ଥୁଆମୂଳ ରାମପୁର, ୪।୮(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ରେ ଦାଦନ ଶ୍ରମିକ ନିଖୋଜ ସମସ୍ୟା ଦିନକୁ ଦିନ ଅଧିକ ଉଦ୍ବେଗଜନକ ରୂପ ନେଉଛି। ନିଜ ପରିବାରର ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ଦାବିରେ ମଙ୍ଗଳବାର ପରିବାରବର୍ଗ ଥୁଆମୂଳ ରାମପୁର ଥାନାର ଦ୍ୱାରସ୍ଥ ହୋଇ ଏକ ଲିଖିତ ଅଭିଯୋଗ ଦାଖଲ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ଥୁଆମୂଳ ଗ୍ରାମପଞ୍ଚାୟତ ଅନ୍ତର୍ଗତ ଆଡ଼ିଗୁଡ଼ା ଗ୍ରାମର ଘାସିରାମ ମାଝୀ (୩୦) ଗତ ମାସ ୩୦ ତାରିଖ ଦିନ ଗାଁର ଦୁଇ ଜଣ ସାଥୀ ବୀରେନ୍ଦ୍ର ମାଝୀ ଓ ସୁରେନ୍ଦ୍ର ମାଝୀଙ୍କ ସହ କେସିଙ୍ଗା ରେଳଷ୍ଟେସନରୁ କେରଳ ଅଭିମୁଖେ ଯାଇଥିଲେ। ସେମାନେ ଏର୍ଣ୍ଣାକୁଲମ୍ ଜିଲ୍ଲା କୋଚିସ୍ଥିତ “Sasi PDM Pappadam” ନାମକ ଏକ କମ୍ପାନୀରେ କାମ କରିବାକୁ ଯାଉଥିବା ବେଳେ, କେରଳର କୋଟାୟାମ୍ ଜିଲ୍ଲା ଅଞ୍ଚଳରେ ଘାସିରାମ ରହସ୍ୟଜନକ ଭାବେ ନିଖୋଜ ହୋଇଯାଇଥିବା ସନ୍ଦେହ କରାଯାଉଛି। ତେବେ ସାଙ୍ଗରେ ଯାଇଥିବା ଅନ୍ୟ ଦୁଇଜଣ ଶ୍ରମିକ ସୁରକ୍ଷିତ ଥିବା ଜଣାପଡ଼ିଛି।
ଘାସିରାମଙ୍କ ସ୍ତ୍ରୀ ସୁମିତ୍ରା ମାଝୀଙ୍କ ଅଭିଯୋଗ ମୁତାବକ, ଗତ ୧ ତାରିଖରେ ଘାସିରାମ କେରଳରେ ପହଞ୍ଚିଥିବା ନେଇ ଫୋନ୍ରେ ଜଣାଇଥିଲେ। କିନ୍ତୁ ପରବର୍ତ୍ତୀ ସମୟରେ ୪ ତାରିଖରେ ସାଥୀ ଶ୍ରମିକ ସୁରେନ୍ଦ୍ର ଫୋନ୍ କରି ଘାସିରାମ ନିଖୋଜ ଥିବା ଏବଂ କେହି ଜଣେ ତାଙ୍କୁ ଅଟକ ରଖି ୨,୦୦୦ ଟଙ୍କା ଫିରୋତି ମାଗୁଥିବା ନେଇ ସୂଚନା ଦେଇଥିଲେ। ଏହି ଖବର ପାଇବା ପରଠାରୁ ଘାସିରାମଙ୍କ ସ୍ତ୍ରୀ, ଛୋଟ ପୁଅ ଓ ପରିବାର ଲୋକେ ଗଭୀର ମାନସିକ ଚିନ୍ତାରେ ଦିନ କାଟୁଛନ୍ତି।
ଗୋଟିଏ ପରେ ଗୋଟିଏ ଦାଦନ ନିଖୋଜ ମାମଲା ସାମ୍ନାକୁ ଆସୁଥିବାରୁ ଓଡ଼ିଶା ସରକାର, ରାଜ୍ୟ ପୋଲିସ ଏବଂ କଳାହାଣ୍ଡି ଜିଲା ପ୍ରଶାସନର କାର୍ଯ୍ୟଦକ୍ଷତା ଉପରେ ଗୁରୁତର ପ୍ରଶ୍ନବାଚୀ ସୃଷ୍ଟି ହୋଇଛି। ରାଜ୍ୟରେ କାମଧନ୍ଦାର ଯଥେଷ୍ଟ ସୁଯୋଗ ସୃଷ୍ଟି କରାଯାଉଥିବା ନେଇ ସରକାର ଦାବି କରୁଥିବା ବେଳେ, କଳାହାଣ୍ଡିର ଗରିବ ଶ୍ରମିକମାନେ ନିଜ ଅଞ୍ଚଳରେ ଖଣିଖାଦାନ ଥାଇ ମଧ୍ୟ କାହିଁକି ବାହାର ରାଜ୍ୟକୁ ଯାଇ ଏପରି ବିପଦର ସମ୍ମୁଖୀନ ହେଉଛନ୍ତି, ତାହାକୁ ନେଇ ବୁଦ୍ଧିଜୀବୀ ମହଲରେ ପ୍ରଶ୍ନ ଉଠିଛି।
ପୂର୍ବରୁ ରଥ ଗୌଡ଼ ନିଖୋଜ ମାମଲାରେ ବର୍ଷେ ବିତିବାକୁ ବସିଥିଲେ ମଧ୍ୟ ପୋଲିସ ତାଙ୍କର କୌଣସି ସନ୍ଧାନ ପାଇପାରି ନାହିଁ। ସେହିପରି ସୁଦୂର କେରଳରେ ଓଡ଼ିଶାର ଶ୍ରମିକ ନିଖୋଜ ହେବା ଏବଂ ଫିରୋତି କଲ୍ ଆସିବା ସତ୍ତ୍ୱେ ଓଡ଼ିଶା ପୋଲିସର ଆନ୍ତଃରାଜ୍ୟ ସମନ୍ୱୟ ରକ୍ଷା କରିବାରେ ବିଫଳତା ପୋଲିସର ଅପାରଗତାକୁ ପଦାରେ ପକାଇଛି। ଆଜିର ଆଧୁନିକ ଟେକ୍ନୋଲୋଜି ଓ ସାଇବର ଯୁଗରେ ମୋବାଇଲ୍ ଲୋକେସନ୍ ଟ୍ରାକ୍ କରି ଶ୍ରମିକଙ୍କୁ ଉଦ୍ଧାର କରିବାରେ ବିଫଳ ହେବା ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତେଣୁ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ତୁରନ୍ତ ଏଥିରେ ହସ୍ତକ୍ଷେପ କରି ନିଖୋଜ ଘାସିରାମ ମାଝୀଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ପରିବାରବର୍ଗ ଓ ସ୍ଥାନୀୟ ଜନସାଧାରଣଙ୍କ ପକ୍ଷରୁ ଦୃଢ଼ ଦାବି ହୋଇଛି।
