ଭୁବନେଶ୍ୱର,୩୦ା୭(ଅଭିଜିତ ଦାସ)ଦିବ୍ୟାଙ୍ଗ ହେଲେ ବି ସେ କେଉଁଥିରେ କମ୍ ନୁହନ୍ତି। ଜଣେ ସାଧାରଣ ଲୋକଙ୍କ ପରି ଜୀବନଯାପନ କରୁଛନ୍ତି। କାହା ଉପରେ ନିର୍ଭର ନ କରି ନିଜେ ସବୁକିଛି କରୁଛନ୍ତି। ଏପରିକି ଟ୍ରାଇ ସାଇକେଲରେ ପରିବା ବିକି ପରିବାର ଚଳାଇ ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି ଲିପୁନା।
୩୦ ବର୍ଷୀୟ ଦିବ୍ୟାଙ୍ଗ ଲିପୁନା ପ୍ରତିହାରୀଙ୍କ ଘର କଟକ ଜିଲା ନରସିଂହପୁରରେ। ଜନ୍ମର ୪ ମାସ ମଧ୍ୟରେ ତାଙ୍କ ବାମଗୋଡରେ ଏକ ଘା ହୋଇଥିଲା। ଘରର ଆର୍ଥିକ ପରିସ୍ଥିତି ସ୍ବଚ୍ଛଳ ନ ଥିବାରୁ ଠିକ୍ ଭାବରେ ଚିକିତ୍ସିତ ହେବାରୁ ବଞ୍ଚତ୍ତ ହୋଇଥିଲେ। ଫଳରେ ଘା’ ବଡ଼ ଆକାରରେ ହେବା ସହ ପୂରା ଗୋଡ଼କୁ ମାଡ଼ିଯାଇଥିଲା। ଶେଷରେ ଏପରି ହୋଇଥିଲା, ଆଠଗଡର ମାଣିବନ୍ଧ ହସ୍ପିଟାଲରେ ଉକ୍ତ ଗୋଡ଼କୁ କାଟିବାକୁ ପଡିଥିଲା। ଗୋଡ଼ କାଟି ନ ଥିଲେ ଘା’ ଶରୀର ଅନ୍ୟ ଅଙ୍ଗକୁ ଆକ୍ରାନ୍ତ କରିବା ସହ ଜୀବନ ପ୍ରତି ବିପଦ ସୃଷ୍ଟି କରିଥାନ୍ତା ବୋଲି ଡାକ୍ତର କହିଥିଲେ। ଗୋଡ଼ କଟାଯିବା ପରେ ମା’ବାପା ଚିନ୍ତାରେ ପଡିଥିଲେ। ଘରର ଆର୍ଥିକ ବୋଝ ସହ ପୁଅ ଲିପୁନାଙ୍କ ଏପରି ଅବସ୍ଥା ପରିବାରରେ ଦୁଃଖର ଛାୟା ଖେଳାଇ ଦେଇଥିଲା। ସମୟକ୍ରମେ ଲିପୁନା ବଡ଼ ହେବା ସହ ମା’ବାପା ବୁଢ଼ା ବି ହୋଇଯାଇଥିଲେ। ଫଳରେ ପରିବାର ଚଳିବା କଷ୍ଟକର ହୋଇପଡିଥିଲା। ଏହା ଲିପୁନାଙ୍କୁ ସବୁବେଳେ କଷ୍ଟ ଦେଉଥିଲା। ପୁଅ ହୋଇ ବି କିଛି କରିପାରୁ ନ ଥିବାରୁ ମନ ସବୁବେଳେ ଆନ୍ଦୋଳିତ କରୁଥିଲା। ତେଣୁ ପରିବାରର ବୋଝ ସମ୍ଭାଳିବା ସହ ଶେଷ ସମୟରେ ମା’ବାପାଙ୍କ ବୋଝକୁ ହାଲ୍କା କରିବାକୁ ପଦାକୁ ଗୋଡ଼ କାଢ଼ିଥିଲେ। ପ୍ରଥମେ କଟକ ଓ ପରେ ଭୁବନେଶ୍ୱରକୁ ଚାଲିଆସି ଭିକ୍ଷାବୃତ୍ତିକୁ ଆଦରି ନେଇଥିଲେ। ଇତିମଧ୍ୟରେ ଲିପୁନାଙ୍କୁ ଜୀବନସାଥୀ ମିଳିଯାଇଥିଲା। ହେଲେ ସେ ଦୃଷ୍ଟିହୀନ ହୋଇଥିବାରୁ ତାଙ୍କର ଆଉ ଏକ ଦାୟିତ୍ୱ ବଢ଼ିଯାଇଥିଲା। ପରବର୍ତ୍ତୀ ସମୟରେ ତାଙ୍କର ୨ ପିଲା ହୋଇଥିଲେ। ଏହାଭିତରେ ଲିପୁନାଙ୍କ ଜୀବନରେ ଏକ ନୂଆ ମୋଡ଼ ଆସିଥିଲା। ମାଷ୍ଟରକ୍ୟାଣ୍ଟିନ ଛକରେ ଭିକ୍ଷାବୃତ୍ତି କରୁଥିବାବେଳେ କେତେଜଣ ସମାଜସେବୀ ଲିପୁନାଙ୍କୁ ଏକ ଟ୍ରାଇ ସାଇକେଲ ଯୋଗାଇ ଦେଇଥିଲେ। ବର୍ତ୍ତମାନ ଲିପୁନା ଉକ୍ତ ଟ୍ରାଇ ସାଇକେଲରେ ପନିପରିବା ସହ ଚା ଓ ପାନ ବିକ୍ରି କରୁଛନ୍ତି। ସାଇକେଲକୁ ଏକ ଛୋଟ ଦୋକାନରେ ପରିଣତ କରିଛନ୍ତି। ସକାଳ ୮ଟାରୁ ସାଇକେଲରେ ପନିପରିବା ଧରି ରାଜଧାନୀର ବିଭିନ୍ନ ଗଳିକନ୍ଦିରେ ବିକ୍ରି କରୁଥିବାବେଳେ ସନ୍ଧ୍ୟାରେ ମୁଖ୍ୟ ଛକଗୁଡ଼ିକରେ ଚା’ ପାନ ବିକ୍ରି କରନ୍ତି। କମ୍ ଦାମ୍ରେ ସତେଜ ପରିବା ଓ ସୁଆଦିଆ ଚା’ପାନ ଲୋକଙ୍କୁ ଆକୃଷ୍ଟ କରୁଛି।
ରାଜ୍ୟ ସରକାରଙ୍କ ସହାୟତା ସମ୍ପର୍କରେ ଲିପୁନା କହିଛନ୍ତି, ରାଜ୍ୟ ସରକାର ୭ଶହ ଟଙ୍କାର ଦିବ୍ୟାଙ୍ଗ ଭତ୍ତା ଦେଉଛନ୍ତି। ହେଲେ ଏଯାଏ ଅନ୍ୟ କିଛି ସହାୟତା ମିଳିପାରିନାହିଁ। ସ୍ତ୍ରୀ ଦୃଷ୍ଟିହୀନ ହୋଇଥିଲେ ମଧ୍ୟ ତାଙ୍କୁ ଏଯାଏ ଭତ୍ତା ମିଳିପାରୁନି। ପୂର୍ବରୁ ଅନେକଥର ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିଥିଲେ ମଧ୍ୟ କିଛି ବି ସୁଫଳ ମିଳିନି। ବିଧାୟକ ଅନନ୍ତ ନାରାୟଣ ଜେନାଙ୍କୁ ମଧ୍ୟ ଭେଟି ଦୁଃଖ ଜଣାଇଛି। ବିଧାୟକ ପ୍ରତିଶ୍ରୁତି ଦେଇଥିଲେ ମଧ୍ୟ ଏଯାଏ ସୁବିଧା ପାଇପାରିନାହିଁ।
