ଭୁବନେଶ୍ୱର,୧୬।୧୨(ବ୍ୟୁରୋ):ରାଜ୍ୟ ରାଜନୀତିରେ ହଟଚମଟ ସୃଷ୍ଟି କରିଥିବା ଅର୍ଚ୍ଚନା ନାଗ ମାମଲା ପାର୍ଲାମେଣ୍ଟରେ ଉଠିଛି। ଭାଜପା ଏମ୍ପି ସୁରେଶ ପୂଜାରୀ ଗୁରୁବାର ଏହି ପ୍ରସଙ୍ଗ ଉଠାଇଛନ୍ତି। ରାଜ୍ୟରେ ଚାଞ୍ଚଲ୍ୟ ଖେଳାଇଥିବା ଏହି ମାମଲାରେ ଅନେକ ବଡ଼ ବଡ଼ ନେତା, ଅଫିସର, ବ୍ୟବସାୟୀ, ଫିଲ୍ମ ପ୍ରଯୋଜକଙ୍କ ନଁା ସାମ୍ନାକୁ ଆସିଛି। ଏହାର ସିବିଆଇ ତଦନ୍ତ ହେଉ ବୋଲି ସେ ଦାବି କରିଛନ୍ତି।
କହିଛନ୍ତି, ଅର୍ଚ୍ଚନା ନାଗ ସେକ୍ସ ସ୍କାଣ୍ଡାଲ ଓ ହନିଟ୍ରାପ୍ ଘଟଣା ଓଡ଼ିଶାବାସୀଙ୍କୁ ବିଚଳିତ କରିଛିି। ଏହି ଘଟଣାରେ ବଡ଼ ବଡ଼ ରାଜନେତା, ମନ୍ତ୍ରୀ, ନିର୍ବାଚିତ ପ୍ରତିନିଧି, ବଡ଼ ବଡ଼ ବେପାରୀ, ସିନେମା ପ୍ରଯୋଜକ, ସରକାରୀ ଅଧିକାରୀ ଓ ପୋଲିସ ଅଧିକାରୀମାନେ ସମ୍ପୃକ୍ତ ଥିବା ଅଭିଯୋଗ ରହିଛି। ସିଷ୍ଟମ୍କୁ ଚଲାଉଥିବା ସମସ୍ତ ବ୍ୟକ୍ତି ବର୍ତ୍ତମାନ କାଠଗଡ଼ାରେ। ହନିଟ୍ରାପ୍ ଜରିଆରେ ଲୋକଙ୍କୁ ଫସାଇବା, ଲୋକଙ୍କୁ ଫସାଇବା ପରେ ତା’ର ଭିଡିଓ ଶୁଟିଂ କରିବା, ଭିଡିଓ ଶୁଟିଂ କଲା ପରେ ବ୍ଲାକ୍ମେଲିଂ କରି ଅର୍ଚ୍ଚନା ଯେଉଁ ଅର୍ଥ ଉପାର୍ଜନ କରୁଥିଲେ ଏବଂ ଯେଉଁମାନେ ଦେଉଥିଲେ, ସେମାନେ ଏ ବିପୁଳ ଟଙ୍କା ଆଣିଲେ କେଉଁଠୁ। ଉପାର୍ଜନର ଉତ୍ସ କ’ଣ ଥିଲା। ଅନ୍ୟପଟେ ତଦନ୍ତକାରୀ ସଂସ୍ଥା ଇଡି କେବଳ ଅର୍ଥ କାରବାର ପ୍ରସଙ୍ଗରେ ଯାଞ୍ଚ କରିବ। କିନ୍ତୁ ରାଜ୍ୟର ସବୁଠୁ ବଡ଼ ସେକ୍ସ ସ୍କାଣ୍ଡାଲରେ ସମ୍ପୃକ୍ତ ଥିବା ରାଜନେତା, ମନ୍ତ୍ରୀ, ନିର୍ବାଚିତ ପ୍ରତିନିଧି, ବଡ଼ ବଡ଼ ବେପାରୀ, ସିନେମା ପ୍ରଯୋଜକ, ସରକାରୀ ଅଧିକାରୀ ଓ ପୋଲିସ ଅଧିକାରୀମାନେ ଖସିଯିବାର ଆଶଙ୍କା ପ୍ରକାଶ ପାଇଛି। ଏହି ଘଟଣାର ତଦନ୍ତ ପ୍ରଥମେ ରାଜ୍ୟ ପୋଲିସ କରୁଥିଲା ଏବଂ ବର୍ତ୍ତମାନ ଏହାର ତଦନ୍ତ ଭାର ଇଡି ଉପରେ ନ୍ୟସ୍ତ। ପ୍ରଭାବଶାଳୀ ଲୋକମାନେ ସମ୍ପୃକ୍ତ ଥିବା କାରଣରୁ ତଦନ୍ତ ବାଟବଣା ହେବାର ଯଥେଷ୍ଟ ଆଶଙ୍କା ରହିଛି।
ଏବଂ ଠିକ୍ ତଦନ୍ତ ନ ହେଲେ ସତ୍ୟ ସାମ୍ନାକୁ ଆସିବ ନାହିଁ। ଏପରି କି ଘଟଣାର ମୁଖ୍ୟ ଅଭିଯୁକ୍ତ ଅର୍ଚ୍ଚନା ନାଗ, ତାଙ୍କର ସମସ୍ତ ସହଯୋଗୀ ଏବଂ ସଂପୃକ୍ତ ଥିବା ସମସ୍ତ ଅଭିଯୁକ୍ତଙ୍କ ଲାଏ ଡିଟେକ୍ଶନ ଟେଷ୍ଟ ହେବାର ମଧ୍ୟ ଜରୁରୀ ରହିଛି। ଯେଉଁମାନେ ରାଜନେତାର ମୁଖା ପିନ୍ଧି ଏଭଳି ଅପକର୍ମ କରୁଥିଲେ ସେମାନଙ୍କ ନାମ ମଧ୍ୟ ଜନସାଧାରଣଙ୍କ ସମ୍ମୁଖରେ ନିହାତି ଉପସ୍ଥାପନ ହେବା କଥା। ଏଭଳି ଜଟିଳ କେସ୍ ସିବିଆଇ ଦ୍ୱାରା ତଦନ୍ତ କରାଯାଉ। ତଦନ୍ତ ପ୍ରକ୍ରିୟା ବିଳମ୍ବ ହେବାର ଆଶଙ୍କା ପ୍ରକାଶ ପାଉଥିବାରୁ ସମଗ୍ର ଘଟଣାକୁ ଫାଷ୍ଟଟ୍ରାକ୍ କୋର୍ଟ ଜରିଆରେ ଶୁଣାଣି କରାଯାଉ ବୋଲି ପୂଜାରୀ ଦାବି କରିଛନ୍ତି।
