ରୂପସା,୨୨ା୫(ଡି.ଏନ.ଏ.): ବାଲେଶ୍ୱର ଜିଲା ବସ୍ତା ବ୍ଲକ ଗଡ଼ପଡା ପଞ୍ଚାୟତ ଅନ୍ତର୍ଗତ ବାଖରବାଦ ଉଚ୍ଚ ପ୍ରାଥମିକ ବିଦ୍ୟାଳୟରେ ସରକାରୀ ଅନୁଦାନ ପାଣ୍ଠି ବିନିଯୋଗରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ଅଭିଯୋଗକୁ ଭିତ୍ତିକରି ଶିକ୍ଷା ବିଭାଗ ପକ୍ଷରୁ ତଦନ୍ତ ଆରମ୍ଭ ହୋଇଛି।
ସମୟରେ ଆସିଥିବା ବିଭିନ୍ନ ସରକାରୀ ଅନୁଦାନକୁ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ହଡ଼ପ କରିଥିବା ଗ୍ରାମବାସୀ ତଥା ବିଦ୍ୟାଳୟ ପରିଚାଳନା କମିଟିର ସଦସ୍ୟମାନେ ବସ୍ତା ବ୍ଲକ ଶିକ୍ଷାଧିକାରୀଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗ ପରେ ବ୍ଲକ ଶିକ୍ଷା ଅଧିକାରୀଙ୍କ ନିର୍ଦ୍ଦେଶ କ୍ରମେ ଶିକ୍ଷା ବିଭାଗ ତରଫରୁ ଅଡିଟର କୁବେର ପତି ମଣ୍ଡଳ, ସିଆରସିସି ଅରବିନ୍ଦ ପାଣିଗ୍ରାହୀ ଓ ଉମେଶ ଚନ୍ଦ୍ର ବାଡ଼ି ପ୍ରମୁଖ ବିଦ୍ୟାଳୟରେ ପହଞ୍ଚତ୍ ତଦନ୍ତ କରିଥିଲେ। ତଦାରଖ ସମୟରେ ପ୍ରଧାନ ଶିକ୍ଷୟିତ୍ରୀ ସମସ୍ତ ରେକର୍ଡ ପତ୍ର ଦେଖାଇ ପାରି ନ ଥିବା ବେଳେ ଭାଉଚରରେ ଜାଲିଆତି ହୋଇଥିବା ଜଣାପଡ଼ିଥିଲା। ପ୍ରକାଶଥାଉକି, ବିଦ୍ୟାଳୟକୁ ଆସିଥିବା କମ୍ପୋଜିଟ ଗ୍ରାଣ୍ଟ, ଇକୋ କ୍ଲବ, ଇଲେକ୍ଟ୍ରି ବାବଦ ଅର୍ଥ, ୟୁନିଫର୍ମ ଡ୍ରେସ୍, ଲାଇବ୍ରେରୀ ଓ ଶୌଚାଳୟ ଇତ୍ୟାଦି ଅନୁଦାନ ଟଙ୍କାକୁ ଜାଲ ଦସ୍ତଖତ କରି ବ୍ୟାଙ୍କ୍ରୁ ଉଠାଯାଇଥିବା ଓ ଏହି ଟଙ୍କାର ଉପଯୁକ୍ତ ବିନିଯୋଗ ନ କରି ଫଲ୍ସ ଭାଉଚର୍ ଦେଖାଇ ଲକ୍ଷାଧିକ ଟଙ୍କା ହଡ଼ପ ହୋଇଥିବା ବର୍ତ୍ତମାନର ପରିଚାଳନା କମିଟିର ସଭାପତି ଓ ସଦସ୍ୟମାନେ ଅଭିଯୋଗ ଆଣିଥିଲେ। ଏ ସମ୍ପର୍କରେ ବସ୍ତା ବିଇଓ ଏଲ.କେ. ଜେନାଙ୍କୁ ପଚରିିବାରୁ ଘଟଣାର ତଦନ୍ତ ଚାଲିଛି। ସତ୍ୟାସତ୍ୟ ଜଣାପଡ଼ିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବୋଲି ସେ କହିଛନ୍ତି।
