ଆର.ଉଦୟଗିରି,୮।୫(ଡି.ଏନ.ଏ.): ଗଜପତି ଜିଲା ଆର.ଉଦୟଗିରି ଥାନା ଛେଳିଗଡ଼ ଗ୍ରାମ ଖ୍ରୀଷ୍ଟିଆନ ସାହିରେ ଶୁକ୍ରବାର କୋଭିଡ୍ ନିୟମ ଉଲ୍ଲଂଘନ କରି ଏକ ବାହାଘର ଭୋଜି ଚାଲିଥିଲା। ଖବରପାଇ ଆର୍. ଉଦୟଗିରି ତହସିଲଦାର ସ୍ମୃତିରଞ୍ଜନ ଶତପଥୀ ବନ୍ଦ କରିବାକୁ ଯାଇଥିବା ବେଳେ ତାଙ୍କୁ ଆକ୍ରମଣ ହୋଇଥିଲା। ତହସିଲଦାରଙ୍କ ଗାଡ଼ି ଡ୍ରାଇଭର ଓ ସାଙ୍ଗରେ ଯାଇଥିବା ସ୍ଥାନୀୟ ପୋଲିସ ମଧ୍ୟ ଆକ୍ରମଣର ଶୀକାର ହୋଇଛନ୍ତି। ସମସ୍ତ ଆହତ ଆର.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହୋଇଛନ୍ତି। ତହସିଲଦାର ସ୍ଥାନୀୟ ଥାନାରେ ଅଭିଯୋଗ କରିଛନ୍ତି। ଗିରଫ ଭୟରେ ଖ୍ରୀଷ୍ଟିଆନ ସାହିର ଯୁବକମାନେ ଫେରାର୍ ହୋଇଯାଇଛନ୍ତି। ଛେଳିଗଡ଼ ଖ୍ରୀଷ୍ଟିଆନ ସାହିରେ ବାହାଘର ଭୋଜି ସହ କରୋନା ନିୟମକୁ ଉଲ୍ଲଂଘନ କରି ବରଯାତ୍ରୀ ଦଳ ମାସ୍କ ନ ପିନ୍ଧି ବାଣ ଫୁଟାଇ ନାଚ ଗୀତ କରୁଥିଲେ। ଗ୍ରାମର କୌଣସି ବ୍ୟକ୍ତି ଫୋନ କରି ତହସିଲଦାର ଶତପଥୀଙ୍କୁ ଜଣାଇଥିଲେ। ତହସିଲଦାର ସ୍ଥାନୀୟ ପୋଲିସ ସହ ସେଠାରେ ପହଞ୍ଚତ୍ କାହିଁକି କୋଭିଡ୍ ନିୟମ ଉଲ୍ଲଂଘନ କରୁଛ ପଚାରିଥିଲେ। ଏଥିରେ ବରଯାତ୍ରୀ ଦଳରେ ଥିବା ଯୁବକମାନେ ଉତ୍ତ୍ୟକ୍ତ ହୋଇ ତହସିଲଦାରଙ୍କୁ ଆକ୍ରମଣ କରିଥିଲେ। ଏ ନେଇ ଆର୍. ଉଦୟଗିରି ଏସ୍ଡିପିଓ ଦିଲୀପ କୁମାର ନାୟକଙ୍କୁ ପଚାରିବାରେ ଘଟଣାର ତଦନ୍ତ କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
