ଭଦ୍ରକ ଅଫିସ/ଚାନ୍ଦବାଲି, ୩୦।୪ (ଡି.ଏନ.ଏ.)- ଜଣେ ଅଭିଯୁକ୍ତଙ୍କୁ ଖସାଇ ଦେବା ପାଇଁ ଚିଙ୍ଗୁଡ଼ି ସହ ୫ ହଜାର ଟଙ୍କା ଲାଞ୍ଚ ମାଗିବା ଅଭିଯୋଗରେ ଭଦ୍ରକ ଜିଲା ଚାନ୍ଦବାଲି ଥାନା ଏଏସ୍ଆଇ ହରେକୃଷ୍ଣ ପାଢ଼ୀ ନିଲମ୍ବିତ ହୋଇଛନ୍ତି। ଏଏସ୍ଆଇ ପାଢ଼ୀ ଏଭଳି ଲାଞ୍ଚ ମାଗୁଥିବାର ଅଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଚାନ୍ଦବାଲି ଏସ୍ଡିପିଓ ଉମାଶଙ୍କର ମହାରଣା ଘଟଣାର ତଦନ୍ତ କରିବାରୁ ଏହି ଅଡିଓର ସତ୍ୟତା ଜଣାପଡ଼ିଥିଲା। ୨୦୧୮ର ଚାନ୍ଦବାଲି ଥାନା ଅଧୀନ ତେନ୍ତୁଲିଡିହି ପଞ୍ଚାୟତର ଏକ ମାମଲାରେ ସମ୍ପୃକ୍ତ ଅଭିଯୁକ୍ତଙ୍କୁ ଖସାଇଦେବା ତଥା ମାମଲାକୁ ରଫାଦଫା କରିବା ଲାଗି ଏଏସ୍ଆଇ ପାଢ଼ୀ ଲାଞ୍ଚ ମାଗିଥିଲେ। ଏହି ଘଟଣାରେ କାର୍ଯ୍ୟାନୁଷ୍ଠାନ ନେଇ ଏସ୍ପି ଚରଣ ସିଂ ମୀନା ଗୁରୁବାର ତାଙ୍କୁ ନିଲମ୍ବନ କରିଥିବା ସୂଚନା ଦିଆଯାଇଛି।
