ବେଳେ ଆସନ୍ତା ୨୨ରେ ଏହାର ଶୁଣାଣି ହେବାର ଦିନଧାର୍ଯ୍ୟ ହୋଇଥିଲା। ଗତ ଶୁକ୍ରବାର ରାତିରେ ଗୋଟିଏ ପକ୍ଷର ୬ଜଣ ବ୍ୟକ୍ତି ପାନବରଜ ପୋଡ଼ିବା ଉଦ୍ୟମ କରି ନିଆଁ ଲଗାଇ ଦେଇଥିବା ଥାନାରେ ଅଭିଯୋଗ ହୋଇଛି। ପାନବରଜରେ ନିଆଁ ଲାଗି ବ୍ୟାପକ କ୍ଷତି ଘଟିଥିବାରୁ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ପାନଚାଷ କ୍ଷତିପୂରଣ ନିମନ୍ତେ ପାନଚାଷୀ ଦାବି କରିଛନ୍ତି। ଅଭିଯୋଗକାରୀ ପାନଚାଷୀ ନିର୍ଦ୍ଦିଷ୍ଟ ଏକ ରାଜନୈତିକ ଦଳକୁ ଦାୟୀ କରିଥିବା ବେଳେ ମନ୍ଦାରସାହି ପାଟଣା ଓ ମନ୍ଦାରସାହି ଗ୍ରାମରେ ଉତ୍ତେଜନା ଲାଗି ରହିଛି।
