କଟକସଦର,୨୭।୧୧(ଡି.ଏନ୍.ଏ.): କଟକ ଅଞ୍ଚଳରେ ଗତ କିଛିମାସ ହେବ ନକଲି ସାମଗ୍ରୀ କାରଖାନା ବଢ଼ିବାରେ ଲାଗିଛି। ତେଲ, ଘିଅ, ଗୁଟ୍ଖା ଭଳି ବିଭିନ୍ନ ସାମଗ୍ରୀର ନକଲି କାରଖାନା କଟକ ଅଞ୍ଚଳର ଏବେ ମୁଖ୍ୟ ପେଣ୍ଠସ୍ଥଳୀ ଭାବେ ଉଭାନ ହେବାରେ ଲାଗିଛି। ପୋଲିସ ପକ୍ଷରୁ ବାରମ୍ବାର ଚଢ଼ାଉ ସତ୍ତ୍ୱେ ମାଲିକମାନେ କିଛିଦିନର ବ୍ୟବଧାନ ପରେ ପୁଣିଥରେ ନକଲି କାରବାର ଆରମ୍ଭ କରିଦେଉଛନ୍ତି। ତେବେ ମାଲଗୋଦାମ ଥାନା ପୋଲିସ ଓ କଟକ ସଦର ପୋଲିସ ମିଳିତ ଭାବେ ପୁଣି ଏକ ନକଲି କାରଖାନା ଉପରେ ଚଢ଼ାଉ କରିଛନ୍ତି। କଟକସଦର ଥାନା ଅନ୍ତର୍ଗତ ହରିଅନ୍ତା ପଞ୍ଚାୟତ ଉଲ୍ଲାର ଗ୍ରାମର ଏକ ନକଲି ଘିଅ କାରଖାନାରେ ଗୁରୁବାର ଚଢ଼ାଉ କରି ବିଭିନ୍ନ ନାମୀଦାମୀ ଘିଅ କମ୍ପାନୀର ଲୋଗୋ, ଜରି ପ୍ୟାକେଟ, ନକଲି ଘିଅ ପ୍ରସ୍ତୁତ ପାଇଁ ସାମଗ୍ରୀ, ଓଜନ ଯନ୍ତ୍ରୀ ସମେତ ବିଭିନ୍ନ ସାମଗ୍ରୀ ଜବତ କରାଯାଇଛି। ଜବତ ସାମଗ୍ରୀର ମୂଲ୍ୟ ପ୍ରାୟ ୫୦ଲକ୍ଷ ଟଙ୍କା ହେବ ବୋଲି ମାଲଗୋଦାମ ଥାନାଧିକାରୀ ରବିନାରାୟଣ ଭଞ୍ଜ କହିଛନ୍ତି। ଏହାସହ କାରଖାନା ମାଲିକଙ୍କ ସମେତ ୨ଜଣଙ୍କୁ ଗିରଫ କରିଛି। ସେମାନେ ହେଲେ ମାଲିକ ବାଙ୍କୀ ଥାନା ଅଧୀନ ନୂଆଗଁା ଅଞ୍ଚଳର ନରସିଂହ ଦାସ ଓ ବାରଙ୍ଗ ଥାନା ଅଧୀନ ଜଈପୁର(ବେଲଗଛିଆ)ର କାଳନ୍ଦୀ ସାହୁ। ଏ ନେଇ ମାଲଗୋଦାମ ଥାନାରେ ଏକ ମାମଲା(ନଂ.୨୩୩/୨୦) ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ, କଟକ ମାଲଗୋଦାମରେ ନକଲି ଘିଅ ବିକ୍ରି ହେଉଥିବା ନେଇ ଏକ ବିଶେଷ ସୂତ୍ରରୁ ମାଲଗୋଦାମ ଥାନାରେ ଖବର ପହଞ୍ଚତ୍ଥିଲା। ପୋଲିସ ସେଠାରେ ଚଢ଼ାଉ କରି ବିକ୍ରେତା କାଳନ୍ଦୀଙ୍କୁ ଧରିବା ସହ ପଚରାଉଚରା ବେଳେ ମୁଖ୍ୟ କାରଖାନା କଟକସଦର ଅଞ୍ଚଳରେ ଥିବା ଜଣାପଡ଼ିଥିଲା। ତେବେ ପୋଲିସ ପ୍ରଥମେ ସଦର ଥାନା ପୋଲିସଙ୍କ ସହାୟତାରେ ବୁଧବାର ରାତିରେ ଉଲ୍ଲାର ଗ୍ରାମକୁ ଯାଇ ନକଲି ଘିଅ କାରଖାନାକୁ ସିଲ୍ କରିଥିଲା। ପରଦିନ ପୋଲିସ ପୂରା ଟିମ୍ ସହ ପହଞ୍ଚତ୍ ଚଢ଼ାଉ କରି ନକଲି ଘିଅ ଓ ସାମଗ୍ରୀ ଜବତ କରିଥିଲେ। ଚଢ଼ାଉରେ ମାଲଗୋଦାମ ଥାନାଧିକାରୀଙ୍କ ସମେତ କଟକ ଜୋନ ନଂ.୧ ଏସିପି ଅମରେଶ୍ୱର ପଣ୍ଡା, ଜୋନ ନଂ.୪ ଏସିପି ସତ୍ୟରଞ୍ଜନ ମଲ୍ଲିକ, ସଦର ଥାନାଧିକାରୀ ସୁଧାଂଶୁ ଭୂଷଣ ଜେନା, ଖାଦ୍ୟ ନିରାପତ୍ତା ଅଧିକାରୀ ପ୍ରତୀକ୍ଷା ଦାସ ମହାପାତ୍ର, ଓଜନ ମାପ ଅଧିକାରୀ ମୋନାଲିସା ରାୟ ପ୍ରମୁଖ ଅଧିକାରୀ ସାମିଲ ଥିଲେ।
