ବରଗଡ଼/ଅତାବିରା,୬।୯(ପ୍ରେମାନନ୍ଦ ଖମାରୀ/ଯୁଧିଷ୍ଠିର ମହାପାତ୍ର): ରାଜ୍ୟ ସରକାରଙ୍କ ମିଶନ ଶକ୍ତି ବିଭାଗ ଏବଂ ସେଣ୍ଟର ଫର୍ ରିସର୍ଚ୍ଚ ଇନ୍ ସ୍କିମ୍ ଏଣ୍ଡ୍ ପଲିସିଜ୍(ସିଆରଆଇଏସପି)ର ମିଳିତ ପ୍ରକଳ୍ପ ବ୍ଲେସ୍(ବିଲଡ଼ିଂ ଲାଇଭହୁଡସ୍ ଥ୍ରୁ ଏଣ୍ଟରପ୍ରିନରସିପ୍ ଏଣ୍ଡ୍ ସ୍କିଲ୍ ଅଫ୍ ଏସଏଚଜି) ପକ୍ଷରୁ ରାଜ୍ୟର ୮ଜିଲା ବଲାଙ୍ଗୀର, ବରଗଡ଼, କଳାହାଣ୍ଡି, ଗଜପତି, କନ୍ଧମାଳ, କୋରାପୁଟ, ନବରଙ୍ଗପୁର, ରାୟଗଡ଼ା ଜିଲାର ବିଭିନ୍ନ ବ୍ଲକ ପାଇଁ ବ୍ଲକ ସଂଯୋଜକ ଏବଂ ଜୀବିକା ସଖୀ ପଦବୀ ପୂରଣ ପାଇଁ ବ୍ଲକ ସଂଯୋଜକ ଏବଂ ଜୀବିକା ସଖୀ ନିଯୁକ୍ତି ପ୍ରକ୍ରିୟା ଚାଲିଛି। ରାଜ୍ୟରେ ୬୮ ବ୍ଲକ ସଂଯୋଜକ ଏବଂ ୬୪ ଜୀବିକା ସଖୀ ପଦବୀ ପାଇଁ ଏହି ନିଯୁକ୍ତି ପ୍ରକ୍ରିୟା ଚାଲିଛି। ଏଥିପାଇଁ ଶନିବାର ଆବେଦନ ପ୍ରକ୍ରିୟା ସରିଛି। ଅନ୍ୟପକ୍ଷେ ଆବେଦନ ସରିଥିଲେ ହେଁ ଚୟନ ପ୍ରକ୍ରିୟା ପୂର୍ବରୁ ଏହି ପଦବୀ ନିଯୁକ୍ତିରେ ଆରମ୍ଭରୁ ବିଭିନ୍ନ ଅନିୟମିତତା ହୋଇଥିବା ଅଭିଯୋଗ ହୋଇଛି। ବରଗଡ଼ ଜିଲା ଅତାବିରା ବ୍ଲକରୁ ଏଭଳି ଅନିୟମିତତା ତଥା ଦୁର୍ନୀତିର ଗନ୍ଧ ସାମ୍ନାକୁ ଆସିଛି।
ବରଗଡ଼ ଜିଲାରେ ଅତାବିରା, ଅମ୍ବାଭୋନା, ବରଗଡ଼, ବରପାଲି, ଭଟଲି, ଭେଡ଼େନ, ବିଜେପୁର ଏବଂ ସୋହେଲା ବ୍ଲକ ପାଇଁ ଏହି ନିଯୁକ୍ତି ପ୍ରକ୍ରିୟା ରହିଛି। ଅତାବିରା ବ୍ଲକରେ ସୋମବାର ଉକ୍ତ ପଦବୀ ପାଇଁ ଚୟନ ପ୍ରକ୍ରିୟା ରହିଛି। ଏଥିପାଇଁ ଏହି ଅତାବିରା ସରକାରୀ ବାଳକ ହାଇସ୍କୁଲ ନିକଟ ତଥା ସରସ୍ବତୀ ଶିଶୁ ବିଦ୍ୟା ମନ୍ଦିର ସମ୍ମୁଖ ବହୁମୁଖୀ ସଭାଗୃହ(ମଲ୍ଟି ପର୍ପୋଜ୍ ହଲ୍)କୁ ପରୀକ୍ଷା କେନ୍ଦ୍ର ପାଇଁ ନିରୁପିତ କରାଯାଇଛି।
ସୋମବାର ପୂର୍ବାହ୍ନ ୧୧ଟାରୁ ଅପରାହ୍ନ ୧ଟା ୨୦ମିନିଟ୍ ପର୍ଯନ୍ତ ପରୀକ୍ଷା ରହିଥିବା ବେଳେ ପୂର୍ବାହ୍ନ ୧୦ଟା ସୁଦ୍ଧା ପରୀକ୍ଷାକେନ୍ଦ୍ରକୁ ପହଞ୍ଚିବା ପାଇଁ ନିର୍ଦ୍ଦେଶ ରହିଛି। ହେଲେ ରବିବାର ରାତିସୁଦ୍ଧା ଅତାବିରା ବ୍ଲକର ଅନେକ ଆବେଦନକାରୀଙ୍କ ପାଖକୁ ପରୀକ୍ଷାକେନ୍ଦ୍ରକୁ ପ୍ରବେଶ ପାଇଁ ପ୍ରବେଶ ପତ୍ର ଅର୍ଥାତ୍ ହଲ୍ ଟିକେଟ୍ ପହଞ୍ଚି ପାରି ନାହିଁ। କେବଳ ସେତିକି ନୁହେଁ, ଉକ୍ତ ପଦବୀ ପାଇଁ ଉଦ୍ଦିଷ୍ଟ ପୋର୍ଟାଲରେ ଆବେଦନକାରୀମାନେ ଅନଲାଇନ୍ ଆବେଦନ କରିଥିବାବେଳେ ସେମାନଙ୍କୁ ଆବେଦନର ରେଫେରେନ୍ସ ନମ୍ବର ତଥା ସୂଚକ ସଂଖ୍ୟା ମଧ୍ୟ ମିଳିଛି। ସେହିପରି ଆବେଦନକାରୀମାନେ ଅତାବିରା ବ୍ଲକକୁ ପହଞ୍ଚି ବିଭାଗୀୟ ବ୍ଲକ ପ୍ରୋଜେକ୍ଟ ମ୍ୟାନେଜର(ବିପିଏମ)ଙ୍କୁ ଆବେଦନର ପ୍ରିଣ୍ଟକପି ସହିତ ଶିକ୍ଷାଗତ ଯୋଗ୍ୟତା ଆଦିର ହାର୍ଡ଼ କପି ମଧ୍ୟ ପ୍ରଦାନ କରିଛନ୍ତି। ଏହାସତ୍ତ୍ୱେ ପ୍ରବେଶ ପତ୍ର ନ ମିଳିବା ଏବଂ ସମ୍ପୃକ୍ତ ପୋର୍ଟାଲରେ ଆଡ଼ମିଟ୍ କାର୍ଡ଼ ସମ୍ପର୍କୀତ କୌଣସି ସୂଚନା ନ ରହିବା ସମସ୍ତଙ୍କୁ ଚକିତ କରିଛି।
ଏହି ବ୍ଲକର ଲହଣ୍ଡା ପଞ୍ଚାୟତ ଅନ୍ତର୍ଗତ ନିଲେଇପାଲି ଗ୍ରାମର ଜଣେ ଆବେଦନକାରୀ ସୁନନ୍ଦା ପ୍ରଧାନ କହିଛନ୍ତି, ସେ ଜୀବିକା ସଖୀ ପଦବୀ ପାଇଁ ଆବେଦନ କରିଥିଲେ। ହେଲେ ତାଙ୍କୁ ଏପର୍ଯ୍ୟନ୍ତ ହଲ୍ ଟିକେଟ୍ କିମ୍ବା ଆଡ଼ମିଟ୍ କାର୍ଡ଼ ମିଳିପାରି ନାହିଁ।
ସେହିପରି ବୁଗବୁଗା ଗ୍ରାମର ଲିପସା ଖମାରୀ କହିଛନ୍ତି, ସେ ବ୍ଲକ ସଂଯୋଜକ ପଦବୀ ପାଇଁ ଅନଲାଇନ୍ ଆବେଦନ କରିଥିଲେ। ତାଙ୍କୁ ସମ୍ପୃକ୍ତ ପୋର୍ଟାଲରେ ଆବେଦନ ଗ୍ରହଣର ରେଫେରାନ୍ସ ନମ୍ବର ମିଳିଛି। ମାତ୍ର ଏପର୍ଯ୍ୟନ୍ତ ଆଡ଼ମିଟ୍ କାର୍ଡ଼ ମିଳି ନାହିଁ। ଏଭଳିଭାବେ ବୁଗବୁଗା ଗ୍ରାମର ଆଲିସା ଖମାରୀ, ଅତାବିରାର ପୂଜାରାଣୀ ବାଗଙ୍କ କ୍ଷେତ୍ରରେ ମଧ୍ୟ ଏଭଳି ହୋଇଥିବା ସେମାନେ କହିଛନ୍ତି।
ଏହି ସମ୍ପର୍କରେ ଜାଣିବାକୁ ଅତାବିରା ବିଡ଼ିଓ ରିପୁନାଥ ସୁନାଙ୍କୁ ତାଙ୍କ ମୋବାଇଲ ନମ୍ବର 9668400450 ଏବଂ ବିପିଏମ ମନୋଜ କେର୍କେଟାଙ୍କୁ ତାଙ୍କ ମୋବାଇଲ ନମ୍ବର 6370793987ରେ ଯୋଗାଯୋଗ କରିବାରୁ କଲ୍ ରିସିଭ୍ ନ କରିବାରୁ ମତାମତ ମିଳିପାରି ନାହିଁ। ରାଜ୍ୟ ସରକାରଙ୍କ ମିଶନ ଶକ୍ତି ଅଧିନରେ ରହିଥିବା ଏହି ପଦବୀରେ ଏଭଳି ଚଞ୍ଚକତା ଚର୍ଚ୍ଚାର ବିଷୟ ହୋଇଛି।
