ବାରିପଦା ଅଫିସ,୨୬ା୭(ରଞ୍ଜନ କୁମାର ପ୍ରଧାନ): ସବାଇ ଘାସରେ ପ୍ରସ୍ତୁତ ସୁନ୍ଦର ହସ୍ତକଳା ଓ ବିଭିନ୍ନ ଘରକରଣା ଜିନିଷର ଚାହିଦା ରହିଛି। ଫୁଲ ଚାଙ୍ଗୁଡ଼ି,ପାଛିଆ, ବ୍ୟାଗ୍ ସହିତ ବିଭିନ୍ନ ଉପକରଣ ରାଜ୍ୟ ତଥା ରାଜ୍ୟ ବାହାରେ ଆଦୃତି ଲାଭ କରୁଛି। ମୟୂରଭଞ୍ଜ ଜିଲାର ଅଧିକାଂଶ ମହିଳା ଏହାଦ୍ୱାରା ସ୍ବାବଲମ୍ବୀ ହୋଇ ପାରିଛନ୍ତି। ସେମାନେ ତିଆରି କରୁଥିବା ଉପକରଣ ରାଜ୍ୟର ବିଭିନ୍ନ ମେଳା ଓ ମହୋତ୍ସବରେ ବିକ୍ରି ହେଉଛି। ମୁମ୍ବାଇ, ଅହମ୍ମଦାବାଦ୍, ଦିଲ୍ଲୀ ଓ କୋଲକାତାର ବିଭିନ୍ନ ଷ୍ଟଲରେ ମଧ୍ୟ ଏହି ସାମଗ୍ରୀ ଉପଲବ୍ଧ ହୋଇପାରୁଛି।
ଜିଲାର ବିଭିନ୍ନ ସ୍ଥାନରେ ସବାଇ ଘାସ ଚାଷ କରାଯାଉଛି। ଅଧିକାଂଶ ଲୋକ ଏହି ଘାସରୁ ରଶି ତିଆରି କରି ବିକ୍ରି କରୁଛନ୍ତି। ହେଲେ ଆଉ କେତେକ ମହିଳା ଦୁଇ ପାଦ ଆଗେଇ ଏଥିରେ ଘରକରଣା ଜିନିଷ ତିଆରି କରୁଛନ୍ତି। ଏହାକୁ ଭଲ ଦାମରେ ବିକ୍ରି କରି ସେମାନେ ବେଶ୍ ଦି’ପଇସା ରୋଜଗାର କରୁଛନ୍ତି। ବାରିପଦା ବ୍ଲକ ବଡ଼ଯୋଡ଼ ପଞ୍ଚାୟତ ଗୁହାଳଡ଼ିହି ଗ୍ରାମ ସବାଇ ଉପତ୍ାଦନ କେନ୍ଦ୍ରର ମହିଳାମାନେ ବର୍ତ୍ତମାନ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି। ୨୦୧୧ରେ ମାତ୍ର ୧୧ ସଦସ୍ୟାଙ୍କୁ ଗଠିତ ହୋଇଥିବା ଏହି ଗ୍ରୁପ ବ୍ୟାଙ୍କ୍ରୁ କିଛି ଟଙ୍କା ଋଣ ନେଇ ବ୍ୟବସାୟ ଆରମ୍ଭ କରିଥିଲେ। ୨୦୧୩ରେ ଓରମାସ୍ ତାଙ୍କୁ ସହଯୋଗର ହାତ ବଢ଼ାଇବା ସହିତ ସେମାନେ ଉପତ୍ାଦନ କରୁଥିବା ବିଭିନ୍ନ ଜିନିଷକୁ ମାର୍କେଟିଂ କରିବାରେ ସହାୟକ ହୋଇଥିଲା। ସେହିଭଳି ଓରମାସ୍ ପକ୍ଷରୁ ମହିଳାମାନଙ୍କ ଦକ୍ଷତା ବୃଦ୍ଧି ପାଇଁ ପ୍ରଶିକ୍ଷଣ ପ୍ରଦାନ କରାଯାଉଛି। ଫଳରେ ମହିଳାମାନେ ବର୍ତ୍ତମାନ ମେଶିନ୍ ଓ ହାତରେ ବିଭିନ୍ନ ସାମଗ୍ରୀ ତିଆରି କରିବାରେ ପାରଙ୍ଗମ ହୋଇ ପାରିଛନ୍ତି। ଏହି ଗ୍ରୁପରେ ପଞ୍ଚାୟତର ବିଭିନ୍ନ ଗ୍ରାମରେ ଥିବା ୧୩ ମହିଳା ସ୍ବୟଂ ସହାୟିକା ଗୋଷ୍ଠୀର ୬୧ ସଦସ୍ୟା ରହିଛନ୍ତି। ସେମାନଙ୍କର ମାସିକ ଆୟ ୫ରୁ ୨୦ହଜାର ଟଙ୍କା ପର୍ଯ୍ୟନ୍ତ ହେଉଛି। ଯେଉଁ ମାସରେ ଜିନିଷର ଚାହିଦା ରହୁଛି, ସେହି ମାସରେ ଆୟ ଅଧିକ ହେଉଛି। ଗ୍ରୁପର ସମ୍ପାଦକ ଉଷାରାଣୀ ନାୟକ କୁହନ୍ତି, ମହିଳାମାନେ ସକାଳ ୧୦ଟାରୁ ଘର କାମ ସାରି ବିଭିନ୍ନ ସାମଗ୍ରୀ ତିଆରି କରୁଛନ୍ତି। କିଛି ଘାସ ଚାଷ କରାଯାଉଥିବା ବେଳେ ଅବଶିଷ୍ଟ କିଣା ଯାଉଥିବା ସେ ପ୍ରକାଶ କରିଥିଲେ। ଜିଲାର ଉଦଳା, ବେତନଟୀ, କୁଳିଅଣା, ଶୁଳିଆପଦା ଆଦି ବ୍ଲକରେ ମଧ୍ୟ ଅନ୍ୟ ମହିଳାମାନେ ସବାଇ ଉତ୍ପାଦନ କେନ୍ଦ୍ର କରି ବିଭିନ୍ନ ଉପକରଣ ପ୍ରସ୍ତୁତ କରୁଛନ୍ତି। ଜିଲା ଓରମାସ୍ର ଡେପୁଟି ସିଇଓ ବିମାନ ମଲ୍ଲ କୁହନ୍ତି ୨୦୧୩ରେ ଉକ୍ତ କ୍ଲଷ୍ଟରକୁ ସହାୟତା ପ୍ରଦାନ କରାଯାଇଥିଲା। ମହିଳମାନଙ୍କୁ ଲୋନ୍ ଦିଆଯିବା ସହିତ ସେମାନଙ୍କ ଦକ୍ଷତା ବୃଦ୍ଧି ପାଇଁ ପ୍ରଶିକ୍ଷଣ ଦିଆଯାଇଥିଲା। ପରେ ସେମାନେ ସୁନ୍ଦର ଜିନିଷ ଉପତ୍ାଦନ କରିବା ସହ ଭଲ ରୋଜଗାର କରିପାରୁଛନ୍ତି। ଏହାଦ୍ୱାରା କେବଳ ମହିଳାମାନେ ଆର୍ଥିକ ସ୍ବାବଲମ୍ବୀ ହୋଇନାହାନ୍ତି ବରଂ ନିଜର ସ୍ବତନ୍ତ୍ର ପରିଚୟ ମଧ୍ୟ ତିଆରି କରି ପାରିଛନ୍ତି ବୋଲି ସେ ପ୍ରକାଶ କରିଛନ୍ତି।
