ଭୁବନେଶ୍ବର,୮।୮(ବ୍ୟୁରୋ): ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ରବିବାର ବିଳମ୍ବିତ ରାତିରେ ୨ ଦିନିଆ ଓଡ଼ିଶା ଗସ୍ତରେ ଆସି ପହଞ୍ଚିଛନ୍ତି। ସେ ସ୍ବତନ୍ତ୍ର ବିମାନ ଯୋଗେ ଭୁବନେଶ୍ୱରଠାରେ ପହଞ୍ଚିବା ପରେ ତାଙ୍କୁ ଦଳୀୟ ନେତା ଓ କର୍ମୀ ଭବ୍ୟ ସମ୍ବର୍ଦ୍ଧନା ଜ୍ଞାପନ ସହ ପାଛୋଟି ନେଇଛନ୍ତି। ଶାହା ଏହି ଗସ୍ତ କାଳରେ ଏକାଧିକ କାର୍ଯ୍ୟକ୍ରମରେ ଯୋଗଦେବେ। ସେ ପହଞ୍ଚିବା ପରେ ସ୍ଥାନୀୟ ଏକ ଘରୋଇ ହୋଟେଲରେ ରାତ୍ରିଯାପନ କରିଛନ୍ତି। ତେବେ ଶାହାଙ୍କ ଏହି ଗସ୍ତ ସମୟରେ ସେ ଓଡ଼ିଶା ସରକାର ଏବଂ ବିଜେଡି ବିରୋଧରେ କି ପ୍ରକାର ଆଭିମୁଖ୍ୟ ରଖିବେ ତାକୁ ନେଇ ବର୍ତ୍ତମାନ ଚାରିଆଡେ ଚର୍ଚ୍ଚା। ଦଳର ନେତାଙ୍କଠାରୁ ଆରମ୍ଭ କରି କର୍ମୀଙ୍କ ପର୍ଯ୍ୟନ୍ତ ସମସ୍ତେ ତାଙ୍କ ପୁରୁଣା ଆକ୍ରମଣର ସ୍ବରକୁ ଅପେକ୍ଷା କରି ରହିଥିବା ଚର୍ଚ୍ଚା ହେଉଛି। ହେଲେ ରାଷ୍ଟ୍ରପତି ନିର୍ବାଚନଠାରୁ ଆରମ୍ଭ କରି ଉପରାଷ୍ଟ୍ରପତି ନିର୍ବାଚନ ଏବଂ କେନ୍ଦ୍ରର ଅନେକ କଥାରେ ରାଜ୍ୟ ସରକାର ସମର୍ଥନ ଦେଇଚାଲିଛନ୍ତି। ତେଣୁ ବିଜେଡି ଓ ଭାଜପା କର୍ମୀ ଏହି ସମ୍ପର୍କକୁ ନେଇ କିଛି ବୁଝି ପାରୁନାହାନ୍ତି। ଆଗକୁ ଉଭୟ ଦଳ ପରଷ୍ପର ବିରୋଧକେକର ଲଢ଼େଇ କରିବେ ନା ନାହିଁ ତାକୁ ନେଇ ଦ୍ୱନ୍ଦ୍ୱରେ ପଡିଥିବା ରାଜନୈତିକ ବିଶ୍ଳେଷକଙ୍କଠାରୁ ଆରମ୍ଭକରି ରାଜନେତାଙ୍କ ପର୍ଯ୍ୟନ୍ତ ସମସ୍ତେ ଆଲୋଚନା କରୁଛନ୍ତି। ତେବେ ଶାହା ଏଥର ଓଡ଼ିଶା ଆସିବା ପରେ କିଛି ଶାଣିତ ଢଙ୍ଗରେ ନିଜ ଆଭିମୁଖ୍ୟ ଗ୍ରହଣ କରିପାରନ୍ତି ବୋଲି ଅନୁମାନ କରାଯାଉଛି, ହେଲେ ଏ କଥା ଖୁବଶୀଘ୍ର ସ୍ପଷ୍ଟ ହୋଇଯିବ।
ସୋମବାର ସକାଳ ୮ଟାରେ ଲିଙ୍ଗରାଜ ମନ୍ଦିର ଦର୍ଶନରେ ଯିବେ। ସେଠାରୁ ଦର୍ଶନ ସାରି ଦଳର ରାଜ୍ୟ ସଭାପତି ସମୀର ମହାନ୍ତିଙ୍କ ଘରେ ଜଳପାନ କରିବାର କାର୍ଯ୍ୟକ୍ରମ ରହିଛି। ଏହାପରେ ସେଠାରୁ ସେ ସିଧାସଳଖ ପୁଣି ରହୁଥିବା ହୋଟେଲକୁ ଯାଇ ସେଠାରେ ସାମାନ୍ୟ ବିଶ୍ରାମ ନେବା ପରେ କଟକ ଅଭିମୁଖେ ବାହାରିଯିବେ। ଏହାପରେ କଟକ ଯିବା ସମୟରେ ରାସ୍ତାରେ ନେତା ଓ କର୍ମୀଙ୍କୁ ସେ ଭେଟିକି ଯିବେ। ପ୍ରଥମେ ନଖରାଠାରେ ଦଳୀୟ ନେତା ଓ କର୍ମୀମାନେ ଶାହାଙ୍କୁ ସମ୍ବର୍ଦ୍ଧିତ କରିବେ। ଏହାପରେ ଲିଙ୍କ ରୋଡ୍, ପାଲା ମଣ୍ଡପ, ବାଦାମବାଡି, ଦୋଳମୁଣ୍ଡାଇ, ହରିପୁର, ସେମିନାର ଛକ, ଦର୍ଘା ବଜାର ଆଦି ସ୍ଥାନରେ ଶାହାଙ୍କୁ ନେତା, କର୍ମୀମାନେ ଭେଟି ସମ୍ବର୍ଦ୍ଧିତ କରିବେ। ଏହାପରେ ସେ ନେତାଜୀ ସୁଭାସ ଚନ୍ଦ୍ର ବୋଷଙ୍କ ଓଡ଼ିଆ ବଜାର ସ୍ଥିତ ଜନ୍ମସ୍ଥାନକୁ ଯିବେ। ସେଠାରୁ କଟକ ଇଣ୍ଡୋର ଷ୍ଟାଡିୟମଠାରେ ୧୧ଟାରେ ପହଞ୍ଚିବେ। ସେଠାରେ ଏକ ଦୈନିକ ଖବରକାଗଜର କାର୍ଯ୍ୟକ୍ରମରେ ସାମିଲ ହେବେ। ସେଠାରେ ଶାହାଙ୍କ ସମେତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଅନ୍ୟ କେତେଜଣ ନେତା ମଧ୍ୟ ଉପସ୍ଥିତ ରହିବେ। ଏହି କାର୍ଯ୍ୟକ୍ରମରେ ଯୋଗଦେବା ପୂର୍ବରୁ ଉଭୟ ବିଜେଡି ଓ ଭାଜପା ନିଜ ଶକ୍ତି ପ୍ରଦର୍ଶନ ପାଇଁ ଲାଗି ପଡ଼ିଛନ୍ତି। ଏହି କାର୍ଯ୍ୟକ୍ରମ ଶେଷ ହେବାପରେ ସେଠାରୁ ଶାହା ପୁଣି ନୂଆପାଟଣା, ମଙ୍ଗଳାବାଗ, କଲେଜ ଛକ, ଓଏମ୍ପି ଛକଠାରେ କର୍ମୀମାନଙ୍କୁ ଭେଟିସାରି ଭୁବନେଶ୍ୱର ଫେରିବେ।
ଭୁବନେଶ୍ୱର ସ୍ଥିତ ଭାଜପା ରାଜ୍ୟ କାର୍ଯ୍ୟାଳୟଠାରେ ପହଞ୍ଚିବା ପରେ ସେଠାରେ ଶାହାଙ୍କୁ ଭବ୍ୟ ସ୍ବାଗତ ପାଇଁ ବିଭିନ୍ନ ବ୍ୟବସ୍ଥା କରାଯାଇଛି। ପାର୍ଟି ଅଫିସ ବାହାରେ ପାର୍କିଂ ସ୍ଥଳୀରେ ମଞ୍ଚ ଏବଂ ଟେଣ୍ଡ ବ୍ୟବସ୍ଥା କରାଯାଇଛି। ସେଠାରେ ସେ ହର୍ ଘର୍ ତ୍ରିରଙ୍ଗା ଅଭିଯାନ ଆରମ୍ଭ କରିବେ। ଉକ୍ତ କାର୍ଯ୍ୟକ୍ରମ ଶେଷ ହେବା ପରେ ସେ ଦଳର ୩୦ରୁ ୪୦ ଆଗଧାଡ଼ି ନେତାଙ୍କ ସହ ଏକ ଗୁପ୍ତ ବୈଠକ କରିବେ। ନିକଟରେ ବିରୋଧୀ ଦଳ ନେତା ପଦରେ ପରିବର୍ତ୍ତନ କରାଯାଇଛି। ତେଣୁ ବିରୋଧୀ ଦଳ ନେତା ଭାବେ ନୂଆକରି ଦାୟିତ୍ୱ ନେଇଥିବା ଜୟନାରାୟଣ ମିଶ୍ରଙ୍କ ସହ ମଧ୍ୟ ଆଗାମୀ ରାଜନୈତିକ କାର୍ଯ୍ୟପନ୍ଥା ନେଇ ସେ ଆଲୋଚନା କରିବେ। ସେଠାରୁ ପୁଣି ହୋଟେଲ ଅଭିମୁଖେ ଗସ୍ତ କରିବେ। ଉକ୍ତ ହୋଟେଲରେ ଶାହା ଓଡ଼ିଶା ଚାପ୍ଟର ଅଫ୍ ମୋଦି @୨୦ର ଡ୍ରିମ୍ସ ମିଟ୍ ଡେଲିଭରି ପୁସ୍ତକ ଉନ୍ମୋଚନ କରିବେ। ଏହାପରେ ସେ ସାରେ ସ୍ବତନ୍ତ୍ର ବିମାନ ଯୋଗେ ଦିଲ୍ଲୀ ଅଭିମୁଖେ ଯାତ୍ରା କରିବେ ବୋଲି ଜଣାପଡ଼ିଛି।
