ଭୁବନେଶ୍ୱର,୨୦।୧୨(ବ୍ୟୁରୋ)-ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ଉତ୍କଳ ବିଶ୍ୱବିଦ୍ୟାଳୟ ପ୍ରାଣୀ ବିଜ୍ଞାନ ବିଭାଗର ବରିଷ୍ଠ ସହକାରୀ ଅଧିକାରୀ ଅଶୋକ କୁମାର ମିଶ୍ରଙ୍କୁ କଟକସ୍ଥିତ ଭିଜିଲାନ୍ସ କାର୍ଯ୍ୟାଳୟରେ ପଚରାଉଚରା କରାଯାଇଥିଲା। ରବିବାର ତାଙ୍କୁ ଭୁବନେଶ୍ୱରସ୍ଥିତ ସ୍ବତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯାଇଥିଲା। ଜାମିନ ଆବେଦନ ଖାରଜ ହୋଇଯିବାରୁ ତାଙ୍କୁ ଝାରପଡ଼ା ସ୍ବତନ୍ତ୍ର କାରାଗାରକୁ ପଠାଇ ଦିଆଯାଇଛି। ଆସନ୍ତା ୨ ତାରିଖ ପର୍ଯ୍ୟନ୍ତ ସେ ସେଠାରେ ବିଚାର ବିଭାଗୀୟ ହାଜତରେ ରହିବେ।
ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ କୋର୍ଟଙ୍କ ପକ୍ଷରୁ ଜାରି ସର୍ଚ୍ଚ ଓ୍ବାରେଣ୍ଟକୁ ଭିତ୍ତି କରି ଶନିବାର ଭିଜିଲାନ୍ସ ଟିମ୍ ଅଶୋକଙ୍କ ମଞ୍ଚେଶ୍ୱରସ୍ଥିତ ୨ମହଲା କୋଠା, ପଟିଆ ପ୍ରଶାନ୍ତ ବିହାରସ୍ଥିତ ୨ ମହଲା କୋଠା, ବାଣୀବିହାର କ୍ୟାମ୍ପସସ୍ଥିତ ସରକାରୀ କ୍ୱାର୍ଟର, ସାଲେପୁର ଥାନା ଅନ୍ତର୍ଗତ ଦୁର୍ଗାପୁରସ୍ଥିତ ପୈତୃକ ବାସଭବନ, ବାଣୀବିହାର ଡିଡିସିଇରେ ଥିବା ସରକାରୀ କାର୍ଯ୍ୟାଳୟରେ ଭିଜିଲାନ୍ସ ଅଧିକାରୀମାନେ ଏକକାଳୀନ ଚଢ଼ାଉ କରିଥିଲେ। ଯାଞ୍ଚବେଳେ ଅଶୋକଙ୍କ ନିକଟରୁ ୧ କୋଟି ୩୮ଲକ୍ଷ ୨୭ ହଜାର ୭୫୫ ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଥିଲା। ଏସବୁ ସମ୍ପତ୍ତି ଅଶୋକ ଓ ତାଙ୍କ ପରିବାର ଲୋକଙ୍କ ନାମରେ ରହିଥିବାବେଳେ ଆୟ ବହିର୍ଭୂତ ସମ୍ପତ୍ତି ପରିମାଣ ଜାଣିବା ପାଇଁ ଭିଜିଲାନ୍ସ ତଦନ୍ତ ଚଳାଇଛି।
