ଛେଣ୍ଡିପଦା,୪।୯(ସ୍ବ.ପ୍ର.): ପ୍ରଥମ ସ୍ତ୍ରୀ ଓ ପୁଅଙ୍କୁ ଆକ୍ରମଣ ଅଭିଯୋଗରେ ଜେଲ୍ ଯାଇ କିଛିଦିନ ତଳେ ବେଲ୍ରେ ଆସିଥିବା ଅନୁଗୋଳ ଜିଲା ଛେଣ୍ଡିପଦା ଥାନା ପାତ୍ରପଡା ଗ୍ରାମର ନଗେନ ନାଏକ ପୁଣି ସେମାନଙ୍କୁ ମାରିବାକୁ ଉଦ୍ୟମ କରିଛନ୍ତି। ଶନିବାର ସେ ପ୍ରଥମ ସ୍ତ୍ରୀ ଓ ପୁଅଙ୍କୁ ଗୁଳି କରିବାକୁ ଗୋଡ଼ାଇବା ବେଳେ ଖବରପାଇ ପୋଲିସ ପହଞ୍ଚି ତାଙ୍କୁ ଗିରଫ କରିଛି। ତାଙ୍କ ନିକଟରୁ ଏକ ଦେଶୀ ବନ୍ଧୁକ ସହ ୫ ରାଉଣ୍ଡ ଜୀବନ୍ତ ଗୁଳି ଜବତ କରାଯାଇଛି।
ପୋଲିସ କହିଛି, ବାଗଡିଆ ବିଟ୍ ହାଉସ ଅନ୍ତର୍ଗତ ପାତ୍ରପଡା ହରିଜନ ସାହିର ନଗେନ କିଛିଦିନ ତଳେ ପ୍ରଥମ ସ୍ତ୍ରୀ ଅଞ୍ଜନା ନାଏକ ଓ ପୁଅ ମାନସ ନାଏକଙ୍କୁ ମାଡ଼ ମାରିଥିଲେ। ଏପରି କି ପୁଅଙ୍କ ହାତ ଭାଙ୍ଗିଦେଇଥିଲେ। ଏ ନେଇ ଅଭିଯୋଗ ପରେ ନଗେନଙ୍କୁ ଗିରଫ କରାଯାଇଥିଲା। କିଛି ଦିନ ହେବ ସେ ବେଲ୍ରେ ଆସି ଦ୍ୱିତୀୟ ସ୍ତ୍ରୀଙ୍କ ନିକଟରେ ରହୁଥିଲେ। ତେବେ ପୂର୍ବ ରାଗ ଶୁଝାଇବାକୁ ସେ ଏକ ବାଇକ୍ରେ ଆସି ପ୍ରଥମ ସ୍ତ୍ରୀ ଅଞ୍ଜନା ଓ ପୁଅ ମାନସଙ୍କ ନିକଟରେ ପହଞ୍ଚି ଗାଳିଗୁଲଜ କରିଥିଲେ। ପରେ ବାଇକ୍ ସିଟ ତଳେ ଲୁଚାଇ ରଖିଥିବା ବନ୍ଧୁକ ବାହାର କରି ଗୁଳି କରିବାକୁ ଗୋଡ଼ାଇଥିଲେ। ଭୟରେ ଉଭୟ ଦୌଡ଼ି ପଳାଇଯାଇ ଲୁଚି ରହିବା ସହ ସାହି ଲୋକଙ୍କୁ ଡାକ ପକାଇଥିଲେ। ଖବରପାଇ ପୋଲିସ ପହଞ୍ଚି ନଗେନଙ୍କୁ କାବୁ କରିବା ସହିତ ବନ୍ଧୁକ ଓ ୫ଟି ଜୀବନ୍ତ ଗୁଳି ଜବତ କରିଥିଲେ। ପୁଅ ମାନସ ଏ ନେଇ ଲିଖିତ ଅଭିଯୋଗ କରିବା ପରେ ପୋଲିସ ନଂ. ୪୨୩/୨୨ରେ ମାମଲା ରୁଜୁ କରି ନଗେନଙ୍କୁ ଗିରଫ ପରେ କୋର୍ଟ ଚାଲାଣ କରିଥିବା ପୋଲିସ ସୂଚନା ଦେଇଛି।
