ମେଲବୋର୍ନ, ୪।୪ (ଏପି): ଅଷ୍ଟ୍ରେଲିଆନ୍ ଫର୍ମୁଲା ଓ୍ବାନ୍ ଗ୍ରାଁ ପ୍ରି ଶେଷରେ କିଛି ଦେଖଣାହାରି ସୁରକ୍ଷା ବ୍ୟବସ୍ଥାକୁ ଅତିକ୍ରମ କରି ଟ୍ରାକ୍ ଆଡ଼କୁ ଚାଲିଯାଇଥିଲେ। ଏହା କିପରି ଘଟିଲା ଅଷ୍ଟ୍ରେଲିଆ ଗ୍ରାଁ ପ୍ରି ଆୟୋଜକଙ୍କ ତରଫରୁ ତାହାର ତଦନ୍ତ ଆରମ୍ଭ ହୋଇଛି। ଅଷ୍ଟ୍ରେଲିଆନ୍ ଗ୍ରାଁ ପ୍ରି ଦେଖିବା ଲାଗି ୪ ଦିନରେ ରେକର୍ଡ ୪୪୪, ୬୩୧ ଦର୍ଶକ ଆସିଥିଲେ। ତନ୍ମଧ୍ୟରେ କେବଳ ରବିବାର ଉପସ୍ଥିତ ଦର୍ଶକଙ୍କ ସଂଖ୍ୟା ୧୩୧,୧୨୪ ରହିଥିଲା। ଫର୍ମୁଲା ଓ୍ବାନ୍ପ୍ରେମୀମାନେ ସୁରକ୍ଷା ବାଡ଼ ଡେଇଁ ଟ୍ରାକ୍ଆଡ଼କୁ ମୁହଁାଇଥିଲେ। ରେସ୍ ପ୍ରମୋଟରମାନଙ୍କୁ ରବିବାର ରାତିରେ ଷ୍ଟିଓ୍ବାର୍ଡମାନଙ୍କର ସମ୍ମୁଖୀନ ହେବାକୁ ପଡ଼ିଥିଲା। ଯଥେଷ୍ଟ ସୁରକ୍ଷା ଏବଂ ନିରାପତ୍ତା ବ୍ୟବସ୍ଥା ଗ୍ରହଣ କରାଯାଇ ନ ଥିବା ସେମାନେ ସ୍ବୀକାର କରିଥିଲେ। ଅଷ୍ଟ୍ରେଲିଆ ଗ୍ରାଁ ପ୍ରି କର୍ପୋରେଶନ ତରଫରୁ ଘଟଣାର ସମୀକ୍ଷା କରାଯାଉଛି। ଏଥିରେ ଭିକ୍ଟୋରିଆ ପ୍ରଦେଶ ପୋଲିସ ମଧ୍ୟ ରହିଛି। ଜୁନ୍ ୩୦ ସୁଦ୍ଧା ମୋଟର ସ୍ପୋଟର୍ସର ବିଶ୍ୱ ଗଭର୍ନିଂ ବଡି ଏଫ୍ଆଇଏ(ଫେଡେରେଶନ ଅଫ୍ ଇଣ୍ଟରନ୍ୟାଶନାଲ ଅଟୋମୋବାଇଲ) ନିକଟରେ ରିପୋର୍ଟ ଉପସ୍ଥାପନ କରାଯିବ ବୋଲି ଏହାର ମୁଖ୍ୟ କାର୍ଯ୍ୟନିର୍ବାହୀ ଆଣ୍ଡ୍ର୍ୟୁ ଓ୍ବାଲ୍କଟ ପ୍ରକାଶ କରିଛନ୍ତି। ଅନ୍ୟପକ୍ଷରେ ଏହି ଘଟଣାକୁ ନେଇ କି ପ୍ରକାର ଦଣ୍ଡବିଧାନ କରାଯିବ ତାହା ସ୍ଥିର କରିବା ଲାଗି ପୁନଃ ତଦନ୍ତ ପାଇଁ ଏଫ୍ଆଇଏ ଓ୍ବାଲର୍ଡ ମୋଟର ସ୍ପୋଟର୍ସ କାଉନ୍ସିଲକୁ କୁହାଯାଇଛି।
