ବରଗଡ଼ ଅଫିସ,୨୪।୧୦: ବରଗଡ଼ ଜିଲା ବରଗଡ଼ ବ୍ଲକ ଅନ୍ତର୍ଗତ ସିମେଣ୍ଟ ନଗର ନିକଟ ସ୍କୁଲ ପଡାର ୭୦ ବର୍ଷୀୟ ବୃଦ୍ଧ ଜଳନ୍ଧର କଲେତ୍ ମୁଖ୍ୟ କେନାଲକୁ ଗାଧୋଇବାକୁ ଯାଇ ଗତ ଶୁକ୍ରବାର ଭାସି ଯାଇଥିଲେ । ଏପର୍ଯ୍ୟନ୍ତ ତାଙ୍କର ପତ୍ତା ମିଳି ନ ଥିବା ବେଳେ ଶନିବାର ପୂର୍ବାହ୍ନରେ ଏହି କେନାଲରେ ପୁଣି ଜଣେ ଯୁବକ ଭାସି ଯାଇଛନ୍ତି। ସମ୍ପୃକ୍ତ ଯୁବକ ହେଲେ, ବରଗଡ଼ ତଳିପଡ଼ାର ଓମପ୍ରକାଶ ଭୋଇ(୨୨) ।
ଓମପ୍ରକାଶ ତାଙ୍କ ସମ୍ପର୍କୀୟ ଭାଇଙ୍କ ସହ ଜିଲା ମୁଖ୍ୟ କେନାଲର ବରଡୋଲ ଛକ ଘାଟକୁ ଗାଧୋଇବାକୁ ଯାଇଥିଲେ। ତେବେ ଗାଧୋଉଥିବାବେଳେ କେନାଲ ପାଣିରେ ଓମପ୍ରକାଶ ଭାସି ଯାଇଥିବା ତାଙ୍କ ଜଣେ ସମ୍ପର୍କୀୟ ଭାଇ କହିଛନ୍ତି। ଖବର ପାଇ ବରଗଡ଼ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଖୋଜାଖାଜି କରୁଛନ୍ତି। ମାତ୍ର ଖବର ଲେଖାହେବା ସୁଦ୍ଧା (ପୂର୍ବାହ୍ନ ୧୧ଟା ୨୦ ମିନିଟ ପର୍ଯ୍ୟନ୍ତ) ତାଙ୍କର ସନ୍ଧାନ ମିଳିପାରି ନାହିଁ। ବରଗଡ଼ ମୁଖ୍ୟ କେନାଲରେ ଦୁଇ ଦିନରେ ୨ଜଣ ଭାସିଯିବା ଘଟଣା ଅଞ୍ଚଳବାସୀଙ୍କୁ ସ୍ତବ୍ଧ କରି ପକାଇଛି।
