ବମ୍ବେ: ହିନ୍ଦି ସିନେମାର ଶ୍ରେଷ୍ଠ ଗାୟିକାଙ୍କ ମଧ୍ୟରୁ ଅନୁରାଧା ପୌଡ଼ୁଆଲ ଜଣେ। ଏକ ସମୟରେ ତାଙ୍କ ତୁଳନା ଲତା ମଙ୍ଗେସକର ବୋଲି କୁହାଯାଉଥିଲା। ଏବେ ଦୀର୍ଘ ୧୨ ବର୍ଷ ଧରି ସେ ଗୀତ ଗାଇବାଠାରୁ ଦୂରେଇ ଯାଇଛନ୍ତି। ହେଲେ ଆଜି ବି ତାଙ୍କର ଗୀତ ଶୁଣିଲେ ମନ ଝୁମିଉଠେ। ବୁଧବାର ଗାୟିକା ନିଜର ୬୯ତମ ଜନ୍ମଦିବସ ପାଳନ କରୁଥିବା ବେଳେ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟୁଛି। ତେବେ ତାଙ୍କର ଏହି ଖାସ ଦିନରେ ଆସନ୍ତୁ ଜାଣିବା ଗାୟିକାଙ୍କ ବିଷୟରେ କିଛି ଜଣାଅଜଣା କଥା-
୧୯୯୧ରେ ଫିଲ୍ମ ‘ଦିଲ ହୈ କି ମାନତା ନେହି’ର ସମସ୍ତ ଗୀତ ଅନୁରାଧା ଗାଇଥିଲେ। ଏଥିପାଇଁ ତାଙ୍କୁ ସର୍ବଶ୍ରେଷ୍ଠ ମହିଳା ପାର୍ଶ୍ୱ ଗାୟିକାର ଫିଲ୍ମଫେୟାର ପୁରସ୍କାର ମିଳିଥିଲା। ହେଲେ ୧୯୭୩ରେ ସେ ନିଜର ଗାୟକ ଜୀବନ ଆରମ୍ଭ କରିଥିଲେ। ପରେ ୧୯୭୬ରେ ସୁଭାଷ ଘାଇଙ୍କ ଫିଲ୍ମ ‘କାଳୀଚରଣ’ରେ ତାଙ୍କୁ ବଡ଼ ବ୍ରେକ୍ ମିଳିଥିଲା। ସେବେଠାରୁ ସେ ପଛକୁ ଫେରି ଚାହିଁନାହାନ୍ତି। ବଲିଉଡ୍ ଏବଂ ଭଜନ ସହ ସେ ପଞ୍ଜାବୀ, ମରାଠୀ, ତାମିଲ, ତେଲୁଗୁ, ଓଡ଼ିଆ ଏବଂ ନେପାଳୀ ଭାଷାରେ ମଧ୍ୟ ଗୀତ ଗାଇଛନ୍ତି।
ଅନୁରାଧାଙ୍କ ପ୍ରକୃତ ନାମ ଅଳକା ନନ୍ଦକରନୀ। ସେ ଏସ୍ଡି ବର୍ମନଙ୍କ ଆସିଷ୍ଟାଣ୍ଟ ତଥା ମ୍ୟୁଜିକ୍ କମ୍ପୋଜର ଅରୁଣ ପୌଡ଼ୁଆଲଙ୍କୁ ବିବାହ କରିଥିଲେ। ତାଙ୍କର ଅସମୟରେ ନିଧନ ହୋଇଯାଇଥିଲା। ବିବାହ ପରେ ଗାୟିକା ନିଜ ନାମ ବଦଳାଇ ଅନୁରାଧା କରିଦେଇଥିଲେ। ୮୦ ଏବଂ ୯୦ ଦଶକରେ ଅନୁରାଧା ଜଣାଶୁଣା ନାମ ପାଲଟିଥିଲେ। ତାଙ୍କୁ ଶୁଣିବା ପରେ ଲତାଙ୍କ ସମୟ ଚାଲିଗଲା ବୋଲି ଅନେକ କହିଥିଲେ। ସେତେବେଳେ ଅନୁରାଧା କେବଳ ଟି-ସିରିଜର ସମକକ୍ଷ ଗୀତ ଗାଇବେ ବୋଲି କହିଥିଲେ। ୧୯୯୭ରେ ଗୁଲଶନ କୁମାରଙ୍କୁ ହତ୍ୟା କରିଦିଆଯାଇଥିଲା। ତାଙ୍କ ମୃତ୍ୟୁ ପରେ ଅନୁରାଧା ଫିଲ୍ମରେ ଗୀତ ଗାଇବା ଛାଡ଼ି ଦେଇଥିଲେ। ସେ କେବଳ ଭଜନ ଗାଇଥିଲେ।
