ମୁମ୍ବାଇ,୧୨ା୫: ସଚିନ ଓ୍ବାଜେ ଏନ୍ଆଇଏ କୋର୍ଟରେ ପୂର୍ବରୁ ଏକ ଚିଠି ଦାଖଲ କରିଥିଲେ। ଅନିଲ ଦେଶମୁଖ ମହାରାଷ୍ଟ୍ରର ଗୃହମନ୍ତ୍ରୀ ଥିବାବେଳେ ମାସକୁ ୧୦୦ କୋଟି ଟଙ୍କା ଅସୁଲି ପାଇଁ ତାଙ୍କ ଉପରେ ଚାପ ପକାଉଥିବା ନେଇ ମୁମ୍ବାଇ ପୋଲିସର ପୂର୍ବତନ କମିଶନର ପରମବୀର ସିଂ ଆଣିଥିବା ଅଭିଯୋଗ ସତ ବୋଲି ଏଥିରେ ସେ ଉଲ୍ଲେଖ କରିଥିଲେ। ଏହାସହ ଶିବସେନାର ପରିବହନ ମନ୍ତ୍ରୀ ଅନିଲ ପରବଙ୍କ ବିରୋଧରେ ମଧ୍ୟ ପତ୍ରରେ ଅଭିଯୋଗ ରହିଥିଲା। ମୁମ୍ବାଇ ପୋଲିସରେ ପୁନଃ ଅବସ୍ଥାପିତ କରିବା ଲାଗି ଦେଶମୁଖ ୨ କୋଟି ଟଙ୍କା ଦାବି କରିଥିବା ଓ୍ବାଜେ କହିଥିଲେ। ତେବେ ଏନ୍ଆଇଏ କୋର୍ଟ ଉକ୍ତ ପତ୍ରକୁ ଗ୍ରହଣ କରିନାହାନ୍ତି।
ଆଣ୍ଟିଲିଆ ମାମଲାରେ ନିଲମ୍ବିତ ଆସିଷ୍ଟାଣ୍ଟ ପୋଲିସ ସବ୍-ଇନ୍ସ୍ପେକ୍ଟର ସଚିନ ଓ୍ବାଜେଙ୍କୁ ମଙ୍ଗଳବାର ଚାକିରିରୁ ବରଖାସ୍ତ କରାଯାଇଛି। ମାର୍ଚ୍ଚ ୧୩ରେ ବିଶିଷ୍ଟ ଶିଳ୍ପପତି ମୁକେଶ ଅମ୍ବାନୀଙ୍କ ବାସଭବନ ଆଣ୍ଟିଲିଆ ବାହାରେ ବିସ୍ଫୋରକ ଭର୍ତ୍ତି ଏସ୍ୟୁଭି ମିଳିବା ଏବଂ ପରେ ଠାଣେ ବ୍ୟବସାୟୀ ମନ୍ସୁଖ ହିରେନ୍ ହତ୍ୟା ମାମଲାରେ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ସଚିନ ଓ୍ବାଜେଙ୍କୁ ଗିରଫ କରିଥିଲା। ତାଙ୍କୁ ପୋଲିସ ଚାକିରିରୁ ବରଖାସ୍ତ କରାଯାଇଥିବା ନେଇ ମୁମ୍ବାଇ ପୋଲିସ କମିଶନର ହେମନ୍ତ ନାଗ୍ରାଲେଙ୍କୁ ଜଣାଇଦିଆଯାଇଛି। ୧୯୯୦ ବ୍ୟାଚ୍ ମହାରାଷ୍ଟ୍ର କ୍ୟାଡର ଅଫିସର ସଚିନ ହିନ୍ଦୁରାଓ ଓ୍ବାଜେ ଜଣେ ବିସ୍ଫୋରଣକାରୀ ଅଭିଯୁକ୍ତଙ୍କ ହାଜତ ମୃତ୍ୟୁ ମାମଲାରେ ୧୬ ବର୍ଷ ନିଲମ୍ବିତ ହୋଇଥିଲେ। ୨୦୨୦ ଜୁନ୍ରେ ତାଙ୍କୁ ପୁନଃ ଅବସ୍ଥାପିତ କରାଯାଇଥିଲା।
ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମଙ୍ଗଳବାର ମନିଲଣ୍ଡରିଂ ମାମଲା ଦାଏର କରିଛି। ଦେଶମୁଖ ଅବାଞ୍ଛତ୍ତ ଅନୁଗ୍ରହ ପାଇଁ ନିଜ ପଦର ଅପବ୍ୟବହାର କରିଥିବା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) କହିଛି। ଏପରି କି ସେ ମୁମ୍ବାଇ ପୋଲିସର ଅଫିସରମାନଙ୍କ ପୋଷ୍ଟିଂ ଓ ବଦଳି ପାଇଁ କ୍ଷମତାର ଦୁରୁପଯୋଗ କରିଥିବା ପୂର୍ବତନ କମିଶନର ପରମବୀର ସିଂ ଅଭିଯୋଗ ଆଣିଥିଲେ। ଗତ ମାସରେ ସିବିଆଇ ପକ୍ଷରୁ ଦାଏର ମାମଲାକୁ ଭିତ୍ତିକରି ଇଡି ପକ୍ଷରୁ ଏନ୍ଫୋର୍ସମେଣ୍ଟ କେସ୍ ଇନ୍ଫର୍ମେଶନ ରିପୋର୍ଟ (ଇସିଆଇଆର୍) ଦାଖଲ କରାଯାଇଥିଲା। ଏହା ପୂର୍ବରୁ ପୂର୍ବତନ ଆସିଷ୍ଟାଣ୍ଟ ପୋଲିସ ଇନ୍ସ୍ପେକ୍ଟର ସଚିନ ଓ୍ବାଜେ ଗୃହମନ୍ତ୍ରୀଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଥିଲେ। ମୁମ୍ବାଇର ବାର୍ ଓ ରେଷ୍ଟୁରାଣ୍ଟଗୁଡ଼ିକରୁ ମାସକୁ ୧୦୦ କୋଟି ଟଙ୍କା ବଟି ଅସୁଲ କରି ଆଣିଦେବାକୁ ଚାପ ପକାଉଥିବା ଓ୍ବାଜେଙ୍କଠାରୁ ଶୁଣି ପରମବୀ ସିଂ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ ନିକଟକୁ ଲେଖିଥିବା ଚିଠିରେ ପ୍ରଘଟ କରିବା ପରେ ଚାଞ୍ଚଲ୍ୟ ସୃଷ୍ଟି ହୋଇଥିଲା। ଅନ୍ୟପକ୍ଷରେ କେନ୍ଦ୍ର ସରକାର କୋଭିଡ୍ ମହାମାରୀ ମୁକାବିଲାରେ ବିଫଳ ହୋଇଥିବାରୁ ସେଥିରୁ ଲୋକଙ୍କ ଧ୍ୟାନ ହଟାଇବା ପାଇଁ ଇଡି ଜରିଆରେ ଉପରୋକ୍ତ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ କାର୍ଯ୍ୟାନୁଷ୍ଠାନ ନେଇଥିବା ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ଏବଂ କଂଗ୍ରେସ ଅଭିଯୋଗ ଆଣିଛନ୍ତି।
