ନୂଆଦିଲ୍ଲୀ/ମସ୍କାଟ,୧୧।୬: ଓମାନ ଉପକୂଳରେ ସାମୁଦ୍ରିକ ସୁରକ୍ଷାକୁ ନେଇ ଚିନ୍ତା ଜନକ ସ୍ଥିତି ସୃଷ୍ଟି ହୋଇଛି। ଓମାନ ତଟ ନିକଟରେ ‘ଏମଟି ଜଲବୀର’ (MT Jalveer) ନାମକ ଏକ ବାଣିଜ୍ୟିକ ଜାହାଜ ଉପରେ ଆକ୍ରମଣ ହୋଇଥିବା ସୂଚନା ମିଳିଛି। ଏହି ଜାହାଜରେ ଭାରତୀୟ ନାବିକମାନେ ଥିଲେ। ହର୍ମୁଜ୍ (Strait of Hormuz) ନିକଟରେ ଗତ ତିନି ଦିନ ମଧ୍ୟରେ ଭାରତୀୟ ନାବିକଙ୍କୁ ନେଇ ଯାଉଥିବା ଜାହାଜ ଉପରେ ଏହା ହେଉଛି ତୃତୀୟ ଆକ୍ରମଣ। ତେବେ ଏହି ନୂତନ ଆକ୍ରମଣରେ କେତେ କ୍ଷୟକ୍ଷତି କିମ୍ବା ହତାହତ ହୋଇଛନ୍ତି, ସେ ସମ୍ପର୍କରେ ତୁରନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ। ସରକାରୀ ଅଧିକାରୀମାନେ ପୂରା ସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି।
ଓମାନ ସ୍ଥିତ ଭାରତୀୟ ଦୂତାବାସ ପକ୍ଷରୁ କୁହାଯାଇଛି ଯେ, “ଓମାନର ଶିନାସ ବନ୍ଦର ନିକଟରେ ଏକ ବାଣିଜ୍ୟିକ ଜାହାଜ ସହ ଜଡ଼ିତ ଘଟଣା ବିଷୟରେ ଆମକୁ ସୂଚନା ମିଳିଛି। ଆମେ ପରିସ୍ଥିତି ଉପରେ ନଜର ରଖିଛୁ ଏବଂ ଅଧିକ ସୂଚନା ପାଇଁ ସ୍ଥାନୀୟ ପ୍ରଶାସନ ଓ ଅଧିକାରୀଙ୍କ ସହ ନିରନ୍ତର ଯୋଗାଯୋଗରେ ଅଛୁ।”
ଏହା ପୂର୍ବରୁ ଷ୍ଟ୍ରେଟ୍ ଅଫ୍ ହୋର୍ମୁଜ୍ରେ ଆମେରିକା ପକ୍ଷରୁ ହୋଇଥିବା ଆକ୍ରମଣରେ ଦୁଇ ଜଣ ଭାରତୀୟ ନାବିକଙ୍କର ମୃତ୍ୟୁ ଘଟିସାରିଛି ଏବଂ ଜଣେ ଚିଫ୍ ଇଞ୍ଜିନିୟର ଏବେ ମଧ୍ୟ ନିଖୋଜ ଅଛନ୍ତି। ‘ଫରୱାର୍ଡ ସିମ୍ୟାନ୍ ୟୁନିଅନ ଅଫ୍ ଇଣ୍ଡିଆ’ (FSUI) ଏହି ଦୁଃଖଦ ଖବରକୁ ନିଶ୍ଚିତ କରିଛି।
FSUI ର ମହାସଚିବ ମନୋଜ ଯାଦବ କହିଛନ୍ତି ଯେ, ଆମେରିକାର ଆକ୍ରମଣ ଯୋଗୁ ଜାହାଜର ଯୋଗାଯୋଗ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଥିଲା, ଯାହାଫଳରେ ଯୋଗାଯୋଗ କରିବା ଅସମ୍ଭବ ହୋଇଯାଇଥିଲା। ପ୍ରାପ୍ତ ସୂଚନା ଅନୁଯାୟୀ, ଆକ୍ରମଣର ଶିକାର ହୋଇଥିବା ତିନି ଜଣ ଭାରତୀୟ ନାବିକ ହିମାଚଳ ପ୍ରଦେଶ, ଦେବରିଆ (ଉତ୍ତର ପ୍ରଦେଶ) ଏବଂ ଆନ୍ଧ୍ର ପ୍ରଦେଶର ବୋଲି ଜଣାପଡ଼ିଛି।
ଓମାନ ଉପକୂଳରେ ବାରମ୍ବାର ବାଣିଜ୍ୟିକ ଜାହାଜଗୁଡ଼ିକୁ ଟାର୍ଗେଟ୍ କରାଯାଉଥିବାରୁ ଏହା ଆନ୍ତର୍ଜାତୀୟସ୍ତରରେ ଏବଂ ସାମୁଦ୍ରିକ ବ୍ୟାପାର କ୍ଷେତ୍ରରେ ତୀବ୍ର ଉତ୍ତେଜନା ସୃଷ୍ଟି କରିଛି।
