ହାଇଦ୍ରାବାଦ, ୧୩।୮: ମହାମାରୀ କରୋନା ସମଗ୍ର ବିଶ୍ୱରେ ହଇଚଇ ସୃଷ୍ଟି କରିଛି। ତେବେ ଆନ୍ଧ୍ରପ୍ରଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ଦୃତ ଗତିରେ ବଢ଼ିବାରେ ଲାଗିଛି। ଏଭଳି ପରିସ୍ଥିତିରେ ଜଣେ କରୋନା ରୋଗୀଙ୍କୁ ଅବହେଳା କରିବା ଘଟଣା ସମ୍ମୁଖକୁ ଆସିଛି।
ଆନ୍ଧ୍ରପ୍ରଦେଶରେ କରୋନା ରୋଗୀଙ୍କ ସଂଖ୍ୟା ବଢ଼ୁଥିବାରୁ ଜରୁରୀକାଳିନ ସହାୟତା ପାଇଁ ୧୧୮୦ ନୂତନ ଅତ୍ୟାଧୁନିକ ଆମ୍ବୁଲାନ୍ସ ସେବା ଆରମ୍ଭ କରିଛନ୍ତି ସରକାର। ମାତ୍ର ସରକାରଙ୍କ ଏହି ଘୋଷଣା କେବଳ କାଗଜପତ୍ରରେ ସିମିତ ରହିଯାଇଥିବା ମନେ ହେଉଛି। କାରଣ ଆମ୍ବୁଲାନ୍ସ ନ ମିଳିବାରୁ ଜଣେ କରୋନାରେ ମୃତ୍ୟୁ ଘଟିଥିବା ଜଣେ ବାଳକଙ୍କୁ ଠେଲାରେ ବୋହି ନେବାକୁ ପଡ଼ିଛି। ଏହି ଅଘଟଣ ଘଟିଛି। ଗୁଣ୍ଟୁର ବାପଟଲା ଅଞ୍ଚଳରେ। କୁହାଯାଉଛି ପରିବାର ପକ୍ଷରୁ କେହି ମୃତଦେହ ନେବାକୁ ଆସିଲେ ନାହିଁ। ତେଣୁ ହସ୍ପିଟାଲ ପ୍ରଶାସନ ପକ୍ଷରୁ କୋଭିଡ-୧୯ ନିୟମକୁ ପାଳନକରି ମୃତଦେହକୁ ଏକ ବ୍ୟାଗ୍ରେ ଗୁଡ଼ାଇ ଅନ୍ତିମ ସଂସ୍କାର ପାଇଁ ମ୍ୟୁନିସିପାଲଟି କର୍ମଚାରୀଙ୍କୁ ହସ୍ତାନ୍ତର କରାଗଲା। ତେବେ ଆମ୍ବୁଲାନ୍ସ ନ ମିଳିବାରୁ ମୃତଦେହକୁ ମ୍ୟୁନିସିପାଲଟି କର୍ମଚାରୀମାନେ ଏକ ଠେଲାରେ ଅନ୍ତିମ ସଂସ୍କାର ପାଇଁ ନେଇଗଲେ। ଏ ନେଇ ସ୍ଥାନୀୟ ଲୋକ ଅସନ୍ତାଷ ପ୍ରକାଶ କରିଛନ୍ତି। ଆନ୍ଦ୍ରପ୍ରଦେଶର ବିଧାନସଭାର ଉପବାଚସ୍ପତି କୋନା ରଘୁପତିଙ୍କ ନିର୍ବାଚନମଣ୍ଡଳୀରେ ଏହି ଅଘଟଣ ଘଟିଥିବାରୁ ସେ ଅସନ୍ତୋଷ ପ୍ରକାଶ କରିବା ସହ ହସ୍ପିଟାଲ ଏବଂ ମ୍ୟୁନିସିପାଲଟି କର୍ମଚାରୀଙ୍କୁ ଏଥିପାଇଁ ଭର୍ତ୍ସନା କରିଛନ୍ତି।
