ବାଲେଶ୍ୱର ଅଫିସ, ୨୬।୭: ଆସୁଛି ପାର୍ବଣ ଋତୁ। ପ୍ରଥମେ ଖୁଦୁରୁକୁଣୀ ପରେ ଗଣେଶ, ବିଶ୍ୱକର୍ମା, ଦୁର୍ଗାପୂଜା, ଗଜଲକ୍ଷ୍ମୀ, କାର୍ତ୍ତିକେଶ୍ୱର, ସରସ୍ବତୀ, ମନୀଷା ଦେବୀ, କାଳୀପୂଜା ଅନୁଷ୍ଠିତ ହେବ। ଏହି ସମୟକୁ ଅପେକ୍ଷା କରି ରହିଥାନ୍ତି ମୂର୍ତ୍ତି କାରଗିରମାନେ। ୩ ମାସ ପୂର୍ବରୁ ଦିନରାତି ଏକ କରି ସେମାନେ ପ୍ରସ୍ତୁତି ଆରମ୍ଭ କରିଦେଇଥାନ୍ତି। ହେଲେ ଏବେ ମହାମାରୀ କରୋନା ସଂକ୍ରମଣ ଭୟରେ ବହୁ ପର୍ବପର୍ବାଣି ବନ୍ଦ କରାଯାଇଛି। ଆଗକୁ ଏହି ପୂଜା କିପରି ପାଳନ ହେବ, ମୂର୍ତ୍ତି ବିକ୍ରି ହେବ କି ନାହିଁ ସେନେଇ କାରିଗରମାନେ ଅନିଶ୍ଚିତତା ମଧ୍ୟରେ ରହିଛନ୍ତି। ବେଉସାକୁ ବଞ୍ଚାଇ ଜୀବିକା ନିର୍ବାହ କରିବା ସେମାନଙ୍କ ପାଇଁ ଅସହ୍ୟ ହୋଇପଡ଼ିଛି।
ବିଶେଷ କରି ଅଗଷ୍ଟରୁ ମୂର୍ତ୍ତି ବ୍ୟବସାୟ ଆରମ୍ଭ ହୋଇଥାଏ। ବିଶେଷ କରି ଏଥିପାଇଁ ୪ମାସ ପୂର୍ବରୁ ଅର୍ଥାତ୍ ଦୋଳପୂର୍ଣ୍ଣିମାଠାରୁ ପ୍ରସ୍ତୁତ ହୋଇଥାନ୍ତି କାରିଗର। ମୂର୍ତ୍ତି ପାଇଁ ନଡ଼ା, ପଟା, ସୂତୁଲି, କଣ୍ଟା, ଅଠା, ରଙ୍ଗ, ମାଟି, ଝୋଟ, ବାଲି ଓ କପଡ଼ା ଆଦି ସଂଗ୍ରହ କରିବାକୁ ପଡ଼ିଥାଏ। ଚଳିତବର୍ଷ କରୋନା କଟକଣା ବାଧକ ସାଜିଛି। ମୂର୍ତ୍ତି ନିର୍ମାଣ ଏବେସୁଦ୍ଧା ଆରମ୍ଭ ହୋଇନାହିଁ। କାରିଗରମାନେ ବାର୍ଷିକ ୩ଲକ୍ଷରୁ ୫ଲକ୍ଷ ପର୍ଯ୍ୟନ୍ତ ରୋଜଗାର କରିଥାନ୍ତି। ଚଳିତବର୍ଷ ଏହି ବ୍ୟବସାୟ ସମ୍ପୂର୍ଣ୍ଣ ମାନ୍ଦା ଦେଖାଦେଇଛି। କାରିଗରମାନେ ନିଜ ପରିବାର ଭରଣପୋଷଣ ପାଇଁ ବେଉସାକୁ ଛାଡ଼ି ଅନ୍ୟ ବ୍ୟବସାୟ କରିବାକୁ ମନସ୍ଥ କରି ସମୟକୁ ଅପେକ୍ଷା କରିଛନ୍ତି।
ବାଲେଶ୍ୱର ଜିଲାରେ ପାଖାପାଖି ୧୬୦୦ରୁ ଊର୍ଦ୍ଧ୍ୱ ମୂର୍ତ୍ତି କାରିଗର ରହିଛନ୍ତି। କେବଳ ଭୋଗରାଇ, ବାଲିଆପାଳ, ଜଳେଶ୍ୱର ଅଞ୍ଚଳର କାରିଗର ରାଜ୍ୟ ତଥା ରାଜ୍ୟ ବାହାରେ ମୂର୍ତ୍ତି ତିଆରି କରି ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। ଏବେ କରୋନା କଟକଣା ଯୋଗୁ କାରିଗରମାନେ ନିରାଶ ହୋଇ ସମୟକୁ ଅପେକ୍ଷା କରି ରହିଛନ୍ତି।
