ଯାଜପୁର ଟାଉନ/ପ୍ରୀତିପୁର, ୧୮ା୭(ପ୍ରଯକ୍ତା ପ୍ରିୟଦର୍ଶନୀ ମହାନ୍ତି/ସୁଶାନ୍ତ ବେହୁରିଆ) : ଯାଜପୁର ଜିଲାରେ ସ୍ବାସ୍ଥ୍ୟ ସେବାକୁ ନେଇ ଜୋରଦାର ପ୍ରଚାର ଚାଲିଥିବା ବେଳେ ପ୍ରକୃତ ସ୍ଥିତି କିନ୍ତୁ ଭିନ୍ନ । ଏଠାରେ ଉପଯୁକ୍ତ ସ୍ବାସ୍ଥ୍ୟସେବା ମିଳୁ ନ ଥିବାରୁ କ୍ୱାକ୍ ଓ ମେଡିସିନ୍ ଦୋକାନୀ ରୋଗୀମାନଙ୍କ ଚିକିତ୍ସା କରୁଛନ୍ତି । ଏଥିପାଇଁ ବିଭିନ୍ନ ସମୟରେ ରୋଗୀମାନଙ୍କ ଜୀବନ ଯାଉଥିବା ନଜିର ରହିଛି । ସେମିତି ଏକ ଦୁଃଖଦ ଘଟଣା ସାମ୍ନାକୁ ଆସିଛି । ଜଣେ ମେଡିସିନ୍ ଦୋକାନୀ ଜଣେ ୫ବର୍ଷ ଶିଶୁକୁ ଭୁଲ୍ ଇଞ୍ଜେକଶନ୍ ଦେବାରୁ ତାର ମୃତ୍ୟୁ ଘଟିଛି ବୋଲି ପରିବାର ପକ୍ଷରୁ ଅଭିଯୋଗ ହୋଇଛି।
ଏହି ଅଭାବନୀୟ ଘଟଣା ଯାଜପୁର ସଦର ମହକୁମାଠାରୁ ୬ କିମି ଦୂର ମନ୍ଦାରଖଣ୍ଡ ଛକରେ ଥିବା ଏକ ଔଷଧ ଦୋକାନରେ ଘଟିଛି । ମୃତକ ହେଲେ ଦଶରଥପୁର ମୁଗୁପଦା ଅଞ୍ଚଳର ସୁରେନ୍ଦ୍ର ମଲିକଙ୍କ ପୁଅ ଓମ୍ ମଲିକ (୫) । ସେ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ । ପାଖରେ କୌଣସି ଡାକ୍ତରଖାନା କିମ୍ବା ଡାକ୍ତର ନ ଥିବାରୁ ସ୍ଥାନୀୟ ମେଡିସିନ୍ ଦୋକାନକୁ ସୁରେନ୍ଦ୍ର ପୁଅକୁ ଦେଖାଇବାକୁ ଆଣିଥିଲେ । ଦୋକାନୀ ଜଣକ ତାଙ୍କୁ ଏକସଙ୍ଗେ ୨ଟି ଇଞ୍ଜେକ୍ଶନ୍ ଦେଇଥିଲେ। ଏହି ଇଞ୍ଜେକଶନ୍ ନେବା ପରେ ଓମ୍ଙ୍କ ଅବସ୍ଥା ଗୁରୁତର ହୋଇପଡିଥିଲା । ଔଷଧ ଦୋକାନୀ ଜଣକ ତାଙ୍କୁ ନିଜ ଗାଡ଼ିରେ ଯାଜପୁର ମୁଖ୍ୟ ଚିକିତ୍ସାଳୟକୁ ଆଣିଥିଲେ। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହାକୁ ନେଇ ଯାଜପୁର ମୁଖ୍ୟ ଚିକିତ୍ସାଳୟରେ ଉତ୍ତେଜନା ପ୍ରକାଶ ପାଇଥିଲା । ଏପରି ପରିସ୍ଥିତିରେ ଔଷଧ ଦୋକାନୀ ସେଠାରୁ ଫେରାର ହୋଇଯାଇଥିଲେ। ଏ ସଂକ୍ରାନ୍ତରେ ଓମ୍ଙ୍କ ପରିବାର ପକ୍ଷରୁ ଯାଜପୁର ଥାନାରେ ଲିଖିତ ଅଭିଯୋଗ କରାଯାଇଛି । ଯାଜପୁର ଥାନା ଅଧିକାରୀ ଏକ ଅପମୃତ୍ୟୁ ମାମଲା ରୁଜୁ କରି ଓମ୍ଙ୍କ ମୃତଦେହକୁ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି । ଏ ସଂକ୍ରାନ୍ତରେ ତଦନ୍ତ ଚାଲିଛି ବୋଲି ପୋଲିସ କହିଛି । ଅନ୍ୟପକ୍ଷେ ସୁରେନ୍ଦ୍ର କୁଆଡ଼େ ଯାଜପୁରରେ ଓମ୍କୁ ଦେଖାଇ ଏକ ପ୍ରେସ୍କ୍ରିପ୍ଶନ ଆଣିଥିଲେ। ସେହି ପ୍ରେସ୍କ୍ରିପ୍ଶନ ଅନୁଯାୟୀ ଔଷଧ ଦୋକାନୀ ଓମ୍କୁ ୨ଟି ଇଞ୍ଜେକଶନ ଦେଇଥିବା ସୂଚନା ମିଳିଛି ।
