ଯୋଡ଼ା,୪ା୪(ମାନସ ମହାନ୍ତି)କେନ୍ଦୁଝର ଜିଲା ଯୋଡ଼ା ଖଣି ମଣ୍ଡଳ ତଥା ଚମ୍ପୁଆ ରେଞ୍ଜ ଅଧୀନରେ ଥିବା ଇଙ୍ଗାଣିଝରଣ ଖଣିରେ ବନାଞ୍ଚଳ ରାସ୍ତାରେ ଖଣିଜ ପରିବହନ ହେଉଛି। ଏ ନେଇ ଅଭିଯୋଗ ପରେ ବନ ବିଭାଗ ଉକ୍ତ ରାସ୍ତାକୁ ଖୋଳି ଦେଇଥିଲା। ମାତ୍ର କିଛି ଦିନ ପରେ ପୁଣି ଖାଲ ପୋତାଯାଇ ଖଣିଜ ପରିବହନ ହେଉଥିବା ଦେଖାଯାଇଛି। ଏ ସମ୍ପର୍କରେ ସ୍ଥାନୀୟ ୧୩ ନମ୍ବର ୱାର୍ଡ କାଉନ୍ସିଲର ଦୀପ୍ତିରଞ୍ଜନ ବେହେରା, ଖୁଣ୍ଟପାଣି ଅଞ୍ଚଳର ଚର୍ଚ୍ଚିଲ ମହାକୁଡ ତଥା ଗ୍ରାମବାସୀ ଲିଖିତ ଭାବେ ବନ ବିଭାଗକୁ ଅବଗତ କରିଥିବା ପ୍ରକାଶ କରିଛନ୍ତି। ଫରେଷ୍ଟ ରାଇଟ ଆକ୍ଟ (ଏଫ୍ଆରଏ୍)ଅନୁଯାୟୀ, ଗ୍ରାମସଭା କରା ନ ଯାଇ ଏହାକୁ ବିଧିବଦ୍ଧ ଭାବେ ଖଣିଜ ପରିବହନ ପାଇଁ କିପରି ଅନୁମତି ଦିଆ ଯାଇଛି, ଏହାର ତଦନ୍ତ ଦାବି କରିଛନ୍ତି।
ସୂଚନା ଅନୁଯାୟୀ, ସମ୍ପୃକ୍ତ ଖଣି କମ୍ପାନୀ ଜଙ୍ଗଲ ଜମିରୁ ଗଛ କାଟି ରାସ୍ତା ନିର୍ମାଣ କରିଥିବା ଅଭିଯୋଗ ହୋଇଥିଲା। ମାର୍ଚ୍ଚ ୧୫ ତାରିଖରେ ବନାଞ୍ଚଳରେ ଥିବା ରାସ୍ତାଟିକୁ ଯୋଡ଼ା ବନପାଳ ଖୋଳି ଦେଇ ପରିବହନ ବନ୍ଦ କରିଥିଲା। ତେବେ ପୁଣି କିଛି ଦିନ ବ୍ୟବଧାନରେ ଖାଲ ପୋତାଯାଇ ଉକ୍ତ ରାସ୍ତା ଦେଇ ଖଣିଜ ପରିବହନ ଆରମ୍ଭ ହୋଇଥିଲା। ହସ୍ତଗତ ହୋଇଥିବା କେନ୍ଦୁଝର ଡିଏଫ୍ଓଙ୍କ ଚିଠି (ସଂଖ୍ୟା ୨୪୦୫/୬ ଏଫ – ମାଇନିଂ -୫୩/୨୦୦୪/୧୯ ମାର୍ଚ୍ଚ ୨୦୨୪)ରେ ବି.ସି ଦେବ ଇଙ୍ଗାଣୀଝରଣ ଖଣିକୁ ବନାଞ୍ଚଳରେ ଥିବା ଗ୍ରାମ୍ୟ ରାସ୍ତାକୁ ବ୍ୟବହାର କରି ଖଣିଜ ପରିବହନ ପାଇଁ ଅନୁମୋଦନ ଦିଆଯାଇଛି। ଚିଠିରେ ଉଲ୍ଲେଖ ଅଛି ଯେ, ବୈତରଣୀ (କ) ଏବଂ (ଖ) ସଂରକ୍ଷିତ ଜଙ୍ଗଲ ମଧ୍ୟରେ ୧.