ମୁମ୍ବାଇ,୪।୧୦ : ଅର୍ଥ ହେରଫେର ମାମଲାରେ ବମ୍ବେ ହାଇକୋର୍ଟ ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ଏନସିପି ନେତା ଅନୀଲ ଦେଶମୁଖଙ୍କୁ ଜାମିନ ପ୍ରଦାନ କରିଛନ୍ତି। ଏକ ଲକ୍ଷ ଟଙ୍କାର ବ୍ୟକ୍ତିଗତ ମୁଚାଲିକାରେ ତାଙ୍କୁ ଜାମିନ ପ୍ରଦାନ କରାଯାଇଛି। ତେବେ ଇଡି ମାମଲାରେ ଏହି ଜାମିନ ପ୍ରଦାନ କରାଯାଇଛି। କିନ୍ତୁ ସିବିଆଇ ମାମଲାରେ ତାଙ୍କୁ ବର୍ତ୍ତମାନ ପର୍ଯ୍ୟନ୍ତ ଜାମିନ ମିଳି ନାହିଁ। ତେଣୁ ତାଙ୍କୁ ଏବେ ଜେଲରେ ରହିବାକୁ ପଡ଼ିବ।
ଦେଶମୁଖଙ୍କୁ ନଭେମ୍ବର ୨୦୨୧ରେ ଇଡି ଯାଞ୍ଚ ପରେ ଗିରଫ କରାଯାଇଥିଲା, ଯାହା ପରେ ସେ ନ୍ୟାୟିକ ହେପାଜତରେ ଥିଲେ। ବ୍ୟାପକ ଅର୍ଥ ହେରଫେର ଅଭିଯୋଗରେ ତାଙ୍କ ବିରୋଧରେ ଇଡି ଏକ ମାମଲା ରୁଜୁ କରିଥିଲା। ଇଡି ଅନୁଯାୟୀ, ସେ ମୁମ୍ବାଇର ବିଭିନ୍ନ ବାର ଏବଂ ରେଷ୍ଟୁରାଣ୍ଟରୁ ପ୍ରାୟ ୪.୭ କୋଟି ଟଙ୍କା ସଂଗ୍ରହ କରିଥିଲେ। ଏହା ସହିତ ସେ ନାଗପୁରରେ ଥିବା ତାଙ୍କ ପରିବାର ଦ୍ୱାରା ନିୟନ୍ତ୍ରିତ ଏକ ଶିକ୍ଷାନୁଷ୍ଠାନ ଶ୍ରୀ ସାଇ ଏଜୁକେଶନ ଇନଷ୍ଟିଚ୍ୟୁଟକୁ ଏହି ଅର୍ଥକୁ ପ୍ରଦାନ କରିଥିଲେ ବୋଲି ଅଭିଯୋଗ ହୋଇଥିଲା।
ସୂଚନାଯୋଗ୍ୟ, ମୁମ୍ବାଇର ପୂର୍ବତନ ପୋଲିସ କମିଶନର ପରମବୀର ସିଂ ଗତ ବର୍ଷ ମାର୍ଚ୍ଚରେ ଅଭିଯୋଗ କରିଥିଲେ ଯେ ରାଜ୍ୟ ଗୃହମନ୍ତ୍ରୀ ଥିବା ସମୟରେ ଅନୀଲ ସହରର ରେଷ୍ଟୁରାଣ୍ଟ ଏବଂ ବାରରୁ ମାସକୁ ୧୦୦ କୋଟି ଟଙ୍କା ସଂଗ୍ରହ କରିବାର ଲକ୍ଷ୍ୟ ରଖିଥିଲେ। ଏହି ଅଭିଯୋଗକୁ ଅନୀଲ ଅସ୍ବୀକାର କରିଥିଲେ। କିନ୍ତୁ ବମ୍ବେ ହାଇକୋର୍ଟ ତାଙ୍କ ବିରୋଧରେ ମାମଲା ରୁଜୁ କରିବାକୁ ସିବିଆଇ ନିର୍ଦ୍ଦେଶ ଦେବା ପରେ ସେ ତାଙ୍କ ପଦରୁ ଇସ୍ତଫା ଦେଇଥିଲେ।
