କାକଟପୁର,୧୭।୫(ଡି.ଏନ୍.ଏ.): ଲୋକଙ୍କୁ ଶୁଦ୍ଧ ପାନୀୟଜଳ ଯୋଗାଇଦେବା ପାଇଁ ଗ୍ରାମାଞ୍ଚଳରେ ନିର୍ମାଣ ହେଉଛି ପାନୀୟ ଜଳ ପ୍ରକଳ୍ପ। ଏଥିପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନାମାନ କରି କୋଟି କୋଟି ଟଙ୍କାର ଅନୁଦାନରାଶି ଯୋଗାଇ ଦେଉଛନ୍ତି। (ବୋରୱେଲ) ନିର୍ମାଣଠାରୁ ଆରମ୍ଭ କରି ପାଇପ ବିଛା, ପାଣି ଟାଙ୍କି ନିର୍ମାଣ, ପମ୍ପ ହାଉସ ଏବଂ ଷ୍ଟାଣ୍ଡପୋଷ୍ଟ ନିର୍ମାଣ କାର୍ଯ୍ୟରେ ଖର୍ଚ୍ଚ ହେଉଛି କୋଟି କୋଟି ଟଙ୍କା। ହେଲେ ଅଧିକାଂଶ ସ୍ଥାନରେ ପ୍ରକଳ୍ପଗୁଡିକ ନିର୍ମାଣ ପରେ ଠିକ ଭାବେ କାର୍ଯ୍ୟକାରୀ ହେଉନାହିଁ l ଯାହାର ଜ୍ୱଳନ୍ତ ଉଦାହରଣ କାକଟପୁର, ଅସ୍ତରଙ୍ଗ ବ୍ଲକର ପ୍ରାଚୀ-ନଟରା ପାନୀୟ ଜଳ ପ୍ରକଳ୍ପ କାର୍ଯ୍ୟରେ ଦେଖିବାକୁ ମିଳିଛି। କାକଟପୁର ମୂଳାଗଡ଼ ଛକଠାରେ ଥିବା ଜଳବିଶୋଧନ କେନ୍ଦ୍ରରୁ ଅସ୍ତରଙ୍ଗ ବ୍ଲକ ଛୁରିଆନା ପଞ୍ଚାୟତର ରାଇବେରୁହାଁ ଓ ରାଇକଣା ଗ୍ରାମର ଭୂତଳ ଜଳ ଲବଣାସକ୍ତ ଥିବାରୁ ପାଇପ ଯୋଗେ ପାନୀୟ ଜଳ ଯୋଗାଇ ଦିଆଯାଇଥିଲା। ପ୍ରକଳ୍ପ ଅଳ୍ପ କେଇମାସ କାର୍ଯ୍ୟ କରିବା ପରେ ପାଇପରେ ପାଣି ନ ଯିବାରୁ ଛେଳିଗୁହାଳିଠାରେ ଲକ୍ଷାଧିକ ଟଙ୍କା ବ୍ୟୟରେ ଏକ ପମ୍ପହାଉସ ନିର୍ମାଣ କରାଗଲା। ମାତ୍ର ତାହା ବି କିଛିଦିନ ପରେ ଅଚଳ ହୋଇଗଲା। ସ୍ଥାନୀୟ ଲୋକ କୁହନ୍ତି ନିମ୍ନମାନର କାର୍ଯ୍ୟ ଓ ଶସ୍ତା ପାଇପ ବିଛା ଯୋଗୁ ନିର୍ମାଣର ଅଳ୍ପ କେଇ ମାସ ପରେ ଷ୍ଟାଣ୍ଡପୋଷ୍ଟଗୁଡିକ ଭାଙ୍ଗି ଯିବା ସହ ବିଛାଯାଇଥିବା ପାଇପ ନଷ୍ଟ ହୋଇଯିବାରୁ ଦୀର୍ଘଦିନ ହେବ ଉପରୋକ୍ତ ୨ଟି ଗ୍ରାମର ଲୋକ ପାନୀୟ ଜଳ ପାଇଁ ହଇରାଣ ହେଉଛନ୍ତି। ମରାମତି ବାବଦରେ ଲକ୍ଷ ଲକ୍ଷ ଟଙ୍କା ଠିକାଦାର ମାଧ୍ୟମରେ ବିଭାଗୀୟ ଅଧିକାରୀମାନେ ହଡପ କରିଥିବା ଏହି ବିଭାଗର କେତେକ କର୍ମଚାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି। ଉପରୋକ୍ତ ୨ଟି ଗ୍ରାମରେ ୨ଟି ସରକାରୀ ନଳକୂପ ବସିଥିଲେ ମଧ୍ୟ ସେଥିରୁ ଲୁହାଗୁଣ୍ଡ ପାଣି ବାହାରୁଛି। ଏପରିକି ଏହି ୨ ଗ୍ରାମର ଅଧିକାଂଶ ନଳକୂପରୁ ଲୁଣି ଓ ଆଇରନ ପାଣି ବାହାରୁଛି। ପାଇପ୍ ଯୋଗେ ପାନୀୟ ଜଳ ନ ଆସୁଥିବାରୁ ଲୋକେ ବାଧ୍ୟ ହୋଇ ଏହି ଜଳକୁ ବ୍ୟବହାର କରୁଛନ୍ତି। ଏହାଦ୍ୱାରା ଗ୍ରାମବାସୀ ନାନା ରୋଗର ଶିକାର ହେବା ନେଇ ଆଶଙ୍କା ରହିଛି। ତେଣୁ ଏହି ଦୁଇଟି ଗ୍ରାମରେ ପାନୀୟ ଜଳ ସମସ୍ୟାକୁ ତୁରନ୍ତ ଦୂର କରିବା ସହିତ ନଟରା ପାନୀୟ ଜଳ ପ୍ରକଳ୍ପରେ କାର୍ଯ୍ୟକୁ ପ୍ରଶାସନ ପକ୍ଷରୁ ତଦନ୍ତ କରିବାକୁ ସାଧାରଣରେରେ ଦୃଢ ଦାବି ହେଉଛି।
