ଝରିଗାଁ, ୧୪।୪(ସ୍ବ.ପ୍ର.): ଯୋଜନା ଆସୁଛି, ହେଲେ ଅପହଞ୍ଚ ଇଲାକାରେ ଠିକ୍ ସମୟରେ ପହଞ୍ଚତ୍ପାରୁନାହିଁ। ଫଳରେ ଦୁର୍ଗମ ଅଞ୍ଚଳବାସୀ ବର୍ଷ ତମାମ ନାହିଁ ନ ଥିବା ସମସ୍ୟାର ଶିକାର ହେଉଛନ୍ତି। ପ୍ରଶାସନ, ସ୍ଥାନୀୟ ନେତାଙ୍କୁ ଅଭିଯୋଗ କଲେ ମଧ୍ୟ ସମସ୍ୟା ସମାଧାନର ବାଟ ଫୁଟୁନାହିଁ। ଏହା ଦେଖିବାକୁ ମିଳିଛି ନବରଙ୍ଗପୁର ଜିଲା ଝରିଗାଁ ବ୍ଲକ ଚକଲାପଦର ପଞ୍ଚାୟତ ଅଧୀନ କୁସୁମବାହାଲ ଗ୍ରାମରେ । ପିଲାଙ୍କ ଗୁଣାତ୍ମକ ଶିକ୍ଷା, ଗାଁକୁ ପକ୍କାରାସ୍ତା, ବିଶୁଦ୍ଧ ପାନୀୟ ଜଳ, ଉତ୍ତମ ସ୍ବାସ୍ଥ୍ୟସେବା ପାଇବା ସତେ ଯେମିତି ସେମାନଙ୍କ ପାଇଁ ଦିବାସ୍ବପ୍ନ।
ଦୁଇଟି ପଡ଼ାରେ ପରଜା ଏବଂ ଗୌଡ଼ ସମ୍ପ୍ରଦାୟର ୩୦ ପରିବାର ରୁହନ୍ତି। ପ୍ରାୟ ୨୫ ବର୍ଷ ହେବ ପେଟପାଟଣ ନେଇ ଇନ୍ଦ୍ରାବତୀ ବୁଡ଼ି ଅଞ୍ଚଳରୁ ଆସି ଏଠାକାର ଜଙ୍ଗଲ ସଫାକରି ଚାଷଜମି ପ୍ରସ୍ତୁତ କରିଛନ୍ତି। ସେଠାରେ ଖରିଫ ଋତୁରେ ଧାନ, ମଣ୍ଡିଆ, ମକା ଚାଷ କରନ୍ତି। ଅନ୍ୟ ଦିନରେ ଚାହାଁର, କୁସୁମ, ଅଁଳା, ମହୁଲ, ଲାଖ ଆଦି ସଂଗ୍ରହକରି ଗ୍ରାମରୁ ୯ କି.ମି. ଦୂରରେ ରହିଥିବା କଂଗ୍ରା ସାପ୍ତାହିକ ବଜାରରେ ବିକ୍ରି କରି ପରିବାର ପ୍ରତିପୋଷଣ କରନ୍ତି। ଉକ୍ତ ଗାଁକୁ କିନ୍ତୁ ରାସ୍ତା ନାହିଁ। ଜଙ୍ଗଲ ରାସ୍ତା ଦେଇ ଡକରୀକୋଟ କିମ୍ବା ଗାଇବନ୍ଧାରେ ରହିଥିବା ସ୍କୁଲକୁ ପିଲାଙ୍କୁ ପଠାଇବାକୁ ଅଭିଭାବକମାନେ ସୁରକ୍ଷିତ ମଣୁନାହାନ୍ତି। ରାସ୍ତା ନ ଥିବାରୁ ଗାଁର ୨୦ଜଣ ଝିଅପୁଅ ସ୍କୁଲ ନ ଯାଇ ପାଠପଢ଼ାରୁ ବଞ୍ଚତ୍ତ ରହିଛନ୍ତି। ଫଳରେ ଯେଉଁ ବୟସରେ ହାତରେ ବହି କଲମ ଧରିବା କଥା ପିଲାମାନେ ଜଙ୍ଗଲରୁ ମହୁଲ ଗୋଟାଇବାରେ ଦିନ ବିତାଉଛନ୍ତି। ରାସ୍ତାଘାଟ ନ ଥିବା ସହ ସଚେତନତାର ଅଭାବ ଯୋଗୁ କୁସୁମବାହାଲ ଗ୍ରାମର ଅଧିକାଂଶ ଗର୍ଭବତୀ ଘରେ ପ୍ରସବ କରିଥାନ୍ତି। ଏହାଦ୍ୱାରା ପ୍ରସୂତୀ ଓ ଗର୍ଭବତୀ ମହିଳା ମୃତ୍ୟୁ ମୁଖରେ ପଡ଼ୁଥିବା ଦେଖାଯାଇଛି। ୨ବର୍ଷ ପୂର୍ବରୁ ଗ୍ରାମର ରାମ ଜାନିଙ୍କ ସ୍ତ୍ରୀ ସମ୍ବାର ଘରେ ଏକ କନ୍ୟା ସନ୍ତାନ ଜନ୍ମ ଦେଇଥିଲେ। କିନ୍ତୁ ଜନ୍ମର ୩ ଦିନ ପରେ ସମ୍ବାରୀ ଗୁରୁତର ହୋଇ ପ୍ରାଣ ହରାଇଥିଲେ। ଏହାର କିଛି ଦିନ ପରେ ସେହି ଗ୍ରାମର ଅର୍ଜୁନ ଗୌଡ଼ଙ୍କ ସ୍ତ୍ରୀ ସନବାରୀ ଗୌଡ଼ ୮ମାସର ଗର୍ଭବତୀ ଥିବାବେଳେ ପ୍ରସବ ଯନ୍ତ୍ରଣା ପାଇଥିଲେ। ଅନେକ ଚେଷ୍ଟା ପରେ ମଧ୍ୟ ଆମ୍ବୁଲାନ୍ସ ମିଳି ନ ଥିଲା। ଅନ୍ୟ ଗାଁରୁ ଏକ ଅଟୋରେ ତାଙ୍କୁ ଝରିଗାଁ ମେଡିକାଲକୁ ନେବା ବାଟରେ ହିଁ ସନବାରୀଙ୍କ ମୃତ୍ୟୁ ହୋଇଯାଇଥିଲା। ଗାଁରେ ପାନୀୟ ଜଳ ବ୍ୟବସ୍ଥା ନ ଥିବାରୁ ଅଧ କି.ମି. ଦୂରରେ ଥିବା ପୁର୍ନାପାନୀ ନାଳରୁ ପିଇବା ପାଣି ସଂଗ୍ରହ କରୁଛନ୍ତି। ଦୂଷିତ ଜଳ ବ୍ୟବହାର କରିବା ଦ୍ୱାରା ଲୋକେ ବାରମ୍ବାର ରୋଗାକ୍ରାନ୍ତ ମଧ୍ୟ ହେଉଛନ୍ତି। ୩ ବର୍ଷ ପୂର୍ବରୁ ଏ ନେଇ ବ୍ଲକ ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ ସମସ୍ୟାର ଚିତ୍ର ବଦଳିପାରିଲାନାହିଁ ବୋଲି ଗାଁର ଲଛମନ ଗୌଡ଼, ସଦା ଜାନି, ଟଙ୍କ ଜାନି, ବନ୍ଧୁ ଜାନି, ଚୈତନ୍ୟ ଜାନି, ଚନ୍ଦନ ଜାନି, ବାଣୁଆ ଗୌଡ଼, ପାଣ୍ଡୁ ଜାନି କହିଛନ୍ତି। ଏନେଇ ବିଡିଓ ସତ୍ୟନାରାୟଣ ମେହେରଙ୍କୁ ପଚାରିବାରୁ ଗାଁକୁ ପାନୀୟ ଜଳ, ରାସ୍ତାଘାଟ ଯେପରି ହୋଇପାରିବ ସେ ଦିଗରେ ଗୁରୁତ୍ୱ ଦେବେ ବୋଲି କହିଛନ୍ତି।
