ରାୟଗଡ଼ା,୫ା୯(ଆଶିଷ ରଞ୍ଜନ ପଣ୍ଡା):ଓଡ଼ିଶା ଆନ୍ଧ୍ରପ୍ରଦେଶ ସୀମାନ୍ତରେ ରାୟଗଡ଼ାରୁ ପାର୍ବତୀପୁରମ୍କୁ ଯାଉଥିବା ଏକ ଘରୋଇ ଯାତ୍ରୀବାହୀ ବସ୍କୁ ସୋମବାର ପୂର୍ବାହ୍ନ ପ୍ରାୟ ୧୧ଟାରେ ଏକ ଦନ୍ତାହାତୀ ଅଟକାଇ ଉପଦ୍ରବ କରିଛି। ରାୟଗଡ଼ା ବ୍ଲକ୍ କେରେଡାଠାରୁ ୧୦ କି.ମି ଦୂର ମାନ୍ୟମ ଜିଲା ଅର୍ତମ ଗାଁ ନିକଟରେ ହଠାତ୍ ଏକ ଦନ୍ତାହାତୀ ରାସ୍ତା ଉପରକୁ ଚାଲି ଆସି ଚଳନ୍ତା ଯାତ୍ରୀବାହୀ ବସ୍କୁ ଅଟକାଇଥିଲା। ପରେ ହାତୀ ଶୁଣ୍ଢ ପିଟି ବସ୍ର ସମ୍ମୁଖ କାଚ ଭାଙ୍ଗିବା ସହ ବସ୍କୁ ଠେଲିବାକୁ ଲାଗିଥିଲା। ହାତୀର ଉତ୍ପାତ ଦେଖି ବସ୍ରେ ଯାତ୍ରା କରୁଥିବା ୩୦ ଯାତ୍ରୀ ଓ କର୍ମଚାରୀ ଭୟଭୀତ ହୋଇପଡ଼ିଥିଲେ। ଫଳରେ ଘଟଣାସ୍ଥଳରେ କିଛି ସମୟ ପାଇଁ ଆତଙ୍କ ଖେଳିଯାଇଥିଲା। ହାତୀ ଉପଦ୍ରବ ଯୋଗୁ ଦୀର୍ଘ ୪ ଘଣ୍ଟା ଧରି ଓଡ଼ିଶା ଓ ଆନ୍ଧ୍ରପ୍ରଦେଶ ମଧ୍ୟରେ ଯାନବାହନ ଚଳାଚଳ ଠପ୍ ରହିଥିଲା। ଖବରପାଇ ବନ ବିଭାଗ କର୍ମଚାରୀ ଓ ଗ୍ରାମବାସୀ ପହଞ୍ଚତ୍ ହାତୀକୁ ଜଙ୍ଗଲକୁ ଘଉଡାଇବା ପରେ ବସ୍ ତା’ର ଗନ୍ତବ୍ୟସ୍ଥଳକୁ ଯାଇଥିଲା।
ବୀରଗୋଟମ ଜଙ୍ଗଲ ଭିତରୁ ଏକ ହାତୀପଲ ଖାଦ୍ୟ ଅନ୍ବେଷଣରେ ଆସି ୨ ଦିନ ହେବ କୋମରାଡ଼ା ବ୍ଲକ ଅଞ୍ଚଳରେ ବୁଲୁଥିଲେ ବୋଲି ଆନ୍ଧ୍ରପ୍ରଦେଶ ବନ ବିଭାଗ ସୂତ୍ରରୁ ସୂଚନା ମିଳିଛି। ଉକ୍ତ ହାତୀପଲକୁ ଘଉଡାଇବା ପାଇଁ ଗ୍ରାମବାସୀ ବାଜା ଓ ନିଆଁ ବ୍ୟବହାର କରୁଛନ୍ତି। ଫଳରେ ଗୋଟିଏ ହାତୀ ବାଟବଣା ହୋଇ ରାସ୍ତା ଉପରକୁ ଚାଲି ଆସିଥିଲା। ଏବେ ହାତୀପଲ ଓଡ଼ିଶା ଭିତରେ ପ୍ରବେଶ କରିବା ଆଶଙ୍କା ରହିଥିବାରୁ ରାୟଗଡ଼ା ବନ ବିଭାଗ ଏଥିପ୍ରତି ସଜାଗ ରହିବା ଆବଶ୍ୟକ ବୋଲି ଆନ୍ଧ୍ର ବନ ବିଭାଗ କର୍ମକର୍ତ୍ତା କହିଛନ୍ତି। ଏ ନେଇ ରାୟଗଡ଼ା ରେଞ୍ଜ ଦାୟିତ୍ୱରେ ଥିବା ଡେପୁଟି ରେଞ୍ଜର ସଞ୍ଜୟ କୁମାର ଦାସଙ୍କୁ ପଚାରିବାରୁ ଓଡ଼ିଶା ସୀମାନ୍ତ ଅଞ୍ଚଳରେ ଥିବା ଗାଁଗୁଡ଼ିକୁ ବନ ବିଭାଗ ସ୍କ୍ବାଡ୍ ଯାଇ ସ୍ଥିତି ଅନୁଧ୍ୟାନ କରୁଛନ୍ତି। ଏଥିସହିତ ଅଞ୍ଚଳବାସୀ ରାତି ସମୟରେ ଘରୁ ନ ବାହାରିବାକୁ ଏବଂ ହାତୀ ଦେଖିଲେ ତୁରନ୍ତ ବନ ବିଭାଗକୁ ସୂଚନା ଦେବାକୁ କହିଛନ୍ତି। ହାତୀପଲଙ୍କୁ ଦେଖିଲେ ବନ ବିଭାଗ ପକ୍ଷରୁ ତୁରନ୍ତ ବିଦ୍ୟୁତ ବିଭାଗକୁ ଅନୁରୋଧ କରି ବିଦ୍ୟୁତ ସରବରାହ ବନ୍ଦ କରାଯିବ ବୋଲି ସଞ୍ଜୟ ଦାସ କହିଛନ୍ତି। ଏଥିସହିତ ସୁରକ୍ଷା ସହିତ ହାତୀପଲଙ୍କୁ ଜଙ୍ଗଲମୁହାଁ କରାଯିବ ବୋଲି ସେ କହିଛନ୍ତି।
