ସାରସକଣା,୫।୯(ଡି.ଏନ.ଏ.): ମୟୂରଭଞ୍ଜ ଜିଲା ଝାରପୋଖରିଆ ଥାନା ଅନ୍ତର୍ଗତ କଳାପାଣି ଅଙ୍ଗନବାଡି କର୍ମୀଙ୍କୁ ସାରସକଣା ବ୍ଳକ ସିଡିପିଓ ମାନସିକ ଚାପ ଓ ନିର୍ଯାତନା ଦେଉଥିବା ନେଇ ଅଭିଯୋଗ ହୋଇଛି। ପୁଅ ଅଶୋକ କୁମାର ସିଂ ଝାରପୋଖରିଆ ଥାନାରେ ଏନେଇ ଏକ ମାମଲା ରୁଜୁ କରିଛନ୍ତି। ଅଭିଯୋଗ ମୁତାବକ, ଗତ ଶନିବାର ସାନଚାଟରା ନିକଟ ଅଙ୍ଗନୱାଡି କେନ୍ଦ୍ରରେ ସମସ୍ତ ଅଙ୍ଗନୱାଡି କେନ୍ଦ୍ର କର୍ମୀଙ୍କୁ ନେଇ ଆୟୋଜିତ ମାସିକ ବୈଠକ ଅବସରରେ ସୋମବାରୀ ସିଂ(୫୨) ବୈଠକ କକ୍ଷ ନିକଟରେ ପହଞ୍ଚିବା ପରେ ଉପସ୍ଥିତ ସିଡିପିଓ ଭାନୁମତି ବେହେରା ସମସ୍ତ କର୍ମୀଙ୍କୁ କହିଥିଲେ ଯେ, କଳାପାଣି ସେଣ୍ଟରର କର୍ମୀ ଆସିଛି ତାକୁ ଫୁଲମାଳ, ଧୂପ, ଦ୍ବୀପ ଦେଇ ବନ୍ଦାପନା କରି ବେକରେ ଫୁଲମାଳ ପିନ୍ଧାଇଦିଅ। ସିଡିପିଓଙ୍କ ଏଭଳି ବ୍ୟବହାର ଓ ଆଚରଣ ଦେଖି ସୋମବାରୀ ଚେତାଶୂନ୍ୟ ହୋଇପଡିଥିଲେ। ଚେତାଶୂନ୍ୟ ହେବାପରେ ତାଙ୍କୁ ମେଡିକାଲ ନେବା ପରିବର୍ତ୍ତ ସିଡିପିଓ ସେଠାରୁ ପଳାଇଥିଲେ। ସେଠାରେ ଉପସ୍ଥିତ ଅଙ୍ଗନୱାଡି କର୍ମୀମାନେ ସଙ୍ଗେ ସଙ୍ଗେ ତାଙ୍କୁ ଅଟୋରେ ନିକଟସ୍ଥ ଶୀର୍ଷା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଯାଇଥିଲେ। ତାଙ୍କ ପରିବାର ଲୋକଙ୍କୁ ଖବର ଦେବାପରେ ମେଡ଼ିକାଲରେ ତାଙ୍କ ପୁଅ ପହଞ୍ଚି ଡାକ୍ତରଙ୍କ ସହ ପରାମର୍ଶ କରିଥିଲେ।
ପ୍ରକାଶଥାଉ କି, ଗତ ୩୦ ଅଗଷ୍ଟରେ ବଡଚାଟରା ନିକଟରେ ଆୟୋଜିତ ବୈଠକରେ କଳାପାଣିର ଅଙ୍ଗନୱାଡି କର୍ମୀ ସୋମବାରୀଙ୍କୁ ଆଧାର ଲିଙ୍କ ସରିଛି କି ନାହିଁ ବୋଲି ସିଡିପିଓ ପଚାରିଥିଲେ। ସୋମବାରୀ ଲିଙ୍କ ସରିଛି ଏବଂ ଯାହାର ଆଧାର ଭୂଲ ଅଛି ତାହା ହୋଇନାହିଁ ବୋଲି କହିବାରୁ ସିଡିପିଓ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହିତ ବାହାରେ ଖରାରେ ଛିଡା ହେବାକୁ କହିଥିଲେ। କେବଳ ଏତିକି ନୁହେଁ, ଯେତେବେଳେ ଆଧାର ଲିଙ୍କ ଶେଷ କରିବୁ ବୈଠକରେ ବସିବୁ ବୋଲି ସିଡିପିଓ କହିଥିଲେ। ଅନେକ ନେହୁରା ହେବା ପରେ ମଧ୍ୟ ସୋମବାରୀଙ୍କୁ ବୈଠକରେ ବସିବାକୁ ଅନୁମତି ଦିଆଯାଇ ନ ଥିଲା। ଫଳରେ ସେ ଦୁଇ ଘଣ୍ଟା ଖରାରେ ଛିଡା ହୋଇରହିଥିଲେ। ଗତ ୩୧ ଅଗଷ୍ଟରେ ସିଡିପିଓ ଫୋନ ଯୋଗେ କହିଥିଲେ ଯେ, ଆଧାର ଲିଙ୍କ ଠିକ କଲୁ କି ନାହିଁ ନ ହେଲେ ତୋ ଦରମା ବନ୍ଦ କରିଦେବି । ଏହିଭଳି ବିଭିନ୍ନ ସମୟରେ ବିଭିନ୍ନ କାର୍ଯ୍ୟକୁ ନେଇ ତାଙ୍କ ମା’ଙ୍କୁ ସର୍ବ ସମ୍ମୁଖରେ ଗାଳି ଗୁଳଜ କରିବା ସହିତ ଅପମାନିତ କରୁଥିବାରୁ ତାଙ୍କ ପୁଅ ବାଧ୍ୟ ହୋଇ ଥାନାର ଦ୍ବାରସ୍ଥ ହୋଇଥିବା ପ୍ରକାଶ କରିଛନ୍ତି।ତେବେ ଏହି ଘଟଣାକୁ ନେଇ ଅନେକ ସମୟରେ ଯୋଗାଯୋଗ କରିବା ପରେ ମଧ୍ୟ ସିଡିପିଓ ଫୋନ ରିସିଭ କରି ନ ଥିଲେ। ଏନେଇ ଥାନାରେ ୧୯୫/୨୨ରେ ମାମଲା ରୁଜୁ କରାଯାଇ ଦଫା ୩୪୧,୨୯୪,୫୦୬ରେ ତଦନ୍ତ କରାଯାଉଛି। ତଦନ୍ତ ପରେ ସତ୍ୟାସତ୍ୟ ଉନ୍ମୋଚନ ହେବ ବୋଲି ସବଇନ୍ସପେକ୍ଟର ମୋନାଲିସା ବେହେରା ପ୍ରକାଶ କରିଛନ୍ତି ।
