ସମ୍ବଲପୁର,୮ା୧୨(ବ୍ୟୁରୋ): ମହାନଦୀର ସମ୍ବଲପୁର ଅଯୋଧ୍ୟା ସରୋବର ଆନିକଟରେ ସୃଷ୍ଟି ହୋଇଥିବା ଘାଇର ମରାମତି କାମ ଆରମ୍ଭ ହୋଇଛି। ଏଥିପାଇଁ ଓଏଚ୍ପିସି ବିଦ୍ୟୁତ୍ ଉତ୍ପାଦନ ହ୍ରାସ କରାଯାଇଛି। ଏହି ସମୟରେ ମହାନଦୀରେ ଜଳପ୍ରବାହ ମଧ୍ୟ କମ୍ ରହିଛି। ୭ଦିନ ଭିତରେ କାମ ସମ୍ପୂର୍ଣ୍ଣ କରିବାକୁ ଯୋଜନା ରହିଛି। ଆନିକଟର ବିଭିନ୍ନ ସ୍ଥାନରେ ହୋଇଥିବା ଗର୍ତ୍ତ, ଉପରୁ ଉଠିଯାଇଥିବା ପଥର ଗୁଡ଼ିକର ମରାମତି କରାଯାଉଛି। ପାଣି ସମ୍ପୂର୍ଣ୍ଣ ବନ୍ଦ କରିବାକୁ ଯୋଜନା କରାଯାଉଛି। ପାଣି ବନ୍ଦ ହେଲେ ମୁଖ୍ୟ ଘାଇର ମରାମତି କାମ କରାଯିବ ବୋଲି ଜଳସେଚନ ବିଭାଗ ନିର୍ବାହୀ ଯନ୍ତ୍ରୀ ପ୍ରମୋଦ ପଣ୍ଡା ସୂଚନା ଦେଇଛନ୍ତି। ସୂଚନାଯୋଗ୍ୟ, ମହାନଦୀ ଅଯୋଧ୍ୟା ସରୋବର ଆନିକଟରେ ପ୍ରାୟ ୧୦ଫୁଟରୁ ଊର୍ଦ୍ଧ୍ୱ ଘାଇ ସୃଷ୍ଟି ହୋଇଥିଲା। ତେଣୁ ଆନିକଟ ଉପରମୁଣ୍ଡ ମହାନଦୀର ପାଣି ପରିମାଣ କମିଯାଇଥିଲା। ଏହାକୁ ନେଇ ସହରବାସୀ ଉଦ୍ବେଗ ପ୍ରକାଶ କରିଥିଲେ। ଏହାର ମରାମତି ନ ହେଲେ ମହାନଦୀ ପାଣି ଉପରେ ନିର୍ଭର କରୁଥିବା ସମ୍ବଲପୁରବାସୀ ସମସ୍ୟାର ସମ୍ମୁଖୀନ ହେବେ। ଆଗକୁ ଗ୍ରୀଷ୍ମ ଋତୁ ଆସୁଛି। ସେପଟେ ହୀରାକୁଦ ଜଳଭଣ୍ଡାରର ଗେଟଗୁଡ଼ିକ ବନ୍ଦ କରିଦିଆଯିବ। ତେଣୁ ଶୀଘ୍ର ମରାମତି କରିବାକୁ ଦାବି ହୋଇଥିଲା।
