ଗୋପ,୧୬।୧୨(ଡି.ଏନ୍.ଏ.): ଗୋପ ବ୍ଲକ ନାଗପୁର ପଞ୍ଚାୟତର ନାରୁଅ ଗ୍ରାମରେ ମହାମତ୍ାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା(ଏମ୍ଜିଏନ୍ଆର୍ଇଜିଏସ୍)ରେ ଅନ୍ତର୍ଭୁକ୍ତ ୬ଟି ମୋ ପୋଖରୀ ଖୋଳାରେ ଦୁର୍ନୀତି ହେବା ନେଇ ଅଭିଯୋଗ ହୋଇଥିଲା। ତେବେ ଏହି ଅଭିଯୋଗକ୍ରମେ ଗୁରୁବାର ରାଜ୍ୟସ୍ତରୀୟ ଏକ ୬ଜଣିଆ ଟିମ୍ ଉକ୍ତ ପଞ୍ଚାୟତକୁ ଯାଇ କାର୍ଯ୍ୟର ତଦନ୍ତ ଆରମ୍ଭ କରିବା ସହିତ ପୋଖରୀକୁ ମାପଚୁପ କରିଛନ୍ତି। ପ୍ରକାଶ ଯେ, ନାଗପୁର ପଞ୍ଚାୟତ ନାରୁଅ ଗ୍ରାମରେ ମୃତ୍ତିକା ସଂରକ୍ଷଣ ବିଭାଗ ଦ୍ୱାରା ପୋଖରୀ ଖୋଳାଯାଇଥିଲା। ହେଲେ ଏହି କାର୍ଯ୍ୟରେ ଦୁର୍ନୀତି ହୋଇଥିବା ସହ ମେଶିନ ସାହାଯ୍ୟରେ ପୋଖରୀ ଖୋଳା ହୋଇଥିବା ନେଇ ମୁଖ୍ୟମନ୍ତ୍ରୀଙ୍କ ସମେତ ପଞ୍ଚାୟତିରାଜ ବିଭାଗ ମନ୍ତ୍ରୀ ଓ ସଚିବଙ୍କ ସହିତ ବିଭିନ୍ନ ଉଚ୍ଚ ପଦାଧିକାରୀଙ୍କ ନିକଟରେ ଅଭିଯୋଗ ହୋଇଥିଲା। ଏହି ଅଭିଯୋଗକୁ ନେଇ ଯୁଗ୍ମ ସଚିବ ତ୍ରିଲୋଚନ ମହାନ୍ତି, ଏଫ୍ଏ ବରିଷ୍ଠ ଅଧିକାରୀ ଲୁନା ମଲ୍ଲ, ଏମ୍ଜିଏନ୍ଆର୍ଇଜିଏସ୍ର ରାଜ୍ୟ ସହକାରୀ ଯନ୍ତ୍ରୀ ପ୍ରଦୋଷ ଦାଶ, କମ୍ପ୍ୟୁଟର ପ୍ରୋଗ୍ରାମର ସତ୍ୟରଞ୍ଜନ ଲେଙ୍କା, ସାମାଜିକ ସମୀକ୍ଷକ ସୁକାନ୍ତ କୁମାର ପ୍ରମୁଖ ଗୁରୁବାର ଗୋପ ବ୍ଲକରେ ପହଞ୍ଚତ୍ ବିଡିଓ ଦୀପ୍ତିରାଣୀ ଦାସଙ୍କଠାରୁ ସବିଶେଷ ତଥ୍ୟ ସଂଗ୍ରହ କରିବା ସହ ଅଭିଯୋଗ ହୋଇଥିବା ନାରୁଅ ଗ୍ରାମକୁ ଯାଇ ୬ଟି ପୋଖରୀ ବୁଲି ଦେଖିଥିଲେ। ବ୍ଲକ କନିଷ୍ଠ ଯନ୍ତ୍ରୀ ସୁଦୀପ୍ କୁମାର ବେସ୍ରା ଓ ମୃତ୍ତିକା ସଂରକ୍ଷଣ ବିଭାଗ ଅଧିକାରୀ ଗୋପୀନାଥ ବେହେରା ପ୍ରମୁଖ ମାପଚୁପ କରି ସବିଶେଷ ତଥ୍ୟ ପ୍ରଦାନ କରିଥିଲେ। କେତେକ ସମୟରେ ମୃତ୍ତିକା ବିଭାଗର ଅଧିକାରୀ ଜଣଙ୍କ ଚାଷ ଜମି ସହିତ କେତେକ ପଡ଼ିଆରେ ପୋଖରୀ ଖୋଳା ନଁାରେ ମିଥ୍ୟା ବିଲ୍ କରିବା ଭଳି ଅଭିଯୋଗ ଆସୁଥିବାବେଳେ ଏଭଳି ଯାଞ୍ଚ ଦ୍ୱାରା ଏହି ଦୁର୍ନୀତିର ପର୍ଦ୍ଦାଫାଶ ହେଲେ ଅନ୍ୟ ଦୁର୍ନୀତି ପଦାକୁ ଆସିବ। ଏହି ତଦନ୍ତ ସମୟରେ ବିଡିଓ, ଏମ୍ଜିଏନ୍ଆରଇଜିଏସ୍ ସହକାରୀ ଅଧିକାରୀ ପ୍ରୋଗ୍ରାମ ଅଫିସର ମୋନାଲିସା ଶତପଥୀ, ନାଗପୁର ଗ୍ରାମ ରୋଜଗାର ସେବକଙ୍କ ସମେତ ହିତାଧିକାରୀମାନେ ଉପସ୍ଥିତ ଥିଲେ। ଏ ନେଇ ତଦନ୍ତ ଅଧିକାରୀ ଯୁଗ୍ମ ସଚିବ ତ୍ରିଲୋଚନ ମହାନ୍ତି କହିଛନ୍ତି, ଅଭିଯୋଗକୁ ନେଇ ତଦନ୍ତ ଆରମ୍ଭ ହୋଇଛି। କୌଣସି ତ୍ରୁଟିବିଚ୍ୟୁତି ଆସିଲେ ନିଶ୍ଚିତ ସମ୍ପୃକ୍ତ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ।
