ମସ୍କୋ,୧୬।୩: ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ବୁଧବାର ଆମେରିକା କଂଗ୍ରେସ କିମ୍ବା ସଂସଦର ଉଭୟ ଗୃହକୁ ସମ୍ବୋଧିତ କରିଛନ୍ତି। ଭିଡିଓ କନଫରେନ୍ସିଂ ମାଧ୍ୟମରେ ଜେଲେନସ୍କି ସିଧାସଳଖ ସହାୟତା ପାଇଁ ଆମେରିକାକୁ ନିବେଦନ କରିଛନ୍ତି। ୟୁକ୍ରେନକୁ ଏହି ସମୟରେ ଆମେରିକାର ଆବଶ୍ୟକତା ରହିଛି। ଜେଲେନସ୍କି ଆମେରିକାର ପର୍ଲ ହାରବର୍ ଏବଂ ସେପ୍ଟେମ୍ବର ୧୧, ୨୦୦୧(୯/୧୧) ଆକ୍ରମଣକୁ ମଧ୍ୟ ମନେ ପକାଇ ଦେଇଛନ୍ତି।
ଜେଲେନସ୍କି ତାଙ୍କ ଅଭିଭାଷଣରେ ସିଧାସଳଖ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ନାମ ରଖି କହିଛନ୍ତି, ତୁମେ ଏକ ମହାନ ରାଷ୍ଟ୍ରର ନେତା। ମୁଁ ଚାହେଁ ତୁମେ ସମଗ୍ର ବିଶ୍ୱର ଜଣେ ଶାନ୍ତିପ୍ରିୟ ନେତା ହୁଅ। ତାଙ୍କ ମନ୍ତବ୍ୟ ପରେ ସମସ୍ତ ଏମ୍ପି ଠିଆ ହୋଇ ଜେଲେନସ୍କିଙ୍କୁ ଅଭିବାଦନ ଜଣାଇଥିଲେ।
