ପାଟଣା,୧୦ା୨(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଓ ସାହାରପଡ଼ା ତହସିଲ ଦେଇ ପ୍ରବାହିତ ବୈତରଣୀ, କଞ୍ଝାରି, ଦେଓ ନଦୀରେ ଥିବା ଲିଜ୍ ବାଲି ଉତ୍ସ ସହ ଘାଟ ଓ ବିଭିନ୍ନ ନାଳରୁ ବେଧଡ଼କ ଭାବେ ବାଲି ଉତ୍ତୋଲନ କରାଯାଉଛି। ଲଘୁ ଖଣିଜ ଆଇନକୁ ଉଲ୍ଲଂଘନ କରି ଚୋରା ଡମ୍ପ କରି ଜିଲାର ବିଭିନ୍ନ ଅଞ୍ଚଳକୁ ବାଲି ଚୋରାଚାଲାଣ ହେଉଛି। ଚୋରାଚାଲାଣକାରୀ ମାଲା ମାଲ ହେଉଥିବା ବେଳେ ସରକାରଙ୍କ ବିପୁଳ ରାଜସ୍ବହାନି ଘଟୁଛି। ବେଆଇନ ଭାବେ ମୋଟର ବୋଟ୍ ମାଧ୍ୟମରେ ବାଲି ଉତ୍ତୋଳନ ସହ ନଦୀ ମଝିରେ କୃତ୍ରିମ ମାଟି ରାସ୍ତା ନିର୍ମାଣ କରି ଭାରିଯାନରେ ବାଲିଚାଲାଣ ହେଉଛି। ଫଳରେ ନଦୀ ଶଯ୍ୟା ପୋତି ହୋଇପଡୁଛି।
ପାଟଣା ତହସିଲ ଅନ୍ତର୍ଗତ ବୈତରଣୀ ନଦୀର ତୁରୁମୁଙ୍ଗାଠାରୁ ତଣ୍ଡ ପର୍ଯ୍ୟନ୍ତ ବିସ୍ତୀର୍ଣ୍ଣ ବାଲି ଉତ୍ସରେ ବାଲିଚାଲାଣକାରୀଙ୍କ ଲୋଲୁପଦୃଷ୍ଟି ପଡ଼ିଛି। ଏହି ତହସିଲ ଟାଙ୍ଗରପଡ଼ା ଆର୍ଆଇ ସର୍କଲ ଅନ୍ତର୍ଗତ କଞ୍ଝାରି ନଦୀର ଅଙ୍କୁରାଘାଟରେ ଗତ କିଛି ମାସ ହେବ ରାତି ସମୟରେ ବେଧଡ଼କ ବାଲି ଉତ୍ତୋଳନ ହେଉଛି। ଲିଜ୍ ନ ଥିବା ଅଙ୍କୁରାର ଏହି ଘାଟରେ ପୋକ୍ଲିନ ମେଶିନ ଲଗାଇ ଶହେରୁ ଊର୍ଦ୍ଧ୍ୱ ଟ୍ରିପ୍ ବାଲି ଉଠାଇ ଚୋରାଚାଲାଣ କରାଯାଉଛି। ବାଲିଚାଲାଣକାରୀ ନଦୀ ମଝିରେ ମେଶିନ ଓ ହାଇୱା ଚଳାଚଳ ପାଇଁ ମାଟି ପକାଇ ପ୍ରଶସ୍ତ କୃତ୍ରିମରାସ୍ତା ନିର୍ମାଣ କରିଛନ୍ତି। ଅନ୍ୟପକ୍ଷେ ଲିଜ୍ଧାରୀ ଲିଜ୍ ଘାଟରୁ ବାଲି ନ ଉଠାଉ ନଦୀ ଗର୍ଭକୁ ଯାଇ ଡଙ୍ଗା ଲଗାଇ ବାଲି ଉଠାଉଛନ୍ତି। ଫଳରେ ନଦୀ ପାଣି ପ୍ରଦୂଷିତ ହେବା ସହ ପ୍ରକୃତି ଓ ପରିବେଶ ଦୂଷିତ ହେଉଥିବା ପରିବେଶବିତ ଓ ବୁଦ୍ଧିଜୀବୀମାନେ ଅଭିଯୋଗ କରିଛନ୍ତି। ନଦୀ ମଧ୍ୟରେ ଛୋଟ ଛୋଟ ହ୍ରଦ ସୃଷ୍ଟି ହେଉଛି। ଏନେଇ ପାଟଣା ତହସିଲଦାର ତାପସ ରଞ୍ଜନ ଦେହୁରୀ କହିଛନ୍ତି, ଖବର ପାଇ ଅତିରିକ୍ତ ତହସିଲଦାର ସରଣ ଜେନା ଓ ଏନ୍ଫୋର୍ସମେଣ୍ଟ ଟିମ୍ ସହ ଅଙ୍କୁରା ବାଲି ଘାଟରେ ଚଢ଼ାଉ କରିଥିଲେ। ବାଲି ଚୋରାଚାଲାଣକାରୀ ନଦୀର ବିପରୀତ ପାର୍ଶ୍ୱ ଦେଇ ଗାଡ଼ି ସହ ଫେରାର ହୋଇଯାଇଥିଲେ। ବିଭିନ୍ନ ସମୟରେ ପାଟଣା ତହସିଲ ଅଞ୍ଚଳରେ ଏନ୍ଫୋର୍ସମେଣ୍ଟ ଟିମ୍ ବ୍ୟାପକ ଚଢ଼ାଉକରି ଜରିମାନା ଆଦାୟ କରୁଛି ବୋଲି ସେ କହିଥିଲେ।
