ସୁନ୍ଦରଗଡ଼,୧୩।୧(ଡି.ଏନ୍.ଏ.):ସୁନ୍ଦରଗଡ଼ ଜିଲା ବାଲିଶଙ୍କରା ବ୍ଲକ ସଉନାମରା ମାଟିର ପୁଅ ଅମିତ୍ ରୋହିଦାସ। ୨୦୨୩ ପୁରୁଷ ହକି ବିଶ୍ବକପ୍ର ଭାରତୀୟ ହକି ଦଳର ସେ ଉପଅଧିନାୟକ। ରାଉରକେଲାଠାରେ ଆରମ୍ଭ ହେଉଥିବା ଏହି ହକି ବିଶ୍ବକପ୍ ନେଇ ସମସ୍ତଙ୍କ ମଧ୍ୟରେ ଭରି ରହିଛି ଉତ୍ସାହ। ଚଳିତ ପୁରୁଷ ବିଶ୍ବକପ୍ ହକିରେ ଉପଅଧିନାୟକ ଭାବେ ଖେଳୁଥିବା ଅମିତ୍ ଓ ଅନ୍ୟମାନେ ନିଶ୍ଚିତ ଭାବେ ଭଲ ପ୍ରଦର୍ଶନ କରିବେ ଓ ଭାରତ ଚାମ୍ପିୟନ ହେବ ବୋଲି ସମସ୍ତେ ଆଶାବାଦୀ। ତାଙ୍କ ଭଳି ଜଣେ ଉଦୀୟମାନ ହକି ତାରକାଙ୍କୁ ଜନ୍ମ ଦେଇ ବେଶ ଗର୍ବିତ ବୋଲି ଅମିତ୍ଙ୍କ ମାଆ ଗୋଲାପୀ ରୋହିଦାସ କହିଛନ୍ତି। ରାଜ୍ୟ ସରକାରଙ୍କ ପକ୍ଷରୁ ଓଡ଼ିଶାର ରାଉରକେଲା ଓ ଭୁବନେଶ୍ୱରରେ ହକି ବିଶ୍ବକପ୍ ଆୟୋଜନ ଆଗାମୀ ପିଢ଼ିର ଖେଳାଳିଙ୍କୁ ନିଶ୍ଚିତ ପ୍ରେରଣା ଯୋଗାଇବ ବୋଲି କହିବା ସହ ଭାରତୀୟ ଦଳର ସଫଳତା, ଶୁଭକାମନା କରିଛନ୍ତି। ବ୍ୟସ୍ତତା ମଧ୍ୟରେ ମଧ୍ୟ ଅମିତ୍ ପ୍ରତିଦିନ କଥା ହେବାକୁ ଭୁଲି ନ ଥା’ନ୍ତି ବୋଲି ସେ କହିଛନ୍ତି। ଘରକୁ ଆସିଲେ ମାଆଙ୍କ ମନ ପସନ୍ଦର ଖାଇବା ଜିନିଷ ସହ ଘରେ ଥିବା ଭଉଣୀ ସୁସ୍ମିତାଙ୍କ ପାଇଁ ମନଲାଖି ଜିନିଷ ଆଣିଥା’ନ୍ତି ବୋଲି ତାଙ୍କ ମାଆ କହିଛନ୍ତି।
