ଚଣ୍ଡିଖୋଲ/ଛତିଆ, ୨୪ା୪(ଡି.ଏନ.ଏ.):: ପ୍ରେମ, ପ୍ରତାରଣାରୁ ଯାଜପୁର ଜିଲା ବୈରୀ ଥାନା ଅଧୀନ କାଇମାଟିଆ ପଞ୍ଚାୟତ ବିରିଜଙ୍ଗା ଗ୍ରାମର ଜଣେ ଯୁବକଙ୍କ ଆତ୍ମହତ୍ୟାକୁ ନେଇ ରବିବାର ଥାନା ଘେରାଉ କରିଛନ୍ତି ଗ୍ରାମବାସୀ। ସେମାନେ ଥାନା ନିକଟରେ ମୃତଦେହ ରଖି ପ୍ରାୟ ୨ ଘଣ୍ଟା ଘେରାଉ କରିବା ସହିତ ମୃତକଙ୍କ ପରିବାରକୁ ନ୍ୟାୟ ପ୍ରଦାନ ପାଇଁ ଦାବି କରିଥିଲେ। ଥାନା ଅଧିକାରୀ ପ୍ରଦୀପ କୁମାର କାନୁନଗୋ ଏଦିଗରେ ପଦକ୍ଷେପ ନେବାକୁ ପ୍ରତିଶ୍ରୁତି ଦେବାପରେ ଧାରଣା ପ୍ରତ୍ୟାହୃତ ହୋଇଥିଲା।
ଗ୍ରାମବାସୀଙ୍କ ଅଭିଯୋଗ, ଅନୁଯାୟୀ ବିରିଜଙ୍ଗା ଗ୍ରାମର କୈଳାସ ଲେଙ୍କାଙ୍କ ପୁଅ ପ୍ରଭାତ କୁମାର ଲେଙ୍କା(୨୬) ବୈରୀ ଗ୍ରାମର ଜଣେ ଯୁବତୀଙ୍କୁ ୪ ବର୍ଷ ହେବ ଭଲ ପାଉଥିଲେ। ସମ୍ପୃକ୍ତ ଯୁବତୀ ଓ ତାଙ୍କ ପରିବାର ପ୍ରଭାତଙ୍କ ନିକଟରୁ ୨ ଲକ୍ଷରୁ ଊର୍ଦ୍ଧ୍ୱ ଟଙ୍କା ସହ ସୁନା ଗହଣା ନେଇଛନ୍ତି। ଏପରି କି ଯୁବତୀଙ୍କ ବାପା ପ୍ରଭାତଙ୍କୁ ଡାକି ମଝିରେମଝିରେ ଗାଳି ଗୁଲଜ କରନ୍ତି ଏବଂ ଅଧିକ ଟଙ୍କା ଓ ସୁନା ଆଣିବାକୁ ଚାପ ପ୍ରୟୋଗ କରନ୍ତି। ଏନେଇ ଗତ ୬ ତାରିଖରେ ବୈରୀ ଥାନାରେ ଅଭିଯୋଗ ହୋଇଥିଲା। ପରେ କେତେଜଣ ଭଦ୍ରଲୋକଙ୍କ ମାଧ୍ୟମରେ ଘଟଣାର ସମାଧାନ ହୋଇଥିଲା। ସମାଧାନ ପରେ ବି ଯୁବତୀଙ୍କ ବାପା ପ୍ରଭାତଙ୍କୁ ଡାକି ମାନସିକ ଓ ଶାରୀରିକ ଯନ୍ତ୍ରଣା ଦେଉଥିଲେ। ଯେଉଁଥି ପାଇଁ ପ୍ରଭାତ ଶନିବାର ସକାଳେ ଘରେ ବେକରେ ରଶି ଲଗାଇ ଦେଇଥିଲେ। ତାଙ୍କୁ ପ୍ରଥମେ ବଡ଼ଚଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ କଟକ ବଡ଼ ଡାକ୍ତରଖାନା ସ୍ଥାନାନ୍ତର କରାଯାଇ ଥିଲା। ସେଠାରେ ତାଙ୍କର ମୃତ୍ୟୁ ହୋଇଥିଲା। ରବିବାର ମୃତଦେହ ବ୍ୟବଚ୍ଛେଦ ପରେ ତାହାକୁ ଗ୍ରାମବାସୀ ଆମ୍ବୁଲାନ୍ସ ଯୋଗେ ଆଣି ଥାନା ଘେରାଉ କରିଥିଲେ। ପ୍ରଭାତଙ୍କ ବଡ଼ ବାପା ସୁବାସ ଚନ୍ଦ୍ର ଲେଙ୍କାଙ୍କ ଅଭିଯୋଗକ୍ରମେ ନଂ.୭୩/୨୩ରେ ଥାନାରେ ଏକ ମାମଲା ରୁଜୁ ହୋଇଛି। ଅନ୍ୟପକ୍ଷରେ ଅଭିଯୋଗକୁ ଆଧାର କରି ତଦନ୍ତ ଆରମ୍ଭ ହୋଇଛି। ଏ ଘଟଣାରେ ଯିଏ ଦୋଷୀ ହୋଇଥିବେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଥାନା ଅଧିକାରୀ ପ୍ରତିଶ୍ରୁତି ଦେଇଛନ୍ତି।
