ଭଞ୍ଜନଗର, ୧୨।୩ (ବାବୁଲା ପ୍ରଧାନ):ବନ୍ୟପ୍ରାଣୀ ସୁରକ୍ଷା ଏବଂ ହାତୀ-ମଣିଷ ଲଢ଼େଇକୁ ରୋକିବା ପାଇଁ ଜନସାଧାରଣଙ୍କ ସହଭାଗିତା ଅପରିହାର୍ଯ୍ୟ। ଏହି ଲକ୍ଷ୍ୟକୁ ନେଇ ଗୁରୁବାର ଭଞ୍ଜନଗରଠାରେ ଟାଟା ପାୱାର, ଘୁମୁସର ଉତ୍ତର ବନଖଣ୍ଡ ଏବଂ ‘ସ୍ନେହା’ ଅନୁଷ୍ଠାନର ମିଳିତ ଆନୁକୂଲ୍ୟରେ ଏକ ଗଜ ସଂରକ୍ଷଣ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।
ବୈଠକରେ ଟାଟା ପାୱାର ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଛି। ବନ୍ୟପ୍ରାଣୀ ଶିକାର କିମ୍ବା ବିଦ୍ୟୁତ ହୁକିଂ ସମ୍ପର୍କରେ ସୂଚନା ଦେଲେ ସୂଚନାକାରୀଙ୍କୁ ୩ ହଜାରରୁ ୫ ହଜାର ଟଙ୍କା ପର୍ଯ୍ୟନ୍ତ ପୁରସ୍କାର ପ୍ରଦାନ କରାଯିବ। ସବୁଠାରୁ ବଡ଼ କଥା ହେଉଛି, ସୂଚନାକାରୀଙ୍କ ନାମ ଓ ପରିଚୟ ସମ୍ପୂର୍ଣ୍ଣ ଗୁପ୍ତ ରଖାଯିବ।
ମୁଖ୍ୟ ଅତିଥି ଭାବେ ଯୋଗଦେଇ ଡି.ଏଫ୍.ଓ ହିମାଂଶୁ ଶେଖର ମହାନ୍ତି କହିଥିଲେ ଯେ, ଲୋକେ ସଚେତନ ହେଲେ ହିଁ ଶିକାର ରୋକିହେବ। ବିଶେଷକରି ବିଦ୍ୟୁତ୍ ତାର ବିଛାଇ ବାର୍ହା ଶିକାର କରିବା ଦ୍ୱାରା ଅନ୍ୟ ବନ୍ୟପ୍ରାଣୀ ଓ ହାତୀମାନଙ୍କ ଜୀବନ ପ୍ରତି ବିପଦ ସୃଷ୍ଟି ହେଉଛି। ଏହି ଅବସରରେ ଉପସ୍ଥିତ ଶତାଧିକ ଲୋକ ଜଙ୍ଗଲି ମାଂସ ନ ଖାଇବା ପାଇଁ ଶପଥ ଗ୍ରହଣ କରିଥିଲେ।
ବନ୍ୟପ୍ରାଣୀ ଆକ୍ରମଣରେ କ୍ଷତିଗ୍ରସ୍ତ ହେଉଥିବା ବ୍ୟକ୍ତିଙ୍କ ପାଇଁ ସରକାର ଅନୁକମ୍ପା ସହାୟତା ରାଶି ବୃଦ୍ଧି କରିଛନ୍ତି। ଅନୁକମ୍ପା ଆପ୍ ମାଧ୍ୟମରେ କିଭଳି ସହାୟତା ପାଇଁ ଆବେଦନ କରାଯିବ, ସେନେଇ ତାଲିମ ଦିଆଯାଇଥିଲା। ବନ୍ୟପ୍ରାଣୀ ନଷ୍ଟ କରୁଥିବା ପାରମ୍ପରିକ ଫସଲ ବଦଳରେ ମାଛ, ମହୁ, ହଳଦୀ ଓ ଲଙ୍କା ଭଳି ବିକଳ୍ପ ଚାଷ କରିବାକୁ ପରାମର୍ଶ ଦିଆଯାଇଥିଲା।
ଏହି କାର୍ଯ୍ୟକ୍ରମରେ ଏସିଏଫ୍ ବିବେକ କୁମାର ଦାସ, ବିମଳ କୁମାର ପ୍ରଧାନ, ଟାଟା ପାୱାର ଏସ୍.ଡି.ଓ, ମୁଜାଗଡ଼ ରେଞ୍ଜର ବିମ୍ବାଧର ସାହୁ, ହାତୀ ଗବେଷକ ହରିକ୍ରିଷ୍ଣା ଏବଂ ସ୍ନେହା ଫିଲ୍ଡ ଅଫିସର ଅରବିନ୍ଦ ମାଝୀ ପ୍ରମୁଖ ବକ୍ତବ୍ୟ ରଖିଥିଲେ। ପ୍ରକଳ୍ପ ପରିଚାଳକ ରଞ୍ଜିତ ପଟ୍ଟନାୟକ ସଭା ସଂଯୋଜନା କରିଥିବା ବେଳେ ପ୍ରଶାନ୍ତ ରାଉତ ପରିଚାଳନାରେ ସହଯୋଗ କରିଥିଲେ।
