ନୂଆଦିଲ୍ଲୀ : ପ୍ରମୁଖ ଇ-କମର୍ସ କମ୍ପାନୀ ଆମାଜନ ପକ୍ଷରୁ ଭାରତ ବଜାର ଲାଗି ଗ୍ରେଟ୍ ଇଣ୍ଡିଆନ ଫେଷ୍ଟିଭାଲ ଚଳିତ ମାସ ୧୭ରୁ ଆରମ୍ଭ ହେଉଛି। ଏଥିରେ ଲକ୍ଷାଧିକ ସେଲର ଅଂଶ ଗ୍ରହଣ କରିବେ ବୋଲି ଜଣାପଡିଛି। ପାର୍ବଣରେ ବିଭିନ୍ନ ପ୍ରଡକ୍ଟ ଏହି ଫେଷ୍ଟିଭାଲ ଦ୍ୱାରା ଗ୍ରାହକ ଲାଭ କରିପାରିବେ ବୋଲି କମ୍ପାନୀ ପକ୍ଷରୁ ସୂଚନା ରହିଛି। କମ୍ପାନୀର ପ୍ରାଇମ ମେମ୍ବର ୨୪ ଘଣ୍ଟିଆ ପୂର୍ବ ଆକ୍ସେସ୍ ସୁବିଧା ପାଇବେ। ୬.୫ ଲକ୍ଷରୁ ଊର୍ଦ୍ଧ୍ୱ ସେଲର ଏଥିରେ କୋଟି କୋଟି ପ୍ରଡକ୍ଟ ଉପଲବ୍ଧ କରାଇବେ। କ୍ଷୁଦ୍ର ଏବଂ ମଧ୍ୟମ ବିଜ୍ନେସଗୁଡିକ ୪ କୋଟିରୁ ଊର୍ଦ୍ଧ୍ୱ ପ୍ରଡକ୍ଟ ଲୋକଙ୍କୁ ଯୋଗାଇଦେବେ। ଦେଶର ୧୦୦ ସହରରୁ ୨୦ ହଜାର ଲୋକାଲ ଶପ୍ ମଧ୍ୟ ଏହି ଫେଷ୍ଟିଭାଲରେ ଅଂଶ ଗ୍ରହଣ କରିବେ ବୋଲି ଜଣାପଡିଛି। ଏଥିରେ ୧ ଲକ୍ଷ ଲୋକାଲ ଶପ୍ ଏବଂ କିରାନା ଗ୍ରାହକଙ୍କ ନିକଟରେ ସେବା ପହଞ୍ଚାଇବେ। ଏହି ଫେଷ୍ଟିଭାଲରୁ ସାମଗ୍ରୀ କ୍ରୟ କରି ଗ୍ରାହକ କ୍ଷୁଦ୍ର ବାଣିଜ୍ୟଗୁଡିକୁ ସହାୟତା କରିପାରିବେ।
ପ୍ରମୁଖ ବ୍ରାଣ୍ଡଗୁଡିକର ୯୦୦ରୁ ଊର୍ଦ୍ଧ୍ୱ ପ୍ରଡକ୍ଟ ଏହି ଅବସରରେ ଶୁଭାରମ୍ଭ କରାଯିବ। ଗ୍ରାହକ ସ୍ମାର୍ଟଫୋନ, ବଡ ଆପ୍ଳାଏନ୍ସ, ଟିଭି, କଞ୍ଜ୍ୟୁମର ଇଲେକଟ୍ରୋନିକ୍ସ, ହୋମ୍ ଏବଂ କିଚେନ ପ୍ରଡକ୍ଟ, ଫ୍ୟାଶନ ଏବଂ ବିୟୁଟି, ଗ୍ରସେରି ସମେତ ଅନ୍ୟ ସାମଗ୍ରୀ ଲାଭ କରିବାକୁ ସକ୍ଷମ ହେବେ। ହିନ୍ଦୀ, ଇଂଲିଶ, ତାମିଲ,ତେଲୁଗୁ, ମାଲୟାଲମ ଏବଂ କନ୍ନଡ ଭଳି ୬ଟି ଭାଷାରେ ଓ୍ବେବ୍ସାଇଟକୁ ଆକ୍ସେସ୍ କରିବାର ସୁବିଧା ମଧ୍ୟ ରହିଛି। ଆମାଜନର ବିଜ୍ନେସ ସେଗ୍ମେଣ୍ଟରୁ କ୍ରୟକରି ଏମ୍ଏସ୍ଏମ୍ଇ ସଞ୍ଚୟ ସୁବିଧା ପାଇପାରିବେ। ନବରାତ୍ରି, ଦୁର୍ଗାପୂଜା, ଦୀପାବଳି, ଓ୍ବେଡିଂ ସିଜନ ଏବଂ ଧନତେରସ ଲାଗି ଲୋକମାନେ ଆମାଜନରୁ କ୍ରୟ ସୁବିଧା ପାଇବେ। ଏଚ୍ଡିଏଫ୍ସି ବ୍ୟାଙ୍କ ଡେବିଟ ଏବଂ କ୍ରେଡିଟ କାର୍ଡରେ ୧୦% ଇନ୍ଷ୍ଟାଣ୍ଟ ରିହାତି ସୁବିଧା, ଡେବିଟ ଏବଂ କ୍ରେଡିଟ କାର୍ଡରେ ନୋ କଷ୍ଟ୍ ଇଏମ୍ଆଇ, ଏକ୍ସଚେଞ୍ଜ ଅଫର, ଆମାଜନ ପେ ୟୁପିଆଇ ଦ୍ୱାରା ଦେନିକ ଶପିଂ ରିଓ୍ବାର୍ଡ ଭଳି ବିଭିନ୍ନ ସୁବିଧା ଗ୍ରାହକଙ୍କ ଲାଗି ରହିଛି। ଏଭଳି ଏକ ଫେଷ୍ଟିଭାଲ ସେଲର ଏବଂ ପାର୍ଟନରଙ୍କ ଲାଗି ଏକ ସୁଯୋଗ ବୋଲି ଆମାଜନ ଇଣ୍ଡିଆର ଉପସଭାପତି ମନୀଷ ତିଓ୍ବାରୀ ସୂଚନା ଦେଇଛନ୍ତି। ପାର୍ବଣ ସମୟରେ ଗ୍ରାହକ ଏହାଦ୍ୱାରା କ୍ରୟର ଏକ ଉନ୍ନତ ଅଭିଜ୍ଞତା ଲାଭ କରିପାରିବେ। ଘରେ ବସି ଲୋକମାନେ ସାମଗ୍ରୀ ଲାଭ କରିପାରିବେ ବୋଲି ସେ ମତ ପ୍ରକାଶ କରିଛନ୍ତି।
