ନୂଆଦିଲ୍ଲୀ,୧୩।୧:ଦୀର୍ଘ ବର୍ଷ ହେବ ଭାରତର ସୁନା ଆମଦାନୀ ଅନ୍ୟ ଆମଦାନୀ ଦେଶ ତୁଳନାରେ ବେଶ୍ ଅଧିକ ଓ ରେକର୍ଡ ସ୍ତରରେ ରହୁଥିଲା। ହେଲେ ୨୦୨୨ ଡିସେମ୍ବରରେ ଦେଶର ସୁନା ଆମଦାନୀ ହଠାତ୍ କମିଯାଇଛି। ଏପରିକି ୨୦୨୧ର ସମାନ ଅବଧି ତୁଳନାରେ ଏହି ପରିମାଣ ୭୯% କମ୍ ବୋଲି କୁହାଯାଉଛି। ବିଶେଷ କରି ଘରୋଇ ବଜାରରେ ସୁନା ଦର ଉଚ୍ଚ ସ୍ତରରେ ରହିଥିବାରୁ ଗ୍ରାହକଙ୍କ ମଧ୍ୟରେ ଚାହିଦା ଉଲ୍ଲେଖନୀୟ ଭାବେ ହ୍ରାସ ପାଇଛି। ସେହିଭଳି ଗତ ବର୍ଷ ଡିସେମ୍ବରରେ ବିଭିନ୍ନ ଜାତୀୟ ସମସ୍ୟା ଓ ପାର୍ବଣ ଋତୁ ନ ଥିବାରୁ ସୁନା କ୍ରୟ ଚାହିଦା ମଧ୍ୟ ବ୍ୟାପକ ପରିମାଣରେ ହ୍ରାସ ପାଇଛି। ଅପରପକ୍ଷରେ ସୁନା ବଜାର ଚାହିଦା କମ୍ ଥିବାରୁ ଆମଦାନୀ ମଧ୍ୟ ସେହି ତୁଳନାରେ ହ୍ରାସ ପାଇଥିବା ଆକଳନ କରାଯାଉଛି। ସେହିପରି ୨୦୨୧ ଡିସେମ୍ବରରେ ଭାରତର ସୁନା ଆମଦାନୀ ୯୫ ଟନ୍ ଥିବାବେଳେ ୨୦୨୨ ଡିସେମ୍ବରରେ ତାହା ମାତ୍ର ୨୦ଟନ୍କୁ କମି ଆସିଥିଲା। ଏପରିକି ହଠାତ୍ ସୁନା ଆମଦାନୀ ଏତେ ପରିମାଣର ହ୍ରାସ ପାଇବାରୁ ବଜାର ବିଶେଷଜ୍ଞମାନଙ୍କୁ ବି ଆଶ୍ଚର୍ଯ୍ୟ କରିଛି। ଜାତୀୟ ଓ ଅନ୍ତର୍ଜାତୀୟ ଭୌଗୋଳିକ ସମସ୍ୟା ସାଙ୍ଗକୁ ସୁନା ମୂଲ୍ୟ ବୃଦ୍ଧି ଆମଦାନୀ ହ୍ରାସର ମୁଖ୍ୟ କାରଣ ବୋଲି ବିଶେଷଜ୍ଞମାନେ ଆଶଙ୍କା କରୁଥିବା ବେଳେ ଉଭୟ ବଜାର ଓ ସୁନା ମୂଲ୍ୟ ଦୃଷ୍ଟିରୁ ଦେଖିଲେ ୨୦୨୧ ଡିସେମ୍ବରରେ ଭାରତ ୪.୭୩ ବିଲିୟନ ଡଲାର ମୂଲ୍ୟର ସୁନା ଆମଦାନୀ କରିଥିବାବେଳେ ୨୦୨୨ ଡିସେମ୍ବରରେ ୧.୧୮ ବିଲିୟନ ଡଲାରର ସୁନା ଆମଦାନୀ କରିଥିଲା। ଉଲ୍ଲେଖଯୋଗ୍ୟ, ଭାରତ ବିଶ୍ବର ୨ୟ ବୃହତ୍ତମ ସୁନା ଆମଦାନୀକାରୀ ହୋଇଥିବାବେଳେ ଏଥିପାଇଁ ବିପୁଳ ପରିମାଣରେ ବିଦେଶୀ ମୁଦ୍ରା ବ୍ୟୟ କରିବାକୁ ପଡ଼ିଥାଏ। ଏଣୁ ସୁନା ଆମଦାନୀ କମିବା ଦେଶର ବୈଦେଶିକ ମୁଦ୍ରାଭଣ୍ଡାର ପାଇଁ ଶୁଭଙ୍କର ବୋଲି ଅର୍ଥ ବିଶେଷଜ୍ଞମାନେ ଆକଳନ କରିଛନ୍ତି। ସୂଚନାଯୋଗ୍ୟ, ଆମଦାନୀ ହ୍ରାସ ମଧ୍ୟ ବାଣିଜ୍ୟ ନିଅଣ୍ଟ ହ୍ରାସ କରିବାରେ ବେଶ୍ ସହାୟକ ହେବ ବୋଲି ଆକଳନ କରାଯାଉଛି।
