କଟକ ଅଫିସ,୨୭ା୯:ଏସ୍ସିବି ମେଡିକାଲରୁ ସୋମବାର ଏକ ଶିଶୁକନ୍ୟା ଚୋରିକୁ ନେଇ ମେଡିକାଲ କର୍ତ୍ତୃପକ୍ଷ ଏବଂ ମଙ୍ଗଳାବାଗ ଥାନା ପୋଲିସକୁ ନାକେଦମ୍ ହେବାକୁ ପଡ଼ିଛି। ଏହି ଚୋରି ଅଭିଯୋଗର ତଦନ୍ତ କରିବାବେଳେ ପୋଲିସକୁ ଅନ୍ୟ ଏକ ଶିଶୁପୁତ୍ର ନିଖୋଜର ତଥ୍ୟ ମିଳିଛି। ଏହି ଘଟଣାରେ ଏକ ର଼୍ୟାକେଟ୍ କାମ କରୁଥିବା ସନ୍ଦେହ କରି ପୋଲିସ ଏକ ଦମ୍ପତିଙ୍କୁ ଅଟକ ରଖି ତନାଘନା ଚଳାଇଛି।
ସୂଚନା ଅନୁଯାୟୀ, ମେଡିକାଲର ସ୍ତ୍ରୀ ଓ ପ୍ରସୂତି ବିଭାଗରେ ପୁରୀ ଜିଲା ଚନ୍ଦନପୁର ଥାନା ଅଞ୍ଚଳର ତୋଫାନ କୁମାର ଜେନାଙ୍କ ସ୍ତ୍ରୀ ଗତ ଗୁରୁବାର ଯାଅଁାଳା କନ୍ୟା ସନ୍ତାନ ଜନ୍ମ ଦେଇଥିଲେ। ସେମାନଙ୍କ ମଧ୍ୟରୁ ଜଣେ ସୁସ୍ଥ ଥିବାବେଳେ ଅନ୍ୟ ଜଣେ ଜଣ୍ଡିସ୍ରେ ଆକ୍ରାନ୍ତ ହୋଇଥିବା ଡାକ୍ତର ସୋମବାର କହିଥିଲେ। ଏକ ଶିଶୁକନ୍ୟା ମାଆ ସହିତ ପ୍ରସୂତି ଓ୍ବାର୍ଡରେ ଚିକିତ୍ସାଧୀନ ରହିଥିବାବେଳେ ଜଣ୍ଡିସ ଆକ୍ରାନ୍ତ ଶିଶୁ କନ୍ୟାକୁ ଏସ୍ଏନ୍ସିୟୁକୁ ସ୍ଥାନାନ୍ତର କରାଯାଇଥିଲା। ହେଲେ ପରିବାର ଲୋକେ ଅପରାହ୍ନ ୫ଟା
ବେଳକୁ ଏସ୍ଏନ୍ସିୟୁରେ ଶିଶୁକନ୍ୟାକୁ ପାଇ ନ ଥିଲେ। ଶିଶୁକନ୍ୟା ଚୋରି ହୋଇଯାଇଥିବା ନେଇ ପରିବାର ଲୋକେ ମଙ୍ଗଳାବାଗ ଥାନାରେ ଅଭିଯୋଗ କରିଥିଲେ। ମେଡିକାଲର ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ପୋଲିସ ମେଡିକାଲର ସିସିଟିଭି ଫୁଟେଜ୍କୁ ଯାଞ୍ଚ କରିଥିଲା। ଏହି ସମୟରେ କଟକ ସଦର ଥାନା ଅନ୍ତର୍ଗତ ପ୍ରତାପନଗରୀର ସୁଜନ କୁମାର ବେହେରା ତାଙ୍କ ବୋହୂ ଦୀପ୍ତିରାଣୀ ରାଉତଙ୍କ ସହ ଏକ ଶିଶୁକନ୍ୟାକୁ ସାଙ୍ଗରେ ଧରି ପହଞ୍ଚତ୍ଥିଲେ। ସୁଜନ କହିଥିଲେ, ତାଙ୍କ ପୁତ୍ର ବବ୍ଲୁଙ୍କ ସ୍ତ୍ରୀ ଦୀପ୍ତିରାଣୀ ଏଠାରେ ଏକ ଶିଶୁପୁତ୍ର ଜନ୍ମ ଦେଇ ଏସ୍ଏନ୍ସିୟୁରେ ୨୧ ଦିନ ରହିବା ପରେ ସୋମବାର ଅପରାହ୍ନରେ ଡିସ୍ଚାର୍ଜ ହୋଇଥିଲେ। ଏହି ସମୟରେ ସେମାନେ ଭୁଲ୍ବଶତଃ ଶିଶୁକନ୍ୟାକୁ ନେଇଯାଇଥିଲେ। ଡିସ୍ଚାର୍ଜ ହେବାବେଳକୁ ଶିଶୁକନ୍ୟାଟି ଏକ ହଗିସ୍ ପିନ୍ଧିଥବାରୁ ସେମାନେ ହଠାତ୍ ପୁଅ କି ଝିଅ ଜାଣିପାରି ନ ଥିଲେ। ଘରେ ହଗିସ୍ ଖୋଲିବାରୁ ଶିଶୁଟି କନ୍ୟାସନ୍ତାନ ବୋଲି ଜଣାପଡ଼ିଥିଲା। ଏହାପରେ ସେମାନେ ତୁରନ୍ତ ତାହାକୁ ଫେରାଇ ଦେବାକୁ ଆସିଛନ୍ତି। ସେ ଶିଶୁକନ୍ୟାକୁ ଫେରାଇ ଦେବା ସହ ନିଜ ଶିଶୁପୁତ୍ରକୁ ନେବା ପାଇଁ ଜିଦ୍ ଧରି ପାଟିତୁଣ୍ଡ କରିଥିଲେ। ଡାକ୍ତରଖାନା କର୍ତ୍ତୃପକ୍ଷ ଓ ପୋଲିସ ତାଙ୍କୁ ବୁଝାଶୁଝା କରିଥିଲେ। ତେବେ ସମ୍ପୃକ୍ତ ଶିଶୁକନ୍ୟା ତୋଫାନଙ୍କ ସ୍ତ୍ରୀଙ୍କର ବୋଲି ଚିହ୍ନଟ କରାଯାଇଥିଲା। ଅନ୍ୟପକ୍ଷରେ ଶିଶୁପୁତ୍ର ନିଖୋଜ ସଂକ୍ରାନ୍ତରେ ତଦନ୍ତ ଆରମ୍ଭ ହୋଇଛି। ଏସ୍ସିବି ମେଡିକାଲର ପ୍ରଶାସନିକ ଅଧିକାରୀ ଅବିନାଶ ରାଉତ ଏବଂ ମଙ୍ଗଳାବାଗ ଥାନା ଆଇଆଇସି ସୁଧାଂଶୁ ଜେନା କହିଛନ୍ତି, ନିଖୋଜ ଶିଶୁକନ୍ୟା ମିଳିଛି। ସମ୍ପୃକ୍ତ ନିଖୋଜ ଶିଶୁପୁତ୍ରକୁ ଖୋଜା ଚାଲିଛି। ଏ ନେଇ ଅପହରଣ ମାମଲା ରୁଜୁ ସହ ଏକ ଦମ୍ପତିଙ୍କୁ ଅଟକ ରଖାଯାଇ ତଦନ୍ତ କରାଯାଉଛି। ସେହିପରି ଏସ୍ସିବି ମେଡିକାଲର ଜରୁରିକାଳୀନ ଅଧିକାରୀ ଭୁବନାନନ୍ଦ ମହାରଣା କହିଛନ୍ତି, ସମ୍ପୃକ୍ତ ଶିଶୁପୁତ୍ର ଘଟଣା ନେଇ ଆମେ ଦ୍ବନ୍ଦ୍ୱରେ ଅଛୁ। ସମ୍ପୃକ୍ତ ମହିଳା କିମ୍ବା ତାଙ୍କ ଶିଶୁପୁତ୍ର ସମ୍ପର୍କରେ ଆମ ନିକଟରେ କିଛି ତଥ୍ୟ ନାହିଁ। ତଥାପି କାଗଜପତ୍ର ଖୋଜା ଚାଲିଛି। ଅନ୍ୟପକ୍ଷରେ ଶିଶୁ ଚୋରି ସମେତ ଅନ୍ୟାନ୍ୟ ଆପରାଧିକ କାର୍ଯ୍ୟକଳାପକୁ ରୋକିବା ପାଇଁ ମେଡିକାଲରେ ସିସିଟିଭି କ୍ୟାମେରା ଲାଗିଥିବାବେଳେ ଏଭଳି କାର୍ଯ୍ୟ କେମିତି ସମ୍ଭବ ହୋଇପାରିଲା ତାହାକୁ ନେଇ ପ୍ରଶ୍ନ ଉଠିଛି। ବିଶ୍ୱସ୍ତରୀୟ ପଥରେ ଅଗ୍ରସର ହେଉଥିବା ଏସ୍ସିବି ମେଡିକାଲର ପ୍ରସୂତି ଓ ସ୍ତ୍ରୀରୋଗ ବିଭାଗରେ ଏଭଳି କାରନାମା ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି।
