ବଲାଙ୍ଗୀର/ଲୋଇସିଂହା, ୪ା୧୨ (ବୀରେନ୍ଦ୍ର କୁମାର ଝାଙ୍କର/ ସୁଶାନ୍ତ ବାରିକ): ଲିଜ୍ ଏଗ୍ରିମେଣ୍ଟ ଜାଲିଆତି କରି ବଲାଙ୍ଗୀରର ଏକ ଦମ୍ପତି ପ୍ରାଣୀଧନ ବିଭାଗରୁ ଅର୍ଥ ଆତ୍ମସାତ୍ କରିଥିବା ଅଭିଯୋଗ ହୋଇଛି। ମାନସ ମହାନ୍ତି ନାମକ ଜଣେ ଯୁବକ ବଲାଙ୍ଗୀର ଟାଉନ ଥାନାରେ ବୁଧବାର ଏନେଇ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ଗତବର୍ଷ (୨୦୨୪) ସତ୍ୟମ କୁମାର ସାହୁ ଏକ କୁକୁଡା ଫାର୍ମ କରିବେ ବୋଲି ମାନସ କୁମାର ମହାନ୍ତିଙ୍କ ସହ ଏକ ଲିଜ୍ ଏଗ୍ରିମେଣ୍ଟ (ଷ୍ଟାମ୍ପ ନମ୍ବର ୧୪୬୩୩୫/୨୦୨୪) କରିଥିଲେ। ବାର୍ଷିକ ନବୀକରଣ ହିସାବରେ ୭ ବର୍ଷ ପାଇଁ ଏହି ଲିଜ୍ ଏଗ୍ରିମେଣ୍ଟ କରାଯାଇଥିଲା। ତେବେ ମେ ମାସ ୨ ତାରିଖରେ କରାଯାଇଥିବା ଏହି ଲିଜ୍ ଏଗ୍ରିମେଣ୍ଟ କରିବାର କିଛିଦିନ ପରେ ସତ୍ୟମ କୁଆଡେ କୁକୁଡା ଫାର୍ମ କରିବାକୁ ମନା କରି ଦେଇଥିଲେ ଏବଂ ଅରିଜିନାଲ ଲିଜ୍ ଡିଡ୍ କପି ଫେରାଇ ନ ଥିଲେ। କିଛି ମାସ ପରେ ସନ୍ଦେହ କରି ମାନସ ଲୋଇସିଂହା ପ୍ରାଣୀଧନ ଅଫିସରେ ସୂଚନା ଅଧିକାର ଆଇନରେ ତଥ୍ୟ ମାଗିବାରୁ ତାଙ୍କ ନାମ ବଦଳରେ କୁଞ୍ଜବିହାରୀ ମିଶ୍ରଙ୍କ ସହ ସତ୍ୟମଙ୍କ ଏଗ୍ରିମେଣ୍ଟ ହୋଇଥିବା ଜାଣିବାକୁ ପାଇଥିଲେ ା ଅଧିକ ତଦନ୍ତ କରିବାରୁ ୨୦୨୩ ମସିହାରେ କୁଞ୍ଜବିହାରୀଙ୍କ ମୃତ୍ୟୁ ହୋଇସାରିଥିବା ଏବଂ ସମାନ ଲିଜ୍ ଡିଡ୍ ନମ୍ବର ଥିବା କପିରେ ସତ୍ୟମ କୁମାର ସାହୁ ୩ ଥର ଏବଂ ତାଙ୍କ ସ୍ତ୍ରୀ ୫ ଥର ଲୋଇସିଂହା ପ୍ରାଣୀଧନ ବିଭାଗରେ ପ୍ରକଳ୍ପ ପାଇଁ ବ୍ୟବହାର କରି ସରକାରୀ ଅର୍ଥ ଆତ୍ମସାତ୍ କରିଥିବା ଜାଣିବାକୁ ପାଇଥିଲେ। ଆରଟିଆଇ ତଥ୍ୟ ମାଗିବାରୁ ଏଭଳି ଜାଲିଆତି ହୋଇଥିବା ଜାଣିବା ପରେ ମାନସ ଟାଉନ ଥାନାକୁ ଆସି ଘଟଣାର ଉଚ୍ଚସ୍ତରୀୟ ତଦନ୍ତ କରିବାକୁ ଅନୁରୋଧ କରିବା ସହ ତାଙ୍କୁ ହତ୍ୟା ଧମକ ଦିଆଯାଇଥିବା ଅଭିଯୋଗ କରିଛନ୍ତି। ତେବେ ଟାଉନ ଥାନା ପୋଲିସ ଲୋଇସିଂହା ଥାନାରେ ଅଭିଯୋଗ କରିବାକୁ କହିବାରୁ ମାନସ ଅନ୍ ଲାଇନ ଜରିଆରେ ଅଭିଯୋଗ କରିବେ ବୋଲି ଜଣାଇଛନ୍ତି। ଏହି ଘଟଣାର ତଦନ୍ତ ହେଲେ ପ୍ରକୃତ ସତ୍ୟାସତ୍ୟ ଲୋକଲୋଚନକୁ ଆସିବ ବୋଲି ମାନସ କହିଛନ୍ତି। ଆମ ଲୋଇସିଂହା ପ୍ରତିନିଧିଙ୍କ ସୂତ୍ରରୁ ଜଣାଯାଇଛି ଯେ, ଏ ସମ୍ପର୍କରେ ବ୍ଲକ ପ୍ରାଣୀ ଚିକିତ୍ସା ଅଧିକାରୀ ଆନନ୍ଦ ସାଗର ସେଠ କହିଛନ୍ତି, ଏହି ଦମ୍ପତି ୬ ବର୍ଷ ପାଇଁ ସେହି ଜମିକୁ ଲିଜ୍ ନେଇ ଫାର୍ମ କରିଛନ୍ତି ା ପ୍ରକଳ୍ପ ମଞ୍ଜୁର ପାଇଁ ବିଭାଗ ପକ୍ଷରୁ ଯେତେବେଳେ କ୍ଷେତ୍ର ପରିଦର୍ଶନ କରାଯାଇଥିଲା, ସେତେବେଳେ ସେ ପ୍ରକୃତ ଦସ୍ତାବିଜ ଦେଖାଇଥିଲେ ା ସେହିସବୁ ଦସ୍ତାବିଜ ସବୁ ଅନ୍ଲାଇନରେ ଉପଲବ୍ଧ ରହିଛି ା ଦସ୍ତାବିଜ ଜାଲିଆତିକୁ ସେ ଖଣ୍ଡନ କରିଛନ୍ତି ା ଏହାଛଡା ଅଭିଯୋଗ ପରେ ତଦନ୍ତ ପାଇଁ ନିର୍ଦ୍ଦେଶକଙ୍କ କାର୍ଯ୍ୟାଳୟ ପକ୍ଷରୁ ଏକ କମିଟି ଗଠନ କରାଯାଇଛି ା ତଦନ୍ତରେ ଯଦି ଅନିୟମିତତା ଜଣାପଡେ ତେବେ ସମ୍ପୃକ୍ତ ହିତାଧିକାରୀଙ୍କ ଠାରୁ ଦିଆଯାଇଥିବା ଅନୁଦାନ ଫେରସ୍ତ ହେବ ବୋଲି କହିଛନ୍ତି ା