୭ କି.ମି. ରାସ୍ତା ରହିଛି। ଏହି ରାସ୍ତାକୁ ବ୍ୟବହାର କରିବା ପାଇଁ ଅସ୍ଥାୟୀ ଭାବେ ଅନୁମତି ଦିଆଯାଇଛି। ଏପରିକି ଏହାଦ୍ୱାରା ବନାଞ୍ଚଳରେ ଥିବା ଜୈବ ବିବିଧତା ଏବଂ ବନ୍ୟପ୍ରାଣୀ ଯେପରି ପ୍ରଭାବିତ ନ ହୁଅନ୍ତି, ଏଥିପ୍ରତି ଧ୍ୟାନ ଦେବାକୁ ଉଲ୍ଲେଖ ରହିଛି। ତେବେ ଡିଏଫ୍ଓଙ୍କ ନିର୍ଦ୍ଦେଶରେ ରାସ୍ତା ଖୋଳାଯାଇଥିଲା, ପୁଣି ଡିଏଫଓଙ୍କ ନିର୍ଦ୍ଦେଶରେ ଏହାକୁ ପୋତି ଖଣିଜ ପରିବହନ ପାଇଁ ଅନୁମତି କିପରି ଦିଆଗଲା ବୋଲି ସ୍ଥାନୀୟ ଅଞ୍ଚଳବାସୀ ପ୍ରଶ୍ନ କରିଛନ୍ତି। ପ୍ରକାଶ ଯେ, ଏହି ଖଣିରେ ଗଚ୍ଛିତ ଖଣିଜକୁ ବିକ୍ରି କରି, ବେଆଇନ ଖଣି ଖନନରେ ହୋଇଥିବା ଜରିମାନା ଅର୍ଥକୁ ପୈଠ କରିବା ପାଇଁ ୨୦୨୩ ଫେବୃଆରୀ ୨୭ରେ ସୁପ୍ରିମକୋର୍ଟ ୨,୭୭,୯୭୯ ମେଟ୍ରିକ ଟନ୍ ବିକ୍ରି କରିବା ପାଇଁ କମ୍ପାନୀକୁ ଅନୁମତି ଦେଇଛନ୍ତି। ତେବେ ଅତୀତରେ ଖଣି ଚାଲୁଥିବା ସମୟରେ ଖଣିଜ ପରିବହନ ମୁଖ୍ୟତଃ ଯୋଡା ୱାର୍ଡ ନଂ. ୭ ବାଚୁହଟିଂ ସାଇ ମନ୍ଦିର ରାସ୍ତା ଦେଇ ପରିବହନ ହେଉଥିଲା। ଏବେ ବନାଞ୍ଚଳ ରାସ୍ତାରେ ବିପୁଳ ପରିମାଣର ଖଣିଜ ପରିବହନ ହେଲେ ଜୈବ ବିବିଧତା ଓ ବନ୍ୟପ୍ରାଣୀଙ୍କୁୁ ପ୍ରଭାବିତ କରିବ ବୋଲି ପରିବେଶବିତ୍ ମତ ପୋଷଣ କରିଛନ୍ତି। ବନାଞ୍ଚଳ ଦେଇ ଖଣିଜ ପରିବହନ ଅନୁମୋଦନକୁ ବନ ବିଭାଗର ଅନୁକମ୍ପା ବୋଲି ସାଧାରଣରେ ଆଲୋଚନା ହେଉଛି। ଏନେଇ କେନ୍ଦୁଝର ଡିଏଫ୍ଓଙ୍କ ସହ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ମତାମତ ମିଳିପାରିନାହିଁ।
