ଢେଙ୍କାନାଳ ଅଫିସ/ଅନୁଗୋଳ ଅଫିସ,୯ା୧: ଅନୁଗୋଳ ଜିଲା ଛେଳିଆପଡ଼ା, ଅଙ୍ଗାରବନ୍ଧ, ବାରସିଙ୍ଗା, ବଅଁରପାଳର ଗଡ଼ସନ୍ତ୍ରୀ ଅଞ୍ଚଳରେ ଆତଙ୍କ ସୃଷ୍ଟି କରି ୪ ଜୀବନ ନେଇଥିବା ନରହନ୍ତା ହାତୀ ଢେଙ୍କାନାଳମୁହଁା ହୋଇଛି। ଶନିବାର ସନ୍ଧ୍ୟାରେ ଉକ୍ତ ହାତୀ ହିନ୍ଦୋଳ ରେଞ୍ଜ୍ ସଞ୍ଜପଡ଼ା ଅଞ୍ଚଳରେ ପ୍ରବେଶ କରିଥିବାବେଳେ ରବିବାର ଏହାକୁ ତର୍କାବେଡା ଜଙ୍ଗଲରେ ଠାବ କରାଯାଇଛି। ଅନୁଗୋଳ ଘଟଣାର ପୁନରାବୃତ୍ତି ଯେପରି ଢେଙ୍କାନାଳରେ ନ ହୁଏ, ସେଥିଲାଗି ବନ ବିଭାଗ ସତର୍କ ହୋଇଉଠିଛି। ହାତୀ ବୁଲୁଥିବା ସ୍ଥାନରେ ପାଟ୍ରୋଲିଂ କଡ଼ାକଡ଼ି କରାଯାଇଛି।
୪ ମଣିଷ ମାରିବା ପରେ ଉକ୍ତ ହାତୀ ଦୀର୍ଘପଥ ଅତିକ୍ରମ କରି ଢେଙ୍କାନାଳ ସୀମାରେ ନିଜର ଉପସ୍ଥିତି ଜାହିର କରିଛି। ଯୁଆଡ଼େ ମୁହଁାଉଛି, ସେଠାରେ ବ୍ୟାପକ ଫସଲ କ୍ଷୟକ୍ଷତି କରୁଛି। ଉକ୍ତ ମଣିଷମରା ହାତୀକୁ ନେଇ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି। କାରଖାନାରେ କାମ କରିବାକୁ ସାଇକେଲରେ ଯାଉଥିବା ଏବଂ ରାତ୍ରି ଡ୍ୟୁଟିରୁ ଫେରୁଥିବା ଶ୍ରମିକ କର୍ମଚାରୀଙ୍କ ସୁରକ୍ଷା ଦୃଷ୍ଟିରୁ ବନ ବିଭାଗ ପକ୍ଷରୁ ଡାକବାଜି ଯନ୍ତ୍ର ସହାୟତାରେ ପ୍ରଚାର କରାଯାଉଛି। ଅନ୍ୟପଟେ ହିନ୍ଦୋଳ ଅଞ୍ଚଳରେ ଥିବା କଳକାରଖାନାର ବିଦ୍ୟୁତ୍ ତାର ଉକ୍ତ ହାତୀ ଜୀବନ ପ୍ରତି ବିପଦ ସୃଷ୍ଟି କରିଛି। ଅପରପକ୍ଷେ ନରହନ୍ତା ହାତୀ ଥିବା ପଲର ଅନ୍ୟ ୨୪ ହାତୀ ଅନୁଗୋଳ ବନାଞ୍ଚଳର କୁଲାସିଂହା ଓ ଚନ୍ଦନପୁରରେ ଡେରା ପକାଇଛନ୍ତି। ତେବେ ହଠାତ୍ ଉକ୍ତ ହାତୀ କାହିଁକି ଏମିତି ହିଂସ୍ର ହୋଇଉଠିଲା, ତାହାର କାରଣ ଜାଣିବା ଲାଗି ବନ କର୍ମଚାରୀମାନେ ଉଦ୍ୟମ ଆରମ୍ଭ କରିଛନ୍ତି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କୁହନ୍ତି, ଉକ୍ତ ହାତୀ କେତେବେଳେ ଢେଙ୍କାନାଳ ସୀମାରେ ପ୍ରବେଶ କରୁଛି ତ ପୁଣି କେତେବେଳେ ଅନୁଗୋଳ ସୀମାକୁ ପଳାଉଛି। ତର୍କାବେଡା ଗ୍ରାମ୍ୟ ଜଙ୍ଗଲରେ ଥିବା ହାତୀ ଅପେକ୍ଷାକୃତ ଶାନ୍ତ ପଡ଼ିଥିବା ଲକ୍ଷ୍ୟ କରାଯାଉଛି। ଶାନ୍ତ ଭାବେ ଛିଡ଼ା ହୋଇ ରହୁଛି। ୧୦ ମିଟର ଦୂରରୁ ବ୍ୟକ୍ତିଗତ ନିରୀକ୍ଷଣ କରିବା ପରେ ଏହା ଶାନ୍ତ ପଡ଼ିଥିବା ଭାବୁଛୁ। ତଥାପି ହାତୀ ଗତିବିଧି ଉପରେ କଡ଼ା ନଜର ରଖାଯାଇଛି। ଠିକ୍ ଫଟୋଚିତ୍ର ମିଳି ନ ଥିବାରୁ ଉକ୍ତ ହାତୀ ମାଖନା କି ମାଈ ତାହା ଅସ୍ପଷ୍ଟ ରହିଛି। ତେବେ ଏହା ମାଖନା ବୋଲି ଅନୁମାନ କରାଯାଉଛି। ହାତୀଟି ଯେଉଁଠି ରହିଛି, ଏହାର ନିକଟବର୍ତ୍ତୀ ଅଞ୍ଚଳରେ ବଡ଼ବଡ଼ ଶିଳ୍ପାନୁଷ୍ଠାନ ଅଛି। ବହୁ କର୍ମଚାରୀ ସାଇକେଲରେ କାରଖାନାକୁ କାମ କରିବାକୁ ଯାଉଛନ୍ତି। ସେଠାରେ କର୍ମଚାରୀମାନେ ପାଟ୍ରୋଲିଂ କରୁଥିବା ଜିଲା ବନଖଣ୍ଡ ଅଧିକାରୀ ସୂଚନା ଦେଇଛନ୍ତି।
