କୋଟପାଡ଼,୨୮ା୮(ଡି.ଏନ.ଏ.): କୋରାପୁଟ ଜ଼ିଲା କୋଟପାଡ଼ ସହରରେ ଥିବା ଦେବାନମୁଣ୍ଡା ପୋଖରୀରେ ଜାତୀୟ ରାଜପଥ(ଏନ୍ଏଚ୍) ବିଭାଗ ଡ୍ରେନ୍ପାଣି ସଂଯୋଗ କରିଥିବାରୁ ପୋଖରୀ ପାଣି ଦୂଷିତ ହେବାରେ ଲାଗିଛି। ଏହି ପୋଖରୀ ଉପରେ ସହରର ୪ଟି ୱାର୍ଡର ଜନସାଧାରଣ ନିର୍ଭର କରନ୍ତି। ପରବର୍ତ୍ତୀ ସମୟରେ ଉକ୍ତ ପୋଖରୀକୁ ବିଜ୍ଞାପିତ ଅଞ୍ଚଳ ପରିଷଦ ମାଛଚାଷ ସକାଶେ ନିଲାମକରି ଅର୍ଥ ଆଦାୟ କରୁଥିଲା। ପୋଖରୀର ରକ୍ଷଣାବେକ୍ଷଣ ମଧ୍ୟ କରୁଥିଲା। ଗତ କିଛି ବର୍ଷ ହେବ ଉକ୍ତ ପୋଖରୀକୁ ଜାତୀୟ ରାଜପଥ ପାର୍ଶ୍ୱର ଡ୍ରେନ୍ ସହ ସହରର ଡ୍ରେନ୍ ପାଣି ସଂଯୋଗ ହୋଇ ପୋଖରୀ ମଧ୍ୟକୁ ପଶୁଛି। ଫଳରେ ପୋଖରୀ ପାଣି ଦୂଷିତ ହେବାରେ ଲାଗିଛି। ଏନେଇ ଜନସାଧାରଣ ପରିଷଦର ଦୃଷ୍ଟି ଆକର୍ଷଣ କରିବା ସହ ଜାତୀୟ ରାଜପଥ ଅଧିକାରୀଙ୍କୁ ଜଣାଇଥିଲେ। ଜାତୀୟ ରାଜପଥ ବିଭାଗ ପୋଖରୀରେ ଡ୍ରେନ୍ ପାଣି ନ ପଶିବା ଲାଗି ଏକ ନାଳ କରିଥିଲେ ମଧ୍ୟ ଏହା ଠିକ୍ ରୂପେ ହୋଇ ନ ଥିବାରୁ ସହରର ଡ୍ରେନ୍ ପାଣି ପୂର୍ବପରି ପୋଖରୀ ମଧ୍ୟରେ ପଶୁଛି। ଏବେ ପୋଖରୀ ପଙ୍କରେ ପୋତି ହୋଇଗଲାଣି। ଏହାର ପୁନରୁଦ୍ଧାର ସକାଶେ ଲୋକେ ବାରମ୍ବାର ପରିଷଦ ଓ ଜିଲା ପ୍ରଶାସନକୁ ଜଣାଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଇନାହିଁ। କେବଳ ମାଷ୍ଟର ପ୍ଲାନ୍ ହୋଇଛି କହି ପ୍ରଶାସନ ଭୁଆଁ ବୁଲାଉଛି। ଅନ୍ୟପକ୍ଷରେ ପ୍ରଶାସନ ନ ଶୁଣିବାରୁ କୋଟପାଡ଼ ବିଜୁ ଯୁବବାହିନୀ ଓ ଯୁବ ଛାତ୍ର ଏକତ୍ରିତ ହୋଇ ପୋଖରୀର ପୁନରୁଦ୍ଧାର କାର୍ଯ୍ୟ ହାତକୁ ନେଇଛନ୍ତି। ୪ ଦିନ ହେଲା ପୋଖରୀରୁ ପଙ୍କ କାଢ଼ି ଏହାର ଚାରିପାର୍ଶ୍ୱ ସଫା କରୁଛନ୍ତି। କୋଟପାଡ଼ ବିଜୁ ଜନତା ଦଳର ନଗର ସଭାପତି ସୁଧୀର ଚନ୍ଦ୍ର ମହାନ୍ତିଙ୍କ ତତ୍ତ୍ୱାବଧାନରେ ଶିବ ପଟ୍ଟନାୟକ, ସୁରେନ୍ଦ୍ର ପାଢ଼ୀ, ବିକ୍ରମ ମାଝି, ଓମ୍ପ୍ରକାଶ ଦଳେଇ, ସାଗର ପାତ୍ର, ଅନିଲ ପରିଡ଼ା, ତପନ ମହାନ୍ତି, ଅଜୟ ମାଦଳା ପ୍ରମୁଖ ସଫେଇ କାର୍ଯ୍ୟରେ ସାମିଲ ହୋଇଛନ୍ତି।
