ବାହରିଚ୍ ୩ା୮(ପି.ଟି.): ନେପାଳ ଏହାର ତିନୋଟି ବ୍ୟାରେଜରୁ ନଦୀକୁ ଜଳ ଛାଡ଼ିଦେବାରୁ ରବିବାର ଉତ୍ତରପ୍ରଦେଶ ବାହରିଚ୍ ଜିଲାସ୍ଥିତ ୬୧ଟି ଗାଁ ଜଳମଗ୍ନ ହୋଇଯାଇଛି। ଦେଢ଼ ଲକ୍ଷରୁ ଊର୍ଦ୍ଧ୍ୱ ଲୋକ ବନ୍ୟାରେ ପ୍ରଭାବିତ ହୋଇଥିବାବେଳେ ୧୭୧ ଘର କ୍ଷତିଗ୍ରସ୍ତ ହୋଇଛି। ଘାଘରା ନଦୀରେ ବୁଡ଼ିଯାଇ ୩ ଜଣ ପ୍ରାଣ ହରାଇଛନ୍ତି।
ଭାରତ ଉପରେ ଦାଉ ସାଧୁଛି ପଡ଼ୋଶୀ ନେପାଳ। ଉତ୍ତରାଖଣ୍ଡର ୩ଟି ଅଞ୍ଚଳକୁ ନିଜର ବୋଲି ଦାବି କରିବା ପରେ ନେପାଳ ୩ ଆନିକଟରୁ ଲକ୍ଷ ଲକ୍ଷ କ୍ୟୁସେକ୍ ପାଣି ଛାଡ଼ିଦେଇଛି। ଫଳରେ ଘାଘରା ନଦୀରେ ପ୍ରବଳ ବନ୍ୟା ଆସିଛି। କାଇସରଗଞ୍ଜ, ମହସି ଓ ମିହିପୂର୍ବା ତହସିଲର ୧.୫୦ ଲକ୍ଷରୁ ଊର୍ଦ୍ଧ୍ୱ ଲୋକ ଏଥିରେ ପ୍ରଭାବିତ ହୋଇଛନ୍ତି। ଉଦ୍ଧାର କାର୍ଯ୍ୟରେ ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନ୍ଡିଆର୍ଏଫ୍)କୁ ନିୟୋଜିତ କରାଯାଇଛି। ପ୍ରଭାବିତ ଲୋକଙ୍କୁ ଥଇଥାନ ପାଇଁ ୨୩ଟି ବନ୍ୟା ଆଶ୍ରୟସ୍ଥଳୀ ନିର୍ମାଣ କରାଯାଇଛି। କ୍ଷତିଗ୍ରସ୍ତ ଲୋକଙ୍କୁ ପ୍ରଶାସନ ପକ୍ଷରୁ ରିଲିଫ ସହାୟତା ଯୋଗାଇ ଦିଆଯାଇଛି। ରିଲିଫ କାର୍ଯ୍ୟକୁ ତ୍ୱରାନ୍ବିତ କରି ଲୋକଙ୍କୁ ଚିକିତ୍ସା ସହାୟତା ଉପଲବ୍ଧ କରାଇବା ସକାଶେ ୪୮ ମେଡିକାଲ ଟିମ୍ ପଠାଯାଇଛି। ବନ୍ୟାଜଳରେ ଭାସିଯାଇ ପ୍ରମେଶ(୧୬), ସନ୍ତୋଷ(୧୪) ଓ ରାମ ସନଭାରେ(୩୫)ଙ୍କ ମୃତ୍ୟୁ ଘଟିଛି। ସେମାନଙ୍କ ମୃତଦେହଗୁଡ଼ିକୁ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
