ପଟ୍ଟାଙ୍ଗି,୯ା୧୦(ଶରତ ଧଳ):କିଛିଦିନର ନୀରବତା ପରେ ପୁଣି ପଡ଼ୋଶୀ ଆନ୍ଧ୍ରର କାର୍ଯ୍ୟ ଚର୍ଚ୍ଚାକୁ ଆସିଛି। ଏଥର କୋଟିଆ କିମ୍ବା ଅନ୍ୟ କୌଣସି ପଞ୍ଚାୟତର ଲୋକଙ୍କୁ ନିଜ ରାଜ୍ୟ ପ୍ରତି ଆକୃଷ୍ଟ କରିବା ଲକ୍ଷ୍ୟ ନାହିଁ ବରଂ ଓଡ଼ିଶା ସୀମାରେ ଅନୁପ୍ରବେଶ କରି ଆନ୍ଧ୍ର ସରକାର ଜଳ ସଂରକ୍ଷଣ ବନ୍ଧ ନିର୍ମାଣ ଯୋଜନା କରୁଛି। ଏଥିପାଇଁ ସେ ଓଡ଼ିଶାର ରାଜସ୍ବ ଓ ଜଙ୍ଗଲ ବିଭାଗ ଅଧୀନରେ ଥିବା ଜଳ ଓ ଜଙ୍ଗଲ ଜମିକୁ ହାତେଇବାରେ ଲାଗିପଡ଼ିଛି। କୋରାପୁଟ ଜିଲା ପଟ୍ଟାଙ୍ଗି ବ୍ଲକ ସୁଙ୍କି ପଞ୍ଚାୟତର ମୁଙ୍ଗାରଗୁମି ଗ୍ରାମରେ ଏପରି ଘଟଣା ଦେଖିବାକୁ ମିଳିଛି। ତେବେ ସବୁଠାରୁ ଆଶ୍ଚର୍ଯ୍ୟର କଥା ଯେ, ଏନେଇ ସ୍ଥାନୀୟ ଜିଲା ପ୍ରଶାସନ ନିକଟରେ କିଛି ଖବର ନାହିଁ।
ଖବରରୁ ଜଣାପଡିଛି, ପଟ୍ଟାଙ୍ଗି ବ୍ଲକର ସୁଙ୍କି ପଞ୍ଚାୟତର ଇତାୱାଲସା, କୋପମାଉଡି, ଗନ୍ଧୱାଲସା, ୱାଲାଗାଁ, ମାଦିଗୁଣ୍ଡଲାମ, ମୁଙ୍ଗାରଗୁମି, ସାଙ୍ଗାମଗୁଡ଼େ, ତୋଟାଲପାଡୁ ଓ ଡ୍ରେଙ୍ଗିଗରୁଙ୍ଗଗୁଡ଼େ ଗ୍ରାମ ସହ ରାଲେଗଡ଼ା ପଞ୍ଚାୟତର ବାଟିୱାଲ୍ସା, ଚିଟାମପାଡୁ, ଟାଙ୍ଗିଣି ଓ ମାଡାୱାଲସା ପଞ୍ଚାୟତର ୧୪ଟି ଗ୍ରାମର ଗ୍ରାମବାସୀ ନିଜ ଗ୍ରାମ ନିକଟ ଦେଇ ପ୍ରବାହିତ ପାହାଡୀ ନଦୀ ଉପରେ ନିର୍ଭର କରି ଚଳନ୍ତି। ଏହି ନଦୀ ଜଳରେ ସେମାନେ ଚାଷକରି ଜୀବିକା ନିର୍ବାହ କରନ୍ତି। ତେବେ ଆନ୍ଧ୍ର ସୀମାନ୍ତ ଗ୍ରାମଗୁଡ଼ିକରେ ବସବାସ କରୁଥିବା ଲୋକମାନେ କିପରି ଉନ୍ନତମାନର ଚାଷ କରି ରୋଜଗାରକ୍ଷମ ହୋଇପାରିବେ ଏହାକୁ ଦୃଷ୍ଟିରେ ରଖି ବର୍ତ୍ତମାନ ଆନ୍ଧ୍ର-ଓଡ଼ିଶା ସୀମାନ୍ତର ଉପରୋକ୍ତ ଗ୍ରାମଗୁଡ଼ିକ ମଧ୍ୟରୁ ମୁଙ୍ଗାରଗୁମି ଗ୍ରାମରେ ଜଳସେଚନ ପ୍ରକଳ୍ପ ନେଇ ଏକ ବନ୍ଧ ନିର୍ମାଣ କରିବାକୁ ଆନ୍ଧ୍ର ସରକାର ଯୋଜନା କରିଛି। ଏଥିପାଇଁ ଗତ ୨୬ ତାରିଖରେ ଆନ୍ଧ୍ର ସରକାର ଜମି ଚିହ୍ନଟ ସହ ସର୍ଭେ କାର୍ଯ୍ୟ ଆରମ୍ଭ କରିଛି। ଅନ୍ୟପକ୍ଷରେ ଆନ୍ଧ୍ର ଯଦି ଏପରି ପ୍ରକଳ୍ପ କରେ ତେବେ ଓଡ଼ିଶାର ଉପରୋକ୍ତ ସମସ୍ତ ଗ୍ରାମବାସୀ ଜୀବିକା ହରାଇବା ନେଇ ଆଶଙ୍କା ପ୍ରକାଶ ପାଇଛି। ଓଡ଼ିଶାର ସୁଙ୍କି ପଞ୍ଚାୟତରେ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଓ ଜଙ୍ଗଲ ବିଭାଗର କାର୍ଯ୍ୟାଳୟ ରହିଥିଲେ ସୁଦ୍ଧା ଆନ୍ଧ୍ରର ଏପରି ଅନୁପ୍ରବେଶ କିପରି ଏହି ଦୁଇ କାର୍ଯ୍ୟାଳୟର କର୍ମଚାରୀଙ୍କ ନଜରରେ ପଡୁନାହିଁ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ବିଷୟରେ ସ୍ଥାନୀୟ ତହସିଲଦାର ଦେବେନ୍ଦ୍ର ବାହାଦୁର ସିଂ ଧରୁଆଙ୍କୁ ପଚାରିବାରୁ ସେ କହିଲେ, ଏ ସମ୍ପର୍କରେ ତାଙ୍କ ନିକଟରେ କୌଣସି ଖବର ନାହିଁ। ତେବେ ସେ ଏହାର ଅନୁଧ୍ୟାନ କରିବେ। ଘଟଣାସ୍ଥଳକୁ ଗସ୍ତ କରି ତଦନ୍ତ କରିବେ ବୋଲି ପ୍ରକାଶ କରିଛନ୍ତି।
