ପାରଳାଖେମୁଣ୍ଡି, ୧୧ା୩ (ଡି.ଏନ୍.ଏ): ଦୁନିଆ କ’ଣ ଦେଖିପାରୁ ନ ଥିଲେ ମଧ୍ୟ ରୋଜଗାର କରି ନିଜେ ଆତ୍ମନିର୍ଭରଶୀଳ ହେବା ସହ ପରିବାର କିଭଳି ପ୍ରତିପୋଷଣ କରାଯାଏ ତାହା ପ୍ରମାଣ କରି ଦେଖାଇଛନ୍ତି ଗଜପତି ଜିଲା ନୂଆଗଡ ବ୍ଲକ ସମ୍ବଲପୁର ଗ୍ରାମର କେଶବ ବେହେରଦଳାଇ। ଜମିରେ ଚାଷ କାମ ହେଉ ଅବା ଘରୋଇ ଉପକରଣ ସାମଗ୍ରୀ, କାଠରେ ତିଆରି ଖଟ କାମ ହେଉ ଅବା ଖଟରେ ସୂତା ବାନ୍ଧିବା ଓ ଖଜୁରୀ ଡାଳରେ ପଟି ତିଆରି କରିବା ଏ ସବୁ କାର୍ଯ୍ୟକୁ ଅତି ସହଜ ଓ ସରଳ ଭାବେ କରିପାରନ୍ତି ସେ। ଏସବୁ କାମ ପାଇଁ କୌଣସି ତାଲିମ ନେଇ ନ ଥିବାବେଳେ ଦୃଷ୍ଟିହୀନ ହୋଇଥିଲେ ମଧ୍ୟ ଅସମ୍ଭବକୁ ସମ୍ଭବ କରି ଅନ୍ୟମାନଙ୍କ ଲାଗି ଉଦାହରଣ ସାଜିଛନ୍ତି।
କେଶବଙ୍କ ବୟସ ୭୦ ପାର ହେଲାଣି। କିନ୍ତୁ ଦୃଷ୍ଟିଶକ୍ତି ନଥିବା ଯୋଗୁ କେବେ ବି ହାର ମାନି ନାହାନ୍ତି ସେ। ତାଙ୍କ ବାପାଙ୍କଠାରୁ ଶିଖିଥିବା ଖଟରେ ଦଉଡି ବାନ୍ଧିବା ଏବଂ ଖଜୁରୀ ପଟି ଆଦି ତିଆରି କରନ୍ତି l କେଶବ ୮ ବର୍ଷ ବୟସରେ ବସନ୍ତ ରୋଗରେ ଆକ୍ରାନ୍ତ ହୋଇ ଦୃଷ୍ଟିଶକ୍ତି ହରାଇଥିଲେ l କିଛି ବର୍ଷ ପରେ ବାପାଙ୍କୁ ବି ହରାଇଲେ, ହେଲେ ଦୁଃଖରେ ଭାଙ୍ଗି ନ ପଡି ନିଜ ପରିବାରର ଦାୟିତ୍ୱ ନେଇଥିଲେ। ଦୃଷ୍ଟିହୀନ ହୋଇଥିଲେ ମଧ୍ୟ ଭଗବାନଙ୍କୁ ଭରସା କରି ଘରେ କିମ୍ବା ବାହାରେ ଅନ୍ୟ ଉପରେ ଆଶ୍ରା ନକରି ନିଜ ଘରେ ଛୋଟ ମୋଟ କାମ କରି ବାହାରେ ବିକ୍ରି କରୁଥିଲେ। ବାହାର ଗ୍ରାମକୁ ଯାଇ ମଧ୍ୟ ଖଟବୁଣା, ଖଟ ତିଆରି ଓ ଖଜୁରୀପଟି ତିଆରି ଭଳି ବିଭିନ୍ନ କାର୍ଯ୍ୟକରି ନିଜ ପାଇଁ ଓ ନିଜ ପରିବାର ପାଇଁ ରୋଜଗାର କରିପାରୁଛନ୍ତି। ଯେତେବେଳେ କେଶବ ଘରେ ବସିଥାନ୍ତି ସେତେବେଳେ ଗାଁର ଲୋକଙ୍କୁ ଚାରିପାଖରେ ବସାଇ ଘୁଡୁକି ବାଦ୍ୟର ତାଳେ ତାଳେ ଭାବବିହ୍ବଳ ହୋଇ ସ୍ବରଚିତ ଜଗନ୍ନାଥ ଜଣାଣ ଶୁଣାଇ ଲୋକଙ୍କୁ ମନୋରଞ୍ଜନ କରିଥାନ୍ତି l ଆଜିର ଶିକ୍ଷିତ ସମାଜରେ ବେକାର ଯୁବକ ଯୁବତୀ ପାଇଁ ସେ ବଡ଼ ଉଦାହରଣ ସାଜିଛନ୍ତି।
