ଢାକା,୨୪।୫: ବାଂଲାଦେଶର ସେଣ୍ଟ ମାର୍ଟିନ ଦ୍ୱୀପ ପୁନର୍ବାର ଚର୍ଚ୍ଚାରେ। ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ସରକାରର ପତନରେ ଏହି ଦ୍ୱୀପ ଏକ ପ୍ରମୁଖ କାରଣ ଥିଲା ବୋଲି ଅଭିଯୋଗ ହୋଇଥିଲା। ଏବେ ଆମେରିକା ଏବଂ ବାଂଲାଦେଶ ମଧ୍ୟରେ ଜୁନ ୨୦୨୫ରେ କକ୍ସବଜାର ନିକଟବର୍ତ୍ତୀ ଏହି ଦ୍ୱୀପରେ ଆୟୋଜିତ ହେବାକୁ ଯାଉଛି ମିଳିତ ସମରଭ୍ୟାସା ‘ଏକ୍ସରସାଇଜ ଟାଇଗର ଲାଇଟନିଂ’ ଯୋଗୁଁ ଏହା ପୁନଃ ଚର୍ଚ୍ଚାରେ।
ଶେଖ ହାସିନା ଅଭିଯୋଗ କରିଥିଲେ ଯେ ଆମେରିକା ଏହି ଦ୍ୱୀପକୁ ନିୟନ୍ତ୍ରଣ କରିବାକୁ ଚାହୁଁଥିଲା, ଯାହା ତାଙ୍କ ସରକାରର ପତନର ଏକ କାରଣ ହୋଇଥିଲା। ୨୦୨୪ ଅଗଷ୍ଟ ୫ ରେ ଛାତ୍ର ଆନ୍ଦୋଳନ ଓ ଜନବିଦ୍ରୋହ ଯୋଗୁଁ ହାସିନାଙ୍କୁ ଦେଶ ଛାଡ଼ି ଭାରତରେ ଆଶ୍ରୟ ନେବାକୁ ପଡ଼ିଥିଲା। ଏହା ପରେ ନୋବେଲ ବିଜେତା ମହମ୍ମଦ ୟୁନୁସଙ୍କ ନେତୃତ୍ୱରେ ଏକ ଅନ୍ତରୀଣ ସରକାର ଗଠନ ହୋଇଥିଲା, ଯିଏକି ଆମେରିକାର ସହ ନିକଟତର ବୋଲି କୁହାଯାଏ।
ତେବେ କୁହାଯାଉଛି ଏହି ସମରାଭ୍ୟାସ ଶାନ୍ତିରକ୍ଷା ପ୍ରସ୍ତୁତି ଏବଂ ଉଭୟ ଦେଶର ସୈନ୍ୟବାହିନୀ ମଧ୍ୟରେ ସହଯୋଗ ବୃଦ୍ଧି କରିବାକୁ ଲକ୍ଷ୍ୟ ରଖିଛି। କିନ୍ତୁ ଏହା ମାଲାକ୍କା ପ୍ରଣାଳୀ, ମିଆଁମାର, ଭାରତ ଏବଂ ଚୀନ ସହିତ ବାଣିଜ୍ୟ ଉପରେ ନଜର ରଖିବା ପାଇଁ ଆମେରିକାର ଏକ ରଣନୀତି ବୋଲି ମଧ୍ୟ ଚର୍ଚ୍ଚା ହେଉଛି। ଆମେରିକାର ସୈନ୍ୟ କକ୍ସବଜାର ଏବଂ ସେଣ୍ଟ ମାର୍ଟିନ ଦ୍ୱୀପ ନିକଟରେ ଉପସ୍ଥିତ ଥିବା ଦାବି କରାଯାଇଛି, ଯାହା ୧୯୭୧ ପରେ ବାଂଲାଦେଶରେ ପ୍ରଥମ ଥର ପାଇଁ ବିଦେଶୀ ସୈନ୍ୟର ଉପସ୍ଥିତିକୁ ନେଇ ଆଲୋଚନା ସୃଷ୍ଟି କରିଛି।
ଏହି ଘଟଣା ଭାରତ, ଚୀନ ଏବଂ ମିଆଁମାର ଭଳି ପଡ଼ୋଶୀ ଦେଶମାନଙ୍କ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ, କାରଣ ଏହା ଦକ୍ଷିଣ ଏସିଆରେ ଭୂ-ରାଜନୈତିକ ସନ୍ତୁଳନକୁ ପ୍ରଭାବିତ କରିପାରେ। ସେଣ୍ଟ ମାର୍ଟିନ ଦ୍ୱୀପର ରଣନୈତିକ ଗୁରୁତ୍ୱ ଏବଂ ଏହାର ଚାରିପାଖରେ ଚାଲିଥିବା ଘଟଣାକ୍ରମ ଆଗାମୀ ଦିନରେ ଅଞ୍ଚଳରେ ନୂଆ ଉତ୍ତେଜନା ସୃଷ୍ଟି କରିପାରେ।
