ରାୟଗଡ଼ା ଅଫିସ,୩୦ା୧- ରାୟଗଡ଼ା ସହରରେ ମିନି ଷ୍ଟାଡିୟମ ନିର୍ମାଣକୁ ନେଇ ବିବାଦ ଲାଗିରହିଛି। ଆମ୍ବଗୁଡାଠାରେ ପ୍ରସ୍ତାବିତ ମିନି ଷ୍ଟାଡିୟମ ସ୍ଥାନ ନିରୁପଣକୁ ନେଇ ବିବାଦ ସୃଷ୍ଟି ହୋଇଛି। ଏହାକୁ ନେଇ କ୍ରୀଡାବିତଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ପ୍ରସ୍ତାବିତ ସ୍ଥାନରେ ଶନିବାର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। କିନ୍ତୁ ଖେଳାଳିମାନେ ସେଠାରେ ପହଞ୍ଚି ବିରୋଧ କରିଥିଲେ। ସୂଚନାଯୋଗ୍ୟ, ପ୍ରାୟ ୭ କୋଟି ଟଙ୍କା ବ୍ୟୟ ଅଟକଳରେ ସହରରେ ଏକ ମିନି ଷ୍ଟାଡିୟମ ନିର୍ମାଣ ନିମନ୍ତେ ସରକାର ଅନୁଦାନ ଦେଇଛନ୍ତି। ହେଲେ ଉପଯୁକ୍ତ ସ୍ଥାନ ଚୟନ ନ ହେବା ଯୋଗୁ ୬ ମାସ ହେଲା ତାହା ପଡ଼ିରହିଛି। ଶେଷରେ ଆମ୍ବଗୁଡ଼ାସ୍ଥିତ ହାଇସ୍କୁଲ ପଡ଼ିଆରେ ଷ୍ଟାଡିୟମ ନିର୍ମାଣ ପାଇଁ ସ୍ଥାନ ନିରୁପଣ କରାଯାଇଥିଲା। ତେବେ ସେହି ସ୍ଥାନରେ ପ୍ରତ୍ୟେକ ଦିନ ଅନେକ କ୍ରୀଡ଼ାବିତ୍ ଅଭ୍ୟାସ କରୁଥିବାରୁ ଏହା ସେମାନଙ୍କ ପାଇଁ ଅସୁବିଧା ସୃଷ୍ଟି କରିବ ବୋଲି କହିଛନ୍ତି। ବିରୋଧ ପରେ ପ୍ରଶାସନ ପକ୍ଷରୁ ପୋଲିସ ଉପସ୍ଥିତିରେ ନିର୍ମାଣ କାମ ଆରମ୍ଭ ହୋଇଛି। ଅନ୍ୟପକ୍ଷରେ ଖେଳାଳିମାନେ ଜିଲାପାଳ ଅଫିସରେ ପହଞ୍ଚି ସେମାନଙ୍କ ସମସ୍ୟା ଜଣାଇଛନ୍ତି। କୌଣସି ପରିସ୍ଥିତିରେ ମଧ୍ୟ ଏହି ପଡ଼ିଆକୁ ମିନି ଷ୍ଟାଡିୟମ ନିର୍ମାଣ ପାଇଁ ନିର୍ମାଣ ପାଇଁ ଦିଆଯିବ ନାହିଁ ବୋଲି ସେମାନେ କହିଛନ୍ତି। ତେବେ ସରକାରଙ୍କ ନିଷ୍ପତ୍ତିରେ ଚୟନ ହୋଇଥିବା ସ୍ଥାନରେ ହିଁ ମିନି ଷ୍ଟାଡିୟମ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
